“ඔයා ඇමතූ අංකය වැරදියි”
රාජ්‍ය ප්‍රකාශකයන්ගේ වාර්තාව
“ඔයා ඇමතූ අංකය වැරදියි”
ආරක්ෂිත හේතු නිසා දකුණු අප්‍රිකාවේ ජොහැනස්බර්ග්හි පිහිටි විශ්‍රාමික ගම්මානයකට ඇතුල් වෙන්න අමාරුයි. ඒ නිසා ලෙස්ලි සහ කැරලින් මේ ගම්මානයේ අයට දුරකථනය මාර්ගයෙන් සාක්ෂි දැරුවා. ගෙවල්වල සිටියේ ටිකදෙනෙක් වන අතර ඒ අතරින් ක්‍රිස්තියානි පණිවිඩයට උනන්දුවක් දැක්වුයේ කිහිපදෙනෙක් පමණයි. ඒ නිසා දුරකථනයෙන් ලැබුණු මේ ප්‍රතිචාරයට කැරලින් ධෛර්යවත් වුණා.
“මේ කතා කරන්නේ බී. මහත්මියද?” යයි කැරලින් ඇසුවා.
“නැහැ” මිත්‍රශීලි හඬකින් පිළිතුරු ලැබුණා. “මම ජී. මහත්මිය ඔයා ඇමතූ අංකය වැරදියි.”
ඉතා උණුසුම් හා මිත්‍රශීලි කටහඬක් ඇසුණු නිසා කැරලින් කිව්වා “මම ඔයාට කියන්නම් බී. මහත්මියට කියන්න අවශ්‍ය දේ.” අනාගතයේදී දේවරාජ්‍යය මගින් ලැබෙන ආශීර්වාද ගැන ඇයට කැරලින් කිව්වා. දෙවිට අපෙන් ඕනෑ කරන්නේ කුමක්ද? යන විවරණිකාව ලබා දීමට සැලසුම් කළ පසු ජී මහත්මිය ඇහුවා “ඔයාගේ ආගම මොකක්ද?”
කැරලින් කිව්වා “අපි යෙහෝවාගේ සාක්ෂිකරුවන්.”
“අය්යෝ, ඒ ආගමද! ඔයාව මුණගැහෙන එකෙන් වැඩක් වෙන එකක් නැහැ කියලයි මට හිතන්නේ.”
“නමුත් ජී මහත්මිය” කැරලින් කරුණාවෙන් මෙහෙම කිව්වා. “ඔයත් එක්ක මම දැන් මිනිත්තු 20ක් විතර දේවරාජ්‍යය මනුෂ්‍යවර්ගයා සඳහා කරන දේ සම්බන්ධව බයිබල් පද පෙන්නුවම ඔයා කොයිතරම් සතුටු වුණාද? ඒ විතරක් නෙවෙයි ඔයා ඒ ගැන පුදුම වුණා. තවත් ඉගෙනගන්න ආසයි කිව්වා නේද? ඇත්තටම ඔයා මොනවද යෙහෝවාගේ සාක්ෂිකරුවන් ගැන දන්නේ? මෙහෙම හිතන්න ඔයාට අසනීපයක් තියෙනවා නම් ඔයා යන්නේ කා ගාවටද? කාර්මිකයෙක් ළඟටද? නැහැනේ. ඔයා මට අවස්ථාවක් දෙන්න යෙහෝවාගේ සාක්ෂිකරුවන් විශ්වාස කරන දේ ගැන කියන්න.”
කෙටි නිහඬතාවයකින් පස්සේ ජී මහත්මිය කිව්වා “මට හිතෙනවා ඔයා හරියි කියලා. ඔයා එන්න මාව බලන්න. නමුත් එකක් මතක තියාගන්න ඔයාට මාව කවදාවත් වෙනස් කරන්න බැහැ.”
“ජී මහත්මිය මට ඔයාව වෙනස් කරන්න උවමනාවක් තිබුණත් ඒක කවදාවත් මට කරන්න බැහැ. කෙනෙකුව වෙනස් කරන්න පුළුවන් යෙහෝවාට විතරයි” කියා කැරලින් උත්තර දුන්නා.
විවරණිකාව රැගෙන ඇය හමුවීමට ගිය ගමන සාර්ථකයි. ජී මහත්මිය (බෙටී) තවත් බැහැදැකීමකට කැමති වුණා. නැවතත් කැරලින් බෙටීව හමු වූ විට ඇය මෙසේ කියා සිටියා. කෑම මේසයේදී මම අනිත් යෙහෙළියන්ට කිව්වා මම යෙහෝවාගේ සාක්ෂිකරුවන් සමඟ සාකච්ඡා කරනවා කියලා. ඒගොල්ලන් පුදුමෙන් වගේ ඇහුවා “ඔයා කොහොමද එහෙම කරන්නේ ” “ඒ අය ජේසුව විශ්වාස කරන්නේ නැහැ” කියලා.
කැරලින් වහාම බෙටීට මතක් කර දුන්නා දේවරාජ්‍යය ගැන කළ පාඩම සම්බන්ධව.
“කවුද දේවරාජ්‍යයේ රජ” යයි කැරලින් ඇසුවා.
“ජේසු” බෙටී එකපාරටම පිළිතුරු දුන්නා.
“හරියට හරි” කැරලින් කිව්වා. ඉන් පසු කැරලින් තේරුම් කර දුන්නා යේසු දෙවිගේ පුත්‍රයා බව විශ්වාස කළත් යේසු දෙවිට සමාන නොවන නිසා යෙහෝවාගේ සාක්ෂිකරුවන් ත්‍රිත්ව ඉගැන්වීම පිළිනොගන්නා බව.—මාර්ක් 13:32; ලූක් 22:42; යොහන් 14:28.
කිහිප වතාවක්ම බෙටීව මුණගැසීමෙන් පසු කැරලින්ට දැනගන්න ලැබුණා බෙටී සිනාමුසු මුහුණෙන් සිටියත් ඇය තදබල අසනීපයකින් පෙළෙන බව. ඇයට පිළිකාවක් තිබුණු අතර තමා මැරෙයි කියලා බයේ සිටියේ. “මට මේ සත්‍යය මීට අවුරුදු ගණනාවකට කලින් අහන්න ලැබුණා නම් කොච්චර හොඳද” කියා ඇය දුක් වුණා. ඇයට සහනයක් ලබා දීම සඳහා මරණය තද නින්දක් බවත් ඒ වගේම නැවත නැඟිටීමක් තියෙන බවත් කැරලින් බයිබලයෙන් පෙන්නුම් කළා. (යොහන් 11:11, 25) මෙය බෙටීට ලොකු දිරිගැන්වීමක් වුණා. ඇය දැන් දිගටම බයිබලය පාඩම් කරන මුත් රාජ්‍ය ශාලාවේ පැවැත්වෙන රැස්වීම්වලට පැමිණීමට ඇයට ඇති එකම බාධාව වන්නේ පිරිහෙන සෞඛ්‍ය තත්වයයි.
කැරලින් කිව්වා “දේවදූතයෝ මඟ පෙන්වනවා කියන එක නම් හොඳටම පැහැදිලියි. මොකද මට බෙටීව මුණගැහුණේ ‘වැරදි අංකයක්’ නිසයි. එයාගේ වයස අවුරුදු 89යි.”—එළිදරව් 14:6.