“ලොව පුරා ඔවුන්ගේ හඬ පැතිර ගියේය”
“ලොව පුරා ඔවුන්ගේ හඬ පැතිර ගියේය”
“සියලු ජාතීන්ට අයත් මිනිසුන්ව ගෝලයන් කරන්න. පියාණන්ගෙත් පුත්‍රයාගෙත් ශුද්ධාත්මයෙත් නාමයෙන් ඔවුන්ව බව්තීස්ම කරන්න.”—මතෙව් 28:19, NW.
1, 2. (අ) යේසුස් සිය ගෝලයන්ට දුන් බලපැවරුම කුමක්ද? (ආ) පළමු සියවසේ ක්‍රිස්තියානීන්ට එතරම් බොහෝ ප්‍රමාණයක් ඉෂ්ට කිරීමට හැකි වූයේ මන්ද?
ස්වර්ගයට යෑමට ස්වල්ප වේලාවකට පෙර, යේසුස් සිය ගෝලයන්ට බලපැවරුමක් දෙමින් මෙසේ පැවසුවේය. “ගොස් සියලු ජාතීන්ට අයත් මිනිසුන්ව ගෝලයන් කරන්න. පියාණන්ගෙත් පුත්‍රයාගෙත් ශුද්ධාත්මයෙත් නාමයෙන් ඔවුන්ව බව්තීස්ම කරන්න.” (මතෙව් 28:19) එය මොන තරම් මහත් වූ කාර්යයක් වීද!
2 නිකම් සිතා බලන්න! ක්‍රිස්තු වර්ෂ 33වන වසරේ පෙන්තකොස්ත දිනයේදී ගෝලයන් 120දෙනෙකුට ශුද්ධාත්මය ලැබුණු අතර, ගැලවීම ලබාගත හැකි තැනැත්තා වශයෙන් බොහෝ කාලයක් තිස්සේ බලා සිටිය මෙසියස් යේසුස් බව අන් අයට පැවසීමෙන් එම බලපැවරුම ඉෂ්ට කිරීමට ඔවුහු පටන්ගත්හ. (ක්‍රියා 2:1-36) එවන් කුඩා කණ්ඩායමකට “සියලු ජාතීන්ට අයත් මිනිසුන්” කරා ළඟා විය හැක්කේ කෙසේද? මිනිසුන්ගේම බලයෙන් නම් එය කළ නොහැකියි. එනමුත් “දෙවිට සියල්ල කළ හැකිය.” (මතෙව් 19:26, NW) මුල් ක්‍රිස්තියානීන්ට යෙහෝවාගේ ශුද්ධාත්මයේ අනුබලය තිබූ අතර, ඔවුන්ට තිබුණේ හදිසිතාවේ හැඟීමකි. (සෙකරියා 4:6; 2 තිමෝති 4:2) මෙබැවින්, ශුභාරංචිය “අහසින් යට මුළු මැවිල්ලෙහි දේශනා කළ” බව පැවසීමට දශක කිහිපයක් ඇතුළත ප්‍රේරිත පාවුල්ට හැකි විය.—කොලොස්සි 1:23, NW.
3. නිර්මල ක්‍රිස්තියානි ධර්මය වන “තිරිඟු” නොපෙනී ගියේ කුමක් නිසාද?
3 පළමු සියවසේ වැඩි කාලයක් පුරා, සැබෑ නමස්කාරය නොකඩවා පැතිරෙන්නට විය. කෙසේවෙතත්, යේසුස් පුරෝකථනය කර තිබුණේ, සාතන් “කිරිඳි” වපුරන්නාවූද ක්‍රිස්තියානි ධර්මය නමැති “තිරිඟු” අස්වැන්න නෙළන කාලය වන තෙක් සියවස් ගණනාවක් පුරා වැසී තිබෙන්නාවූද කාලයක් පැමිණෙනු ඇති බවය. ප්‍රේරිතයන්ගේ මරණින් පසුව, එය සත්‍යයක් විණි.—මතෙව් 13:24-39.
අද දින ශීඝ්‍ර වර්ධනය
4, 5. වර්ෂ 1919 පටන්, අභිෂේක ලත් ක්‍රිස්තියානීන් ආරම්භ කළ කර්තව්‍යය කුමක්ද? එය මහත් අභියෝගයක් වූයේ මන්ද?
4 වර්ෂ 1919දී, තිරිඟු නමැති නිර්මල ක්‍රිස්තියානි ධර්මය කිරිඳිවලින් වෙන් කිරීමට කාලය උදා විය. යේසුස් දුන් මහත් බලපැවරුම ඒ කාලය වන විටත් අදාළ වන බව අභිෂේක ලත් ක්‍රිස්තියානීහු දැන සිටියහ. තමන් “අන්තිම දවස්වල” ජීවත් වෙමින් සිටි බව ස්ථිර ලෙස විශ්වාස කළ ඔවුහු යේසුස් දුන් මේ අනාවැකියද හොඳින් දැන සිටියහ. “රාජ්‍යයේ මේ ශුභාරංචිය සියලු ජාතීන්ට සාක්ෂියක් පිණිස මුළු ජනාවාස පොළොව පුරාම දේශනා කරනු ලබන්නේය. එවිට අවසානය පැමිණෙන්නේය.” (2 තිමෝති 3:1; මතෙව් 24:14, NW) ඇත්තවශයෙන්ම, තවත් බොහෝ වැඩකටයුතු කිරීමට තිබෙන බව ඔවුහු දැන සිටියහ.
5 එහෙත්, ක්‍රි.ව. 33දී විසූ ගෝලයන් මෙන්, එම අභිෂේක ලත් ක්‍රිස්තියානීන් මුහුණ දුන්නේ අතිමහත් අභියෝගයකටය. ඔවුන්ගේ ගණන ස්වල්ප දහසකට සීමා විය. එමෙන්ම ඔවුන් සිටියේ රටවල් අතළොස්සක පමණි. “ජනාවාස පොළොව පුරාම” ශුභාරංචිය දේශනා කිරීමට ඔවුන්ට හැකි වන්නේ කෙසේද? රෝමයේ සීසර්වරුන්ගේ කාලයේ පටන් ලෝක ජනගහනය සමහරවිට මිලියන 300ක සිට, පළමු ලෝක යුද්ධයෙන් පසුව බිලියන 2ක් දක්වා ප්‍රමාණයක් වැඩි වී තිබුණු බව මතකයේ තබාගන්න. තවද 20වන සියවස පුරාම, ලෝක ජනගහනය දිගින් දිගටම ශීඝ්‍ර ලෙස වර්ධනය විය.
6. එක්දහස් නවසිය තිස් ගණන් වන විට ශුභාරංචිය පතුරුවාලීමේ කිනම් ප්‍රගතියක් අත් කරගෙන තිබුණාද?
6 කෙසේවෙතත්, යෙහෝවාගේ අභිෂේක ලත් සේවකයෝ, තම පළමු සියවසේ සහෝදරයන් මෙන් යෙහෝවා කෙරෙහි පූර්ණ විශ්වාසය තබමින් තමන් ඉදිරියේ තිබූ එම භාරදූර කර්තව්‍යයට උර දෙන්නට ඉටාගත් අතර, යෙහෝවාගේ ආත්මය ඔවුන් සමඟ විය. එක්දහස් නවසිය තිස් ගණන්වල මැද භාගය වන විට, එවැන්ජලිස්තවරුන් 56,000දෙනෙකු බයිබල් සත්‍යය රටවල් 115ක ප්‍රකාශ කර තිබිණි. ඒ වන විට බොහෝ වැඩකටයුතු කර තිබූ නමුදු, තවත් බොහෝ වැඩකටයුතු කිරීමටද තිබිණි.
7. (අ) අභිෂේක ලත් ක්‍රිස්තියානීන්ට මුහුණ දීමට තිබූ නව අභියෝගය කුමක්ද? (ආ) ‘වෙනත් බැටළුවන්ගේ’ සහයෝගය ඇතුව, එක් රැස් කිරීමේ වැඩය මේ දක්වා ප්‍රගතියක් ලබා ඇත්තේ කෙසේද?
7 ඉන්පසුව, එළිදරව් 7:9හි සඳහන් “මහත් සමූහය” ගැන වඩාත් ගැඹුරු අවබෝධයක් ලැබීමත් සමඟ, නව අභියෝගයකට මුහුණ දීමට සිදු වූ අතර, එනයින් මහත් සේ වෙහෙස මහන්සි වී වැඩ කරන එම ක්‍රිස්තියානීන්හට උපකාරයක්ද සැපයෙන බවට ඉඟියක් ලැබිණි. ‘වෙනත් බැටළුවන්ට’ අයත් වූ අසංඛ්‍යාත සමූහයක්, හෙවත් භූමික බලාපොරොත්තුවක් ඇති ඇදහිලිවන්තයන් සමූහයක් “සියලු ජාතීන්ගෙන්ද, ගෝත්‍රවලින්ද, ජනයාගෙන්ද, භාෂාවලින්ද” එකතු කළ යුතුව තිබිණි. (යොහන් 10:16, NW) මේ අය ‘දිවා රෑ දෙකෙහි යෙහෝවාට පරිශුද්ධ සේවය පිරිනමනු ඇත.’ (එළිදරව් 7:15, NW) ඉන් අදහස් කරන්නේ, දේශනා කිරීමේ හා ඉගැන්වීමේ වැඩයට ඔවුන්ගේ සහය ලැබෙනු ඇති බවයි. (යෙසායා 61:5, NW) මෙහි ප්‍රතිඵලයක් වශයෙන්, එවැන්ජලිස්තවරුන්ගේ සංඛ්‍යාව දහස් ගණනින්ද අනතුරුව මිලියන ගණනින්ද වැඩි වෙනවා දැකීම අභිෂේක ලත් ක්‍රිස්තියානීන්ට මහත් සතුට දනවන්නක් විය. වර්ෂ 2003දී, 64,29,351ක උපරිම සංඛ්‍යාවක් දේශනා වැඩයේ හවුල් වූ අතර, ඔවුන්ගෙන් අතිමහත් බහුතරයක් මහත් සමූහයට අයත් වූවන්ය. * අභිෂේක ලත් ක්‍රිස්තියානීහු මෙම උපකාරය ගැන කෘතඥපූර්වක වෙති. තවද තම අභිෂේක ලත් සහෝදරයන්ට සහයෝගය දැක්වීමේ වරප්‍රසාදය තමන්ට ලැබීම ගැන වෙනත් බැටළුවෝද කෘතඥපූර්වක වෙති.—මතෙව් 25:34-40.
8. දෙවෙනි ලෝක යුද්ධ සමයේදී යෙහෝවාගේ සාක්ෂිකරුවන් තමන් මතට පැමිණි දැඩි පීඩනවලට ප්‍රතිචාරය දැක්වූයේ කෙසේද?
8 යළිත් වරක් තිරිඟු පංතිය පැහැදිලිව පෙනෙන්නට වූ විට, සාතන් ඊට එරෙහිව ඉතා කෝපයෙන් යුධ වදින්නට විය. (එළිදරව් 12:16) මහත් සමූහය පෙනෙන්නට පටන්ගත් විට ඔහු ඊට ප්‍රතික්‍රියා කළේ කෙසේද? ඉතා දරුණු ප්‍රචණ්ඩ ක්‍රියා සමඟිනුයි! දෙවෙනි ලෝක යුද්ධ සමය තුළ සැබෑ නමස්කාරයට එරෙහිව ලෝකය පුරාම එල්ල වූ ප්‍රහාරය පිටුපස ඔහු සිටියා කියා අපට සැක කරන්නට පුළුවන්ද? යුධ ගැටුමේදී දෙපාර්ශ්වයෙන්ම ක්‍රිස්තියානීහු මහත් පීඩනයකට ලක් වූහ. අපගේ ප්‍රේමණීය සහෝදර සහෝදරියන් බොහෝදෙනෙක් දරුණු පරීක්ෂාවලට ලක් වූ අතර, ඇතැම්හු තම ඇදහිල්ල නිසා මරුමුවට පත් වූහ. එහෙත්, ගීතිකාකරුගේ මේ වචන ඔවුහු ප්‍රතිනාද කළෝය. “මම දෙවි තුළ, ඔහුගේ වචනය වර්ණනා කරන්නෙමි. දෙවි කෙරෙහි විශ්වාසය තබා සිටිමි. භය නොවන්නෙමි. මාංසමය වූ මනුෂ්‍යයා මට කුමක් කරයිද?” (ගීතාවලිය 56:4; මතෙව් 10:28) අභිෂේක ලත් ක්‍රිස්තියානීහු සහ වෙනත් බැටළුවෝ යෙහෝවාගේ ආත්මයෙන් ශක්තිමත් කරනු ලැබ, එක්ව ස්ථිරව සිටියහ. (2 කොරින්ති 4:7) මෙහි ප්‍රතිඵලයක් වශයෙන්, “දෙවිගේ වචනය දිගටම වැඩි වර්ධනය වූයේය.” (ක්‍රියා 6:7, NW) වර්ෂ 1939දී, යුද්ධය ආරම්භ වූ අවස්ථාවේ, ඇදහිලිවන්ත ක්‍රිස්තියානීහු 72,475දෙනෙක් දේශනා වැඩය තුළ හවුල් වීම වාර්තා කළහ. කෙසේවෙතත්, යුද්ධය අවසන් වූ වසර වන 1945දී ලබාගත් සම්පූර්ණ කිරීමට නොහැකි වූ වාර්තාවෙන් හෙළි කළේ, ක්‍රියාශීලී සාක්ෂිකරුවන් 1,56,299ක් ශුභාරංචිය දේශනා කරමින් සිටි බවයි. මෙය සාතන්ට මොන තරම් පරාජයක්ද!
9. දෙවෙනි ලෝක යුද්ධ සමයේදී නිවේදනය කරනු ලැබූ නව පාසැල් දෙක මොනවාද?
9 දෙවෙනි ලෝක යුද්ධය නිසා ඇති වූ ව්‍යාකූල තත්වය හේතුවෙන් දේශනා වැඩය ඉෂ්ට කරනු නොලැබේ යන සැකයක් යෙහෝවාගේ සේවකයන් තුළ ඇති වූයේ නැති බව පැහැදිලිය. ඇත්තෙන්ම, 1943දී, යුද්ධය එහි උච්චාවස්ථාවට එළඹුණු කාලයේදී, නව පාසැල් දෙකක් ගැන නිවේදනය කෙරිණි. මින් එකක්, දැනට දිව්‍යාණ්ඩු සේවා පාසැල යනුවෙන් හැඳින්වෙන අතර, දේශනා කිරීමටද ගෝලයන් සෑදීමටද පුද්ගලයන්ව පුහුණු කිරීම සඳහා සියලු සභාවන්හි එය පැවැත්වීමට නියමිත විය. ගිලියද් මුරටැඹ බයිබල් පාසැල යනුවෙන් හැඳින්වෙන අනෙක් පාසැල සැලසුම් කරනු ලැබුවේ මිෂනාරිවරුන්ව පුහුණු කර විදේශීය රටවල දේශනා වැඩය දියුණු කිරීම සඳහා යැවීමටය. එසේය, අවසානයේදී යුද්ධයේ ගිනි දැල් නිවී ගිය විට, සැබෑ ක්‍රිස්තියානීහු මීට පෙර කළාටත් වඩා වැඩිමනත් ක්‍රියාකාරකම්වලට සෑදී පැහැදී සිටියෝය.
10. වර්ෂ 2003 අතරතුරේදී යෙහෝවාගේ ජනයාගේ ජ්වලිතය දකින්නට ලැබුණේ කෙසේද?
10 ඔවුන් කර ඇත්තේ මොන තරම් පුදුමසහගත වැඩක්ද! දිව්‍යාණ්ඩු සේවා පාසැලෙන් පුහුණුව ලබා සිටින බාල මහලු, මාපිය දරුවන් මෙන්ම ආබාධිත අය පවා දිගින් දිගටම යේසුස් දුන් ඒ මහත් බලපැවරුම ඉෂ්ට කිරීමෙහිලා හවුල් වෙමින් සිටිති. (ගීතාවලිය 148:12, 13; යෝවෙල් 2:28, 29) වර්ෂ 2003දී, සෑම මාසයකම සාමාන්‍යයක් වශයෙන් 8,25,185දෙනෙක් පුරෝගාමි සේවයේ තාවකාලිකව හෝ නොකඩවා හවුල් වීමෙන් තමන් තුළ ඇති හදිසිතාවේ හැඟීම නිරූපණය කර තිබේ. එම වසරේම, යෙහෝවාගේ සාක්ෂිකරුවෝ රාජ්‍යයේ ශුභාරංචිය අනුන්ට පැවසීම සඳහා පැය 1,23,47,96,477ක් වැය කළහ. සහතික වශයෙන්ම යෙහෝවා සිය ජනයාගේ ජ්වලිතය ගැන සතුටු වෙයි!
විදේශීය රටවල
11, 12. මිෂනාරිවරුන්ගේ කදිම වාර්තාව නිරූපණය වන්නේ කවර උදාහරණවලින්ද?
11 වසර ගණනාවක් පුරා, ගිලියද් පාසැලේ උපාධි ලාභීහු සහ වඩාත් මෑතකදී දේවසේවා පුහුණු පාසැලේ උපාධි ලාභීහු මහත් විශිෂ්ට වාර්තාවක් තබා සිටිති. නිදසුනක් වශයෙන්, බ්‍රසීලයේ, මිෂනාරිවරුන් පළමු වරට 1945දී එහි ගිය විට එහි සිටියේ ප්‍රචාරකයන් 400කටත් වඩා අඩු සංඛ්‍යාවකි. මෙම මිෂනාරිවරුන් සහ ඔවුන්ට පසුව එම රටට ගිය මිෂනාරිවරුන් තමන්ගේ ජ්වලිතවත් බ්‍රසීල ජාතික සහෝදරයන් සමඟ මහත් සේ වෙහෙසී වැඩ කළ අතර, යෙහෝවා ඔවුන්ගේ ප්‍රයත්නවලට ආශීර්වාද කර ඇත. වර්ෂ 2003දී බ්‍රසීලය 6,07,362ක නව වාර්තාවක් තබා තිබෙනවා දැකීම එම මුල් දවස් මතකයේ තිබෙන අයට මොන තරම් සතුටක්ද!
12 ජපානය ගැන සලකා බලන්න. දෙවෙනි ලෝක යුද්ධයට පෙර, එම රටේ රාජ්‍ය දේශනාකරුවන් සිටියේ සියයක් පමණ දෙනෙකි. යුද්ධ සමයේදී, දරුණු හා කෲර පීඩා හේතුවෙන් ඔවුන්ගේ සංඛ්‍යාව මහත් සේ අඩු වූ අතර, යුද්ධය අවසානයේදී ආත්මිකව හා ශාරීරිකව ප්‍රාණවත්ව සිටියේ සාක්ෂිකරුවන් ස්වල්පදෙනෙකු පමණි. (හිතෝපදේශ 14:32) වර්ෂ 1949දී අඛණ්ඩතාව රැකගත් එම ස්වල්පදෙනා එම රටට පළමුවෙන් පැමිණි ගිලියද් පාසැලේ පුහුණුව ලැබූ මිෂනාරිවරුන් 13දෙනාව ඉතා සාදරයෙන් පිළිගත් බවට කිසිදු සැකයක් නැත. එමෙන්ම එම මිෂනාරීහු සැණෙකින් තමන්ගේ එම උද්‍යෝගිමත්, ආගන්තුක සත්කාරශීලී සහෝදරයන්ට මහත් සෙනෙහසකින් ඇලුම් වූහ. ඊට වසර 50කට පසුව, 2003 වසරේදී, ජපානයේ ප්‍රචාරකයන්ගේ වාර්තා වූ මුළු එකතුව 2,17,508ක් විය. ඇත්තවශයෙන්ම යෙහෝවා එම රටේ වෙසෙන තම ජනයාට ඉතා මහඟු ලෙස ආශීර්වාද කර තිබේ. ඒ හා සමාන වාර්තාවන් වෙනත් බොහෝ රටවලින්ද අසන්නට ලැබෙයි. විදේශීය බලප්‍රදේශවල දේශනා කරන්නට හැකියාවක් ඇති අය ශුභාරංචිය පතළ කිරීමට මහත් සේ දායක වී ඇති අතර, එනයින් 2003දී එය ලොව පුරා රටවල්, දූපත් සහ රටවල් 235ක එය අසන්නට සලස්වන ලදි. එසේය, මහත් සමූහය “සියලු ජාතීන්ගෙන්” පැමිණෙමින් සිටිති.
“සියලු . . . ගෝත්‍රවලින්ද ජනයාගෙන්ද භාෂාවලින්ද”
13, 14. ‘සියලු භාෂාවලින්’ ශුභාරංචිය දේශනා කිරීමේ වටිනාකම යෙහෝවා පෙන්වූයේ කිනම් මාර්ගයෙන්ද?
13 ක්‍රිස්තු වර්ෂ 33 පෙන්තකොස්තයේදී ගෝලයන් ශුද්ධාත්මයෙන් අභිෂේක කරනු ලැබූ අවස්ථාවේදී වාර්තා වූ පළමු ප්‍රාතිහාර්යය වූයේ, එතැනට රැස් වී සිටි සමූහයාට අන්‍ය භාෂාවලින් කතා කරන්නට ඔවුන්ට හැකිකම ලැබීමයි. ඔවුන්ට සවන් දුන් සියල්ලන්ට ජාත්‍යන්තර භාෂාවකින්, සමහරවිට ග්‍රීක් භාෂාවෙන් කතා කරන්නට හැකි වුණා විය හැකියි. ‘භක්තිවන්ත පුරුෂයන්’ වූ නිසා, ඔවුන්ට දේවමාලිගාවේදී හෙබ්‍රෙව් භාෂාවෙන් කරන ලද ආගමික වතාවන් තේරුම්ගැනීමට හැකිකම තිබුණා විය යුතුයි. එහෙත්, තමන්ගේ බාල වියේ පටන් ඉගෙනගෙන සිටි භාෂාවකින් ශුභාරංචිය අසන්නට ලැබුණ විට, ඔවුහු ඒ මගින් සැබවින්ම මහත් සේ පෙලඹුණහ.—ක්‍රියා 2:5, 8-12.
14 අද දිනත්, දේශනා වැඩය තුළ බොහෝ භාෂාවන් භාවිත වේ. අනාවැකියේ කියා තිබුණේ මහත් සමූහය ජාතීන්ගෙන් පමණක් නොව “ගෝත්‍රවලින්ද ජනයන්ගෙන්ද භාෂාවන්ගෙන්ද” පැමිණෙන බවයි. මීට එකඟ වෙමින් යෙහෝවා සෙකරියා තුළින් අනාවැකි කීවේ මෙලෙසයි. “ඒ දවස්වලදී සියලු භාෂා ඇති ජාතීන්ගෙන් මනුෂ්‍යයන් දසදෙනෙක්, වස්ත්‍ර කොන අල්ලාගෙන, එසේය, යුදෙව් ජාතියේ මනුෂ්‍යයෙකුගේ වස්ත්‍ර කොන අල්ලාගෙන අපි ඔබ සමඟ යන්නෙමු, මක්නිසාද දෙවි ඔබ සමඟ සිටින බව අප විසින් අසා තිබේයයි කියනවා ඇතැයි සේනාවල යෙහෝවා කියන්නේයයි කීය.” (සෙකරියා 8:23, අකුරු ඇල කළේ අපය.) යෙහෝවාගේ සාක්ෂිකරුවන්ට තවදුරටත් අන්‍ය භාෂාවලින් කතා කිරීමේ දීමනාව නැතත්, ජනයන්ට ඔවුන්ගේම භාෂාවලින්ම ඉගැන්වීමේ වටිනාකම ඔවුහු දනිති.
15, 16. මිෂනාරිවරුන් සහ වෙනත් අය දේශීය භාෂාවලින් දේශනා කිරීමේ අභියෝගය භාර ගෙන තිබෙන්නේ කෙසේද?
15 අද දින ඉංග්‍රීසි, ප්‍රංශ සහ ස්පාඤ්ඤ වැනි පුළුල් ලෙස භාවිත කරනු ලබන භාෂා තිබෙන්නේ ස්වල්පයක් පමණක් බව සැබෑවකි. එහෙත්, තමන්ගේ මව්බිම අතහැර දමා වෙනත් රටවල සේවය කිරීමට ගොස් සිටින අය එම රටේ භාෂාවන් ඉගෙනීමට උත්සාහ කරති. එවිට, “සදාකාල ජීවනය සඳහා නිසි නැඹුරුවාවක්” ඇති අයට පහසුවෙන් ශුභාරංචිය ලබාගැනීමට හැකියාව ලැබී ඇත. (ක්‍රියා 13:48, NW) එය ලෙහෙසි පහසු කාර්යයක් නොවේ. ටුවාලු නම් දකුණු පැසිෆික් දූපතේ සහෝදරයන්ට තමන්ගේම භාෂාවෙන් ප්‍රකාශන අවශ්‍ය වූ විට, මිෂනාරිවරයෙක් එම ඉලක්කය ඉටු කිරීමේ අභියෝගය භාරගත්තේය. එම භාෂාවෙන් කිසිම ශබ්දකෝෂයක් නොතිබූ හෙයින්, ටුවාලු භාෂාවේ වචන ඇතුළත් පාරිභාෂික ශබ්දකෝෂයක් නිපදවීමට ඔහු පටන්ගත්තේය. කල් යත්ම, පාරාදීස පොළොවක සදාකල් ජීවත් වන්නට ඔබට හැක * යන පොත ටුවාලු භාෂාවෙන් ප්‍රකාශයට පත් කරන ලදි. මිෂනාරිවරුන් කුරසවු රටට පැමිණි විට, එහි භාවිත වූ පපියමෙන්ටෝ භාෂාවෙන් බයිබලයක්වත් ශබ්දකෝෂයක්වත් තිබුණේ නැත. තවද භාෂාව ලිවිය යුතු ආකාරය ගැනද ඉතා බොහෝ මත භේදද විය. එහෙත්, පළමු මිෂනාරිවරුන් පැමිණි මුල් වසර දෙක තුළදී, පළමු වරට එම භාෂාවෙන් ක්‍රිස්තියානි බයිබල් පත්‍රිකාවක් නිකුත් විණි. අද දින, පපියමෙන්ටෝ යනු මුරටැඹ සඟරාව ඉංග්‍රීසි භාෂාව සමඟින් සමගාමීව පළ වෙන භාෂාවන් 133න් එකකි.
16 නැමීබියාවට පළමුවෙන්ම පැමිණි මිෂනාරිවරුන්ට පරිවර්තන කටයුතු සඳහා උදව් කිරීමට කිසිම සාක්ෂිකරුවෙකු එම රටේ සිටියේ නැත. එපමණක්ද නොව, එම රටේ එක් භාෂාවක් වන නාමා භාෂාවේ අපගේ ප්‍රකාශනවල පොදුවේ භාවිත කරන “පරිපූර්ණ” වැනි සංකල්පවලට සුදුසු වචන තිබුණේද නැත. එක් මිෂනාරිවරයෙක් මෙසේ වාර්තා කරයි. “පරිවර්තන කටයුතු සඳහා මම ප්‍රධාන වශයෙන් යොදාගත්තේ බයිබලය පාඩම් කරමින් සිටින පාසැල් ගුරුවරුන්වයි. ඔවුන්ට සත්‍යය පිළිබඳව තිබුණේ අල්ප දැනුමක් නිසා, ඔවුන් සමඟ වාඩි වී සෑම වාක්‍යයක්ම නිවැරදි බවට සහතික කරගන්නට මට සිද්ධ වුණා.” කෙසේවෙතත්, නව ලොවක ජීවිතය යන පත්‍රිකාව අවසානයේදී නැමීබියානු භාෂා හතකට පරිවර්තනය කරන ලදි. අද දින, මුරටැඹ සඟරාව ක්වන්යාමා සහ න්ඩොංගා යන භාෂාවලින් නිතිපතා පළ වෙයි.
17, 18. මෙක්සිකෝවේ සහ වෙනත් රටවල කිනම් අභියෝගයන්වලට මුහුණ පානු ලැබේද?
17 මෙක්සිකෝවේ ප්‍රධාන භාෂාව ස්පාඤ්ඤ භාෂාවයි. කෙසේවෙතත්, ස්පාඤ්ඤ ජාතිකයන් එහි යෑමට පෙර, එහි භාෂා කිහිපයක් කතා කරනු ලැබූ අතර, ඒවායින් ගණනාවක්ම තවමත් භාවිත වෙයි. මෙබැවින්, යෙහෝවාගේ සාක්ෂිකරුවන්ගේ පොත් පත් දැන් මෙක්සිකානු භාෂාවන් හතකින් පල කරනු ලබන අතර, මෙක්සිකානු සංඥා භාෂාවෙන්ද ඒවා නිකුත් කෙරේ. මායා බසින් පළ කරන ලද රාජ්‍ය සේවාව, අමෙරිකන් ඉන්දියානු භාෂාවකින් මාසිකව පළ කරනු ලැබූ පළමු ප්‍රකාශනයයි. ඇත්තෙන්ම, මෙක්සිකෝවේ රාජ්‍ය ප්‍රචාරකයන් 5,72,530 අතර, මායා, ඇස්ටෙක් සහ වෙනත් භාෂාවන් භාවිත කරන දහස් ගණනක්ද සිටිති.
18 මෑත කාලවලදී, මිලියන ගණන් ජනයා සරණාගතයන් වශයෙන් විදේශීය රටවලට පලා ගොස් ඇත. නැතහොත් ඔවුන් විදේශගත වී ඇත්තේ ආර්ථිකමය හේතූන් නිසාය. මෙහි ප්‍රතිඵලය නම්, රටවල් ගණනාවකම දැන් සෑහෙන තරමකට විදේශීය භාෂාවන් කතා කරන බලප්‍රදේශ බිහි වී තිබීමයි. යෙහෝවාගේ සාක්ෂිකරුවන් ඔවුන්ට දේශනා කිරීමේ අභියෝගය භාරගෙන තිබේ. නිදසුනක් වශයෙන්, ඉතාලියේ ඉතාලි භාෂාවට අමතරව, වෙනත් භාෂා 22ක් කතා කරන සභාවන් සහ කණ්ඩායම් තිබේ. වෙනත් භාෂාවක් කතා කරන ජනයාට දේශනා කිරීමට සහෝදරයන්ට උපකාර කරනු වස්, භාෂා 16ක් ඉගැන්වීම සඳහා මෑතකදී පංති සංවිධානය කරනු ලැබූ අතර, මීට ඉතාලි සංඥා භාෂාවද ඇතුළත් විය. වෙනත් බොහෝ රටවල, යෙහෝවාගේ සාක්ෂිකරුවන් ඒ හා සමානව උත්සාහ කරමින් සිටින්නේ විශාල වශයෙන් සංක්‍රමණය වී පැමිණ සිටින ප්‍රජාවන්ට උපකාර කිරීමටයි. එසේය, යෙහෝවාගේ උපකාරය ඇතුව, ඇත්තවශයෙන්ම මහත් සමූහය විවිධ භාෂාවන් ගණනාවකින් පැමිණෙමින් සිටිති.
“ලොව පුරා”
19, 20. අද දින විශේෂ අන්දමකින් ඉටු වෙමින් තිබෙන්නේ පාවුල්ගේ කිනම් වචනද? පැහැදිලි කරන්න.
19 පළමු සියවසේදී ප්‍රේරිත පාවුල් මෙසේ ලීවේය. “ඔවුන්ට අසන්න ලැබුණා නොවේදැයි මම අසමි. එසේය, සැබවින්ම, ‘ලොව පුරා ඔවුන්ගේ හඬ පැතිර ගියේය. ලෝකයේ කෙළවරවල් දක්වා ඔවුන්ගේ වචන පැතිර ගියේය.’” (රෝම 10:18, NW) එය පළමු සියවසේදී සත්‍යයක් වූවා නම්, එය අපේ දවසේදී කොතරම් සැබෑවක් විය යුතුද! දැන් මිලියන ගණන්, එනම්, සමහරවිට ඉතිහාසයේ මීට පෙර කිසිම කලෙක සිදු නොවූ ලෙසින් බොහෝදෙනෙකු කියමින් සිටින්නේ මෙයයි. “සෑම කල්හිම යෙහෝවාට ප්‍රශංසා කරමි. ඔහුගේ වර්ණනාව මාගේ මුඛයෙහි නිතරම පවත්නේය.”—ගීතාවලිය 34:1.
20 එපමණක්ද නොව, කාර්යයේ වේගය බාල වී නැත. රාජ්‍ය ප්‍රචාරකයන්ගේ ගණන වැඩි වෙමින් තිබේ. දේශනා වැඩයට වැඩි වැඩියෙන් කාලය වෙන් කරනු ලැබේ. නැවත බැලීම් මිලියන ගණනක් සහ බයිබල් පාඩම් දහස් ගණනක් පවත්වනු ලැබේ. තවද අලුතින් බොහෝදෙනෙක් උනන්දුව දක්වති. පසුගිය වසරේ, යේසුස්ගේ මරණය සිහි කිරීමට 1,60,97,622ක නව උපරිමයක් පැමිණියහ. පැහැදිලිවම තවත් බොහෝ දේවල් කිරීමට තිබේ. දැඩි පීඩා විඳදරාගත් අපගේ සහෝදරයන්ගේ ස්ථිර අඛණ්ඩතාව අපි දිගටම අනුකරණය කරමු. අපගේ සියලු සහෝදරයන් 1919 පටන් යෙහෝවාගේ සේවය තුළ විදහාපෙන්වා ඇති ජ්වලිතය අපිත් විදහාපාමු. ගීතිකාකරුගේ මෙම සමූහ ගායනය අපි සියලුදෙනාම ප්‍රතිනාද කරමු. “හුස්ම ඇති සියල්ලෝම යෙහෝවාට ප්‍රශංසා කෙරෙත්වා. යෙහෝවාට ප්‍රශංසා කරව්.”—ගීතාවලිය 150:6.
[පාදසටහන]
^ 7 ඡේ. මේ සඟරාවේ 18 සිට 21 දක්වා පිටුවල ඇති වාර්ෂික වාර්තාව බලන්න.
^ 15 ඡේ. යෙහෝවාගේ සාක්ෂිකරුවන්ගේ ප්‍රකාශනයකි.
ඔබට පැහැදිලි කළ හැකිද?
• සහෝදරයන් 1919දී භාරගත් කාර්යය කුමක්ද? මෙය අභියෝගයක් වූයේ මන්ද?
• දේශනා කිරීමට සහයෝගය දැක්වීමට එක්කාසු කරනු ලැබුවේ කාවද?
• මිෂනාරිවරුන් සහ විදේශීය රටවල සේවය කරන වෙනත් අය තබා ඇත්තේ කෙබඳු වාර්තාවක්ද?
• යෙහෝවා අද දින තම ජනයාගේ වැඩවලට ආශීර්වාද කරමින් සිටින බව ඔබට පෙන්විය හැකි සාක්ෂි මොනවාද?
[පාඩම් ලිපියේ ප්‍රශ්න]
[18-21යන පිටුවල වගුව]
යෙහෝවාගේ සාක්ෂිකරුවන්ගේ 2003 සේවා වසරේ ලෝක ව්‍යාප්ත වාර්තාව
(මුද්‍රිත පිටපත බලන්න)
[14, 15වන පිටුවේ පින්තූර]
දෙවෙනි ලෝක යුද්ධය නිසා ඇති වූ ව්‍යාකූල තත්වය හේතුවෙන් දේශනා වැඩය ඉෂ්ට කිරීමට නොහැකි වනු ඇතැයි යන සැකයක් යෙහෝවාගේ සේවකයන් තුළ ඇති වූයේ නැත
[හිමිකම් විස්තර]
පිපිරීම: U.S. Navy photo; වෙනත් රූප: U.S. Coast Guard photo
[16, 17වන පිටුවේ පින්තූර]
මහත් සමූහය සියලු ගෝත්‍රවලින්ද භාෂාවලින්ද පැමිණෙනු ඇත