සලමොන්ගේ ගීතිකාවෙන් විශේෂාංග
යෙහෝවාගේ වචනය ජීවමානයි
සලමොන්ගේ ගීතිකාවෙන් විශේෂාංග
“කටු අතරේ මානෙල් යම්සේද දූවරුන් අතරේ මාගේ ප්‍රේමවන්තිය එසේය.” “බැද්දේ ගස් අතරේ ජම්බු ගස යම්සේද පුත්‍රයන් අතරේ මාගේ ප්‍රේමවන්තයා එසේය.” ‘අරුණ මෙන් නැඟී එන්නාවූ සඳ මෙන් රුව ඇත්තාවූ ඉර මෙන් දිලිසෙන්නාවූ ඇය කවුද?’ (සලමොන්ගේ ගීතිකාව 2:2, 3; 6:10) බයිබලයේ සලමොන්ගේ ගීතිකාවෙන් රැගෙන තිබෙන ඒ වදන් මොනතරම් සිත්ගන්නාසුලුද! කාව්‍යමය ස්වරූපයෙන් ලියා තිබෙන මේ පොතේ අර්ථවත් හා අලංකාරවත් යෙදුම් රාශියක් දැකිය හැකියි. මේ නිසා මෙය විශිෂ්ට ගීතිකාවක් කියා හඳුන්වනු ලබනවා.
මේ ගීතිකාව ක්‍රි.පූ. 1020දී පමණ රචනා කළේ පුරාණ ඊශ්‍රායෙලයේ විසූ සලමොන් රජ විසිනුයි. ඔහුගේ පාලන සමයේ මුල් අවුරුදු 40 තුළදී රචනා කළ මේ ගීතිකාවෙන් කියවෙන්නේ ෂූලම්මීහි ගැමි තරුණියක් හා එඬේර තරුණයෙක් අතර තිබූ ප්‍රේම සම්බන්ධයක් ගැනයි. මෙහි සඳහන් සෙසු චරිතවලට ඒ තරුණියගේ මව හා සහෝදරයන්ද, ‘යෙරුසලමේ දූවරුන් [රජ මාලිගාවේ ලඳුන්]’ හා ‘සියොන් දූවරුන් [යෙරුසලමේ ස්ත්‍රීන්]” ඇතුළත් වෙනවා. (සලමොන්ගේ ගීතිකාව 1:5; 3:11) මෙහි දෙබස් හරියටම හඳුනාගැනීම දුෂ්කර වුණත් එම දෙබස් පවසන්නේ කවුද කාටද කියා සලකා බැලීමෙන් ඒවා හඳුනාගත හැකියි.
දෙවිගේ මඟ පෙන්වීම යටතේ ලියා තිබෙන පොත්වලට අයත් මේ ගීතිකාවෙන් දෙන පණිවිඩය හේතු දෙකක් නිසා අපිට වැදගත් වෙනවා. (හෙබ්‍රෙව් 4:12) මුල්ම හේතුව වන්නේ පුරුෂයෙක් හා ස්ත්‍රියක් අතර තිබිය යුතු සැබෑ ප්‍රේමය එයින් කියා පෑමයි. දෙවනුව යේසුස් හා ඔහුගේ අභිෂේකලත් ක්‍රිස්තියානීන් අතර තිබෙන ප්‍රේමයද මේ ගීතිකාවෙන් පෙන්වා දී තිබීමයි.—2 කොරින්ති 11:2; එෆීස 5: 25-31
‘මාගේ ප්‍රේමය පුබුදුවාලන්න’ උත්සාහ කරන්න එපා
“ඔහු තමන් මුඛයේ සිඹීම්වලින් මා සිඹීවා; මක්නිසාද ඔබේ ප්‍රේමය මිදි යුෂට වඩා හොඳය.” (සලමොන්ගේ ගීතිකාව 1:2) සලමොන්ගේ ගීතිකාව ආරම්භ කරමින් ඒ දෙබස පවසන්නේ සලමොන්ගේ කඳවුරට රැගෙන ආ ගැමි තරුණියක් විසිනුයි. ඇය එතැනට පැමිණේ කෙසේද?
“මාගේ මව්ගේ පුත්‍රයෝ මට කෝප වූවෝය.ඔවුහු මා මිදිවතු බලන්නෙකු කළෝය.” ඇගේ සහෝදරයන් ඇය සමඟ කෝපයෙන් සිටින්නේ ඇය ආදරය කරන එඬේර තරුණයා ඔහුත් සමඟ ඇවිදින්න යෑමට ඇයට ආරාධනා කර තිබූ නිසයි. එය වැළැක්වීම සඳහා ඔවුන් “මිදි වතු පාළු කරන සිවලුන් හා කුඩා සිවලුන්” පලවාහරින්න කියා ඇයට පවසනවා. ඇය සලමොන්ගේ කඳවුර අසලට පැමිණෙන්නේ එසේ මිදි වත්ත බලාගන්න අතරේදීයි. ඇය “ගෙඩි ඇති උයනට” යන විට ඇගේ රූපශ්‍රීය දුටු රජ ඇයව කඳවුරට ගෙන්වා ගනියි.—සලමොන්ගේ ගීතිකාව 1:6; 2:10-15; 6:11.
මේ තරුණිය ඇගේ ප්‍රේමවන්තයාට තිබෙන ඇගේ ආදරය ගැන රජ මාලිගාවේ ස්ත්‍රීන්ට පැවසූ විට, ඔබ “රැළේ අඩිපාරේ ගොස්” ඔහුව සොයාගන්න කියා ඔවුන් ඇයට පවසයි. එහෙත් සලමොන් රජ ඇයට යන්න ඉඩ දෙන්නේ නැහැ. ඇගේ රූපශ්‍රීය ඔහු වර්ණනා කිරීමෙන් පසු ඇයට මෙසේ පොරොන්දු වෙයි. “රිදී පොහොට්ටු ඇති රන් මාලා” ඔබට සාදන්නෙමි. (පැරණි අනුවාදය) එහෙත් මේ තරුණියගේ සිත දිනාගන්න රජුට හැකි වන්නේ නැහැ. එඬේර තරුණයා සලමොන් රජුගේ කඳවුරට ඇවිත් ඇයව දැක මෙසේ පවසයි. “බලව, මාගේ ප්‍රේමවන්තිය, ඔබ රුව ඇත්තීය.” මේ තරුණිය රජ මාළිගාවේ ස්ත්‍රීන්ගෙන් මෙලෙස ඉල්ලා සිටියි. “ප්‍රේමය සතුටු වන තෙක් එය පුබුදුවන්ටවත් නැඟිටුවන්ටවත් එපා.”—සලමොන්ගේ ගීතිකාව 1:8-11, 15; 2:7; 3:5.
ශුද්ධ ලියවිල්ල ඇසුරෙන් ප්‍රශ්නෝත්තර:
1: 2, 3—එඬේර තරුණයා පවසන ආදර වදන් මිදි යුෂවලට හා සුවඳ විලවුන් හෙවත් තෙල්වලට සමාන කරන්නේ ඇයි? මිදි යුෂ සිත ප්‍රීත්මත් කරන අතර තෙල් හිස මත ගල්වන විට එයින් මහත් සුවයක් දැනෙනවා. මේ හා සමානව මේ තරුණයාගේ ආදරය හා නම මතක් වන විට තරුණියගේ සිතට මහත් ශක්තියක් මෙන්ම සැනසිල්ලක් ලැබෙයි. (ගීතාවලිය 23:5; 104:15) සැබෑ ක්‍රිස්තියානීන්, විශේෂයෙන්ම අභිෂේකලත් අය යේසුස් ඔවුන්ට පෙන්වා තිබෙන ප්‍රේමයෙන් ඔවුන් ශක්තියක් මෙන්ම දිරිගැන්වීමක්ද ලබනවා.
1:5—මේ ගැමි තරුණියගේ කලු පැහැති සම ‘කේදාර්හි කූඩාරම්වලට’ සමාන කරන්නේ ඇයි? පුරාණ කාලයේ එළුවන්ගේ ලොම්වලින් නිම කළ රෙදි විවිධ දේවල් සඳහා භාවිත කළා. (ගණන් කතාව 31:20) උදාහරණයක් හැටියට, ‘මණ්ඩපයට උඩින් තිබූ කූඩාරම’ සාදා තිබුණේ ‘එළු ලොමින් සෑදු තිරවලින්.’ (නික්මයාම 26:7) එදා කේදාර්හි තිබූ කූඩාරම්වලට සමාන කූඩාරම් අද පවා සමහර අරාබි රටවල කලු පැහැති එළු ලොම් භාවිත කරමින් සාදනු ලබනවා. මේ නිසයි ඇගේ කලු පැහැති සම ‘කේදාර්හි කූඩාරම්වලට’ සමාන කර තිබෙන්නේ.
1:15—එඬේර තරුණයා ඔහුගේ ප්‍රේමවන්තියගේ ‘ඇස් පරෙවියන්ගේ ඇස්වලට සමාන’ කරන්නේ ඇයි? ඔහු මෙසේ කරන්නේ ඇගේ ඇස්වලින් අහිංසක පෙනුමක් දිස්වන නිසයි.
2:7; 3:5—ෂූලම්මීය තරුණිය රජ මාලිගාවේ ස්ත්‍රීන්ගෙන් දිවුරුමක් ගනිද්දී ‘මුවදෙනුන්ගේ නමින්’ එසේ කරන්නේ ඇයි? මේ තරුණිය ඇගේ ප්‍රේමවන්තයාට දක්වන පිවිතුරු ආදරය අලංකාර, අහිංසක මුවදෙනුන්ට සමාන කරනවා. ඇය රජ මාලිගාවේ ස්ත්‍රීන්ගෙන් ඒ ආදරයේ නාමයෙන් ඉල්ලා සිටින්නේ වෙනත් කෙනෙක් කෙරෙහි ආදරයක් තමන් තුළ ඇති කරන්න එපා කියායි.
අපට ගත හැකි පාඩම්:
1:2; 2:6. විවාහ වීමට අපේක්ෂාවෙන් සිටින යුවළක් ඇසුරු කරන විට ආදර හැඟීම් පළ කිරීම වරදක් නෙවෙයි. කෙසේවෙතත් මෙම හැඟීම් අවංකව පළ කරන පිවිතුරු හැඟීම් විය යුතු අතර දුරාචාරයට මඟ පාදන රාගික හැඟීම් ඇති වන අයුරින් එසේ නොකිරීමට කල්පනාකාරී විය යුතුයි.—ගලාති 5:19.
1:6; 2:10-15. ෂූලම්මීය තරුණියගේ සහෝදරයන් ඇයට ඇගේ පෙම්වතා සමඟ කඳුකරයේ ඇවිදින්න යන්න අවසර දුන්නේ නැහැ. ඔවුන් එසේ කළේ ඇය නරක කෙනෙක් නිසාවත් ඇගේ චේතනා නරක නිසාවත් නෙවෙයි. එහෙත් ඔවුන් එසේ කළේ ඔවුන් දෙදෙනා හුදකලාවේ ඇසුරු කිරීමෙන් ඇය නුසුදුසු දෙයකට පෙලඹීමට ඉඩ තිබූ නිසයි. විවාහ වීමට අපේක්ෂාවෙන් ඇසුරු කරන අයට ගත හැකි පාඩම නම් කවුරුත් නැති තැන්වල ඇසුරු කිරීමෙන් වැළකී සිටි යුතු බවයි.
2:1-3, 8, 9. ෂූලම්මීය තරුණිය ලස්සන වුණත් ඇය නිහතමානි ලෙස තමන්ව සැලකුවේ “ෂාරොන්හි සෙව්වන්දි [සාමාන්‍ය] මලක්” ලෙසයි. ඇයගේ ලස්සන නිසත් ඇය යෙහෝවා දෙවිට විශ්වාසවන්තව සිටි නිසත් එඬේර තරුණයා ඇයව සැලකුවේ “කටු අතරේ මානෙල්” මලක් ලෙසයි. තරුණයාව විස්තර කරන්නේ කොහොමද? ඔහු කඩවසම් නිසා ඇය ඔහුව ‘මුව පැටියෙකුට’ සමාන කළා. ඔහුත් දේවබියැති ඇදහිලිවන්ත පුද්ගලයෙක්. ඔහු ගැන ඇය මෙසේ පවසනවා. “බැද්දේ ගස් අතරේ [සෙවණ සහ පලතුරු සපයන] ජම්බු ගස යම්සේද පුත්‍රයන් අතරේ මාගේ ප්‍රේමවන්තයා එසේය.” මෙයින් පැහැදිලි වන ආකාරයට විවාහ වීමට කෙනෙකු සොයන විට බැලිය යුත්තේ ඇදහිල්ල හා දේවභක්තිය වැනි ගුණාංග නොවෙයිද?
2:7; 3:5. මේ ගැමි තරුණියට සලමොන් රජු ගැන කිසිම ආදරයක් ඇති වුණේ නැහැ. ඇගේ ප්‍රේමවන්තයා හැර වෙන කිසිම කෙනෙක් කෙරෙහි ආදරයක් තමන් තුළ ඇති කරන්න එපා කියා ඇය රජ මාළිගාවේ ස්ත්‍රීන්ගෙන් ඉල්ලා සිටිනවා. ඕනෑම කෙනෙක් කෙරෙහි ආදරයක් ඇති කරගැනීම සුදුසු නැහැ. අවංක ආදරයක් එලෙස ඇති වන්නේ නැහැ. විවාහ වීමට කැමැත්තෙන් සිටින තනිකඩ ක්‍රිස්තියානියෙක් තෝරාගත යුත්තේ දෙවිට විශ්වාසවන්තව සේවය කරන කෙනෙකුව පමණයි.—1 කොරින්ති 7:39.
‘ෂූලම්මීය දෙස බලන්නේ කුමකටද?’
යෙරුසලමේ ස්ත්‍රීන් ‘දුම් ටැඹක් මෙන් වනයේ සිට එන්නේ’ කවුද කියා බැලීමට ගිය විට ඔවුන් දකින්නේ සලමොන් රජ ඔහුගේ පරිවාරක සමූහය කැටුව නගරයට ඇතුල් වෙන ආකාරයයි. (සලමොන්ගේ ගීතිකාව 3:6) රජු ෂූලම්මීය තරුණියවද රැගෙන එයි.
එඬේර තරුණයා ෂූලම්මීය තරුණිය පසුපසින් ගොස් ඇයව හමු වීමට මඟක් පදා ගනියි. ඔහු ඇයට තිබෙන නොසැලෙන ආදරය ගැන පැවසූ විට ඇය නගරයෙන් පිට වෙන්න තිබෙන ඇගේ ආශාව ගැන මෙසේ පැවසුවා. “දවාල සිසිල් වී සෙවණැලි දුරුව යන තෙක් ගන්ධරස කන්දටත් තුවරලා හෙලටත් යන්නෙමි.” ඇය තරුණයාට මෙසේ ආරාධනා කරයි.“මාගේ ප්‍රේමවන්තයා තමන් උයනට ඇවිත් අනර්ඝ පල [කන්න].” ඔහු එයට මෙසේ පිළිතුරු දෙයි. “මාගේ සහෝදරිය, මාගේ මනමාලිය, මාගේ උයනට ඇවිත් සිටිමි.” යෙරුසලමේ ස්ත්‍රීන් ඔවුන් දෙදෙනාට මෙසේ පවසනවා. “මිත්‍රයිනි, කන්න. ප්‍රිය ඇත්තෙනි, බොන්න. එසේය, බොහෝසෙයින් බොන්න.”—සලමොන්ගේ ගීතිකාව 4:6, 16; 5:1.
තරුණිය රජ මාලිගාවේ ස්ත්‍රීන්ට සිහිනයක් ගැන විස්තර කිරීමෙන් පසු, “මා ප්‍රේමයෙන් රෝගාතුරව සිටියි” කියා පවසයි. ඉන්පසු ඔවුන් “වෙන ප්‍රේමවන්තයෙකුට වඩා ඔබේ ප්‍රේමවන්තයාගේ උතුම්කම මොකක්ද?” කියා ඇගෙන් අසයි. ඇය ඊට මෙසේ පිළිතුරු දෙයි. “මාගේ ප්‍රේමවන්තයා සුදුය, රතුය. දසදහසක්දෙනා අතරෙන් උත්තමයාය.” (සලමොන්ගේ ගීතිකාව 5:2-10) සලමොන් ඇයව බොහෝ සේ වර්ණනා කළත් ඇය නිහතමානීව මෙසේ අසයි. ‘ෂූලම්මීය දෙස බලන්නේ කුමකටද?’ (සලමොන්ගේ ගීතිකාව 6:4-13) ඇගේ සිත දිනාගැනීමට මෙය කදිම අවස්ථාවක් කියා සිතූ සලමොන් ඇයව තව තවත් වර්ණනා කරයි. කෙසේවෙතත් මේ තරුණිය ඇගේ පෙම්වතාට දැක්වූ ආදරය වෙනස් වන්නේ නැහැ. අවසානයේදී සලමොන් ඇයට යන්න ඉඩ හරිනවා.
ශුද්ධ ලියවිල්ල ඇසුරෙන් ප්‍රශ්නෝත්තර:
4:1; 6:5—තරුණියගේ වරලස “කඳුකරයෙන් බැස එන එළු රංචුවකට” සමාන කරන්නේ ඇයි? මෙවැනි සමාන කිරීමක් කර තිබෙන්නේ ඇයට එළුවන්ගේ ලොම් මෙන් ඝනකමින් හා දීප්තිමත් පැහැයෙන් යුත් කෙස් කළඹක් තිබූ නිසයි.
4:11—ෂූලම්මීය තරුණියගේ ‘තොල්වලින් මී වදයක මෙන් පැණි වැගිරෙනවා’ කියාත් ඇගේ ‘දිව යට මී පැණි හා කිරි තිබෙනවා’ කියාත් පවසන්නේ ඇයි? මෙසේ පවසා තිබෙන්නේ ඇගේ මුවින් මිහිරි හා ප්‍රසන්න වදන් පිට වූ නිසයි.
5:12—“ඔහුගේ දෙනෙත් දිය පාරක් අසල කිරෙන් නාමින් සිටින පරෙවියන් මෙනි” (නව ලොව පරිවර්තනය, NW) කියා පවසා තිබෙන්නේ ඇයි? මෙහිදී තරුණිය සඳහන් කරන්නේ ඇගේ ප්‍රේමවන්තයාගේ ඇස් ගැනයි. මෙහිදී ඇය ඔහුගේ ඇස් සමාන කරනවා ඇත්තේ කිරිවල නාමින් සිටින අළු පාටට හුරු නිල්වන් පරවියන්ටයි.
5:14, 15—තරුණයාගේ පාද ‘සුදු ගල් ටැම්වලට [කණුවලට]’ සමාන කර තිබෙන්නේ ඇයි? තරුණිය එසේ කරන්නේ තරුණයාගේ පාද ශක්තිමත් හා අලංකාර නිසයි.
6:4—මෙහිදී තරුණියව “තිර්සා” නගරයට සමාන කරන්නේ ඇයි? කානාන් දේශයේ පිහිටි යෝෂුවා අත්පත් කරගත් මේ නගරය සලමොන්ගේ පාලන සමයෙන් පසු බිහි වූ ඊශ්‍රායෙලයේ දස ගෝත්‍ර රජයේ පළමුවන අගනුවර බවට පත් වුණා. (යෝෂුවා 12: 7, 24; 1 රාජාවලිය 16: 5, 6, 8, 15) මේ නගරය ඉතා අලංකාර නගරයක් වූ නිසා ඇයව එයට සමාන කරනවා විය හැකියි කියා එක් පොතක සඳහන් වෙනවා.
6:13—“මහනායිම්හි නැටුම” කියන්නේ කුමකටද? මහනායිම් කියන්නේ යොර්දාන් ගඟේ නැඟෙනහිර පැත්තේ පිහිටි නගරයකටයි. යබ්බොක් මිටියාවත පිහිටියේ ඒ අසලයි. (උත්පත්ති 32: 2, 22; 2 සාමුවෙල් 2: 29) මහනායිම්හි නැටුම කීමෙන් අදහස් කරන්නේ ඒ නගරයේ පැවැත්වූ යම් උත්සවකදී කරන ලද නැටුමක් විය හැකියි.
7:4—සලමොන් තරුණියගේ ගෙල ‘ඇත් දත් කොතකට’ සමාන කරන්නේ ඇයි? සලමොන් මීට කලින් වතාවකදී මේ තරුණියව වර්ණනා කරද්දී ‘ඔබේ බෙල්ල දාවිත්ගේ කොත මෙන්ය’ කියා පැවසුවා. (සලමොන්ගේ ගීතිකාව 4:4) සාමාන්‍යයෙන් කොතක් උසයි. ඒ වගේම එය සිහින්. ඇත් දත් සාමාන්‍යයෙන් සිනිඳුයි. මේ නිසයි සලමොන් මේ තරුණියගේ ප්‍රියකරු ගෙල එලෙස ඇත් දත් කොතකට සමාන කරන්නේ.
අපට ගත හැකි පාඩම්:
4:1-7. සලමොන් ඇගේ සිත දිනාගන්න හැකි සෑම උත්සාහයක්ම දැරූවා. මේ තරුණියද අනිත් අය මෙන් පාපය උරුම කරගෙන තිබුණත් ඇය සදාචාර ප්‍රමිති බාල කළේ නැහැ. මේ නිසා ඇගේ රූපශ්‍රිය තවත් ඔප්නැංවුණා. සැබෑ ක්‍රිස්තියානි කාන්තාවන්ට ඇය කදිම ආදර්ශයක්.
4:12. ෂූලම්මීය තරුණිය ආදරය කළේ ඇගේ අනාගත ස්වාමිපුරුෂයාට පමණයි. ඇගේ මේ ආදරය ගේට්ටුවකින් පමණක් ඇතුල් විය හැකි සේ වටේට කොටු කර තිබූ අලංකාර උයනකට සමාන කර තිබෙන්නේ ඒ නිසයි. අවිවාහක ක්‍රිස්තියානි පුරුෂයන්ට හා ස්ත්‍රීන්ට ඇය මොනතරම් කදිම ආදර්ශයක්ද!
“යෙහෝවාගෙන් වූ ඇවිළෙන ගින්නක්ය”
ෂූලම්මීය තරුණිය නැවත ගෙදර එනවා දුටු ඇගේ සහෝදරයන් මෙසේ පවසයි. “තමාගේ ප්‍රේමවන්තයාට හේත්තු වී වනයෙන් එන්නේ කවුද?” මීට කලින් වතාවකදී ඇගේ සහෝදරයෙක් මෙසේ පවසා තිබුණා.“ඇය බිත්තියක් නම් ඇය පිට රිදී කොතක් ගොඩනඟන්නෙමු. ඇය දොරක් නම් කිහිරි ලෑලිවලින් වටකරන්නෙමු.” මේ තරුණියට තිබෙන්නේ නොවෙනස්වන ආදරයක් බව දැන් තහවුරු වී තිබෙන නිසා ඇය මෙසේ පවසනවා. “මා පවුරකි. මාගේ පියයුරු එහි කොත් මෙනි. එවිට මම ඔහුගේ ඇස් හමුයෙහි සමාදානය ලත් කෙනෙකු මෙන් වීමි.”—සලමොන්ගේ ගීතිකාව 8:5, 9, 10.
සැබෑ ආදරය “යෙහෝවාගෙන් වූ ඇවිළෙන ගින්නක්ය” කියා පවසා තිබෙන්නේ ආදරය කියන ගුණාංගය ඇතිව දෙවි අපව මවා තිබෙන නිසයි. මේ ගින්න නිවා දැමිය නොහැකියි. තරුණයෙක් හා තරුණියක් අතර තිබෙන “ප්‍රේමය මරණය මෙන් බලවත්” විය හැකියි කියා සලමොන්ගේ ගීතිකාවේ විස්තර කර තිබෙනවා.—සලමොන්ගේ ගීතිකාව 8:6.
යේසුස් සහ ඔහුගේ ස්වර්ගීක “මනාලි” පංතියට අයත් වන අය අතර තිබෙන බැඳීම ගැනත් සලමොන්ගේ ගීතිකාවෙන් විස්තර කර තිබෙනවා. (එළිදරව් 21:2, 9) යේසුස් සහ මොවුන් අතර තිබෙන ප්‍රේමය ස්ත්‍රියක් හා පුරුෂයෙක් අතර තිබෙන ප්‍රේමයට වඩා ප්‍රබලයි. යේසුස් කෙරෙහි තිබෙන විශ්වාසය මොවුන් කිසිදාක පාවා දෙන්නේ නැහැ. යේසුස් තම ජීවිතය “වෙනත් බැටළුවන්” වෙනුවෙන්ද පූජා කළා. (යොහන් 10:16) එසේ නම් සියලුම ක්‍රිස්තියානීන්ද ෂූලම්මීය තරුණිය මෙන් නොසැලෙන ආදරයක් හා විශ්වාසයක් පෙන්වීමට අධිෂ්ඨාන කර ගත යුතුයි.
[18, 19වන පිටුවේ පින්තූරය]
සලමොන්ගේ ගීතිකාවෙන් පෙන්වා දෙන ආකාරයට විවාහ වීමට බලාපොරොත්තු වන කෙනෙක් තුළ තිබිය යුතු ගුණාංග මොනවාද?