දෙවිට ළං වෙන්න

“දෙවිව අනුකරණය කරන්න”

එෆීස 4:32–5:2

කරුණාව, දයානුකම්පාව, සමාව දීම, ප්‍රේමය වැනි ගුණාංග අද විදහාපෙන්වන්නේ ස්වල්පදෙනෙක් වීම කනගාටුවට කරුණක්. එම ගුණාංග විදහාපාන්න ඔබ කොතරම් උත්සාහ කළත් එය කිරීමට නොහැකි බව ඔබට හැඟී තිබෙනවාද? සමහරවිට කෙනෙක් අතීතයේදී මුහුණ දුන් කටුක අද්දැකීම් හෝ තමන් තුළ ඇති නරක පුරුදු නිසා තමාට යහපත් ගුණාංග වර්ධනය කරගන්න බැහැ කියා සිතන්න පුළුවන්. නමුත් අපට යහපත් ගුණාංග වර්ධනය කරගත හැකි බව අපේ නිර්මාතෘ හොඳින්ම දන්නවා කියා බයිබලයේ සඳහන් වෙනවා. එය දැන සිටීම සහනයක් නොවේද?

“එබැවින් ඔබ ප්‍රේමණීය දරුවන් වන බැවින් දෙවිව අනුකරණය කරන්නන් වන්න” කියා බයිබලයෙහි සඳහන් වෙනවා. (එෆීස 5:1) ඉන් පැහැදිලි වෙන්නේ තමන්ට නමස්කාර කරන අයට යහපත් ගුණාංග විදහා පෙන්වීමට ඇති හැකියාව ගැන දෙවිට කොතරම් විශ්වාසයක් තිබෙනවාද යන්නයි. එයට හේතුව යෙහෝවා දෙවි තමන්ගේ ගුණාංග විදහා පෙන්වීමේ හැකියාව ඇතුව මිනිසාව නිර්මාණය කර තිබීමයි. * (උත්පත්ති 1:26, 27) “දෙවිව අනුකරණය කරන්නන් වන්න” කියා බයිබලයෙහි සඳහන් වී තිබෙන දෙය හරියට යෙහෝවා දෙවි මෙලෙස කියනවා හා සමානයි. ‘ඕගොල්ලන් අතින් යම් අඩු පාඩු සිදු වුණත් මගේ ගුණාංග විදහා පෙන්වමින් මාව සතුටට පත් කරන්න ඕගොල්ලන්ට පුළුවන් බව මට විශ්වාසයි.’

එෆීස 5:1 ආරම්භ වන්නේ “එබැවින්” යන වචනයෙනුයි. ඉන් පෙනී යන්නේ එය ඊට කලින් සඳහන්ව ඇති බයිබල් පදයට එනම් එෆීස 4:32ට සම්බන්ධ බවයි. එහි අපට අනුකරණය කළ හැකි දෙවිගේ ගුණාංග කිහිපයක් සඳහන් වෙනවා. ඒවා නම් කරුණාව, දයානුකම්පාව සහ සමාව දීමයි. දෙවිව අනුකරණය කිරීමට කැමති සියලුදෙනාම අන් අය කෙරෙහි සැබෑ ප්‍රේමයක් දැක්විය යුතු බව එෆීස 5:2හි සඳහන් වෙනවා. කරුණාව පෙන්වීම, දයානුකම්පාව දැක්වීම හා අන් අයට සමාව දීම සම්බන්ධයෙන් අපට හොඳම ආදර්ශය තබා ඇත්තේ යෙහෝවා දෙවියි.

අපි දෙවිව අනුකරණය කළ යුත්තේ ඇයි? ඉහත සලකා බැලූ බයිබල් පදයේ සඳහන් වුණේ “ප්‍රේමණීය දරුවන් වන බැවින් දෙවිව අනුකරණය කරන්නන් වන්න” කියායි. යෙහෝවා දෙවි තමාට නමස්කාර කරන අයව සලකන්නේ තමාගේම දරුවන් හැටියටයි. කුඩා පිරිමි දරුවෙක් තමන්ගේ පියාව අනුකරණය කිරීමට උත්සාහ කරනවා හා සමානව සැබෑ ක්‍රිස්තියානීන්ද උත්සාහ කරන්නේ යෙහෝවා දෙවිව අනුකරණය කිරීමටයි.

තමන්ව අනුකරණය කරන්න කියා යෙහෝවා දෙවි කිසි කෙනෙකුට බල කරන්නේ නැහැ. එය ඔබේ පෞද්ගලික තීරණයක්. (ද්විතීය කතාව 30:19, 20) කොහොමවුණත් ඔබට දෙවිගේ ගුණාංග විදහා පෙන්වීමේ හැකියාව තිබෙන බව අමතක කරන්න එපා. දෙවිව අනුකරණය කිරීමට නම් ඔහුව හොඳින් දැන හඳුනාගත යුතුයි. දෙවි ගැනත් ඔහුගේ කදිම ගුණාංග ගැනත් ඉගෙනගෙන ඔහුව අනුකරණය කිරීමට මිලියන ගණනකට ශුද්ධ බයිබලය උපකාරවත් වී තිබෙනවා. එය ඔබටත් උපකාරවත් වන බවට සැකයක් නැහැ.

[පාදසටහන]