නාමය පිටුපස ඇති අරුත

ඉතියෝපියානු කාන්තාවක් දරුවෙකු බිහි කළා. එය ඉතා ප්‍රීතිමත් අවස්ථාවක් වුණත් ඒ දරුවා සිහිසුන්ව සිටි නිසා ඒ ප්‍රීතිය දුකකට පෙරළුණා. නමුත් දරුවාගේ ආච්චි දරුවාව අතට ගත් විට දරුවා එක පාරටම හුස්මගෙන අඬන්න පටන්ගත්තා. මේ දරුවාගේ පියාගේ නමේ අර්ථය “ආශ්චර්යය” යන්නයි. පියාගේ නම සම්බන්ධ කර ඔවුන් මේ අලුත උපන් දරුවාට නමක් තැබුවා. එම නමට තිබුණේ “ආශ්චර්යයක් සිදු වී ඇත” යන අර්ථයයි.

බුරුන්ඩි රටේ පුද්ගලයෙක් හමුදා සෙබළුන්ගෙන් තම දිවි රැකගැනීම සඳහා පලා ගොස් සැඟ වී සිටියා. ඒ අවස්ථාවේදී ඔහු දෙවිට යාච්ඤා කර පැවසුවේ දෙවි තමාව ආරක්ෂා කළොත් තමාට උපදින මුල් දරුවාට ‘මානිරාකිසා’ යන නම තබන බවයි. එහි අර්ථය “දෙවි ගැලවුම්කරු”යන්නයි. ඒ සිදුවීමෙන් අවුරුදු පහකට පසු ඔහුට දරුවෙක් ලැබුණා. ඔහු එම දරුවාට ‘මානිරාකිසා’ යන නම තැබුවා.

දරුවන්ට විවිධ අර්ථ ඇති නම් තැබීම පුරාණයේ සිටම පැවත එන්නක්. එවැනි විවිධ අර්ථ ඇති නම් රැසක් බයිබලයේ පවා සඳහන් වෙනවා. එවැනි නම් සහ ඒවායේ අර්ථය ගැන සලකා බැලීමෙන් අපගේ බයිබල් කියවීම තවත් අර්ථවත් ආකාරයෙන් කළ හැකියි. දැන් අපි එවැනි නම් කිහිපයක් ගැන සලකා බලමු.

පැරණි ගිවිසුමේ ඇති අර්ථවත් නම්

බයිබලයේ මුලින්ම සඳහන් වී තිබෙන නම් අතරට ‘සෙත්ගේ’ නමත් ඇතුළත්. සෙත් යන නමේ අර්ථය “පත් කරන ලද” යන්නයි. සෙත්ගේ මව වූ ඒව ඔහුට එවැනි නමක් දැමීමට හේතුව මෙසේ විස්තර කළා. “කායින් ආබෙල්ව මැරූ නිසා ආබෙල් වෙනුවට දෙවි මට තවත් පුත්‍රයෙක්ව දුන්නා.” (උත්පත්ති 4:25, නව ලොව පරිවර්තනය, NW) සෙත්ගෙන් පැවතෙන්නෙක් වූ ලාමෙක් ඔහුගේ දරුවාට “විවේකය” හෝ “සැනසීම” යන අර්ථය ඇති ‘නෝවා’ යන නම තැබුවා. එම නම දැමීමට හේතුව ඔහු විස්තර කළේ මෙසේයි. “යෙහෝවා දෙවි භූමියට ශාප කළ නිසා අපි අද වන තුරුත් දුක් මහන්සි වෙලා වැඩ කරනවා. සමහරවිට මේ දරුවාගෙන්වත් අපිට සහනයක් ලැබේවි.”—උත්පත්ති 5:29, NW.

අනාගතයේදී සිදු වීමට යන දේවල් කල් ඇතුව දැනුම් දීම සඳහාත් යෙහෝවා දෙවි පුද්ගලයන්ගේ නම් වෙනස් කළා. උදාහරණයකට “උසස් කරනු ලැබූවන්ගේ පියා” යන අර්ථය තිබූ ‘ආබ්‍රම්’ ගැන සලකා බලන්න. දෙවි ඔහුගේ නම වෙනස් කර “සමූහයකගේ පියා” යන අර්ථය ඇති ‘ආබ්‍රහම්’ යන නම ඔහුට තැබුවා. එහි අර්ථයට අනුව ආබ්‍රහම්ට ජාතීන්ගේ පියෙකු වීමට අවස්ථාව ලැබුණා. (උත්පත්ති 17:5, 6) එමෙන්ම ආබ්‍රහම්ගේ භාර්යාව වූ සාරයිගේ නමත් දෙවි වෙනස් කළා. ‘සාරයි’ යන නමේ අර්ථය “විවාදශීලී” යන්නයි. නමුත් “කුමාරිකාව” යන අර්ථය ඇති “සාරා” යන නම දෙවි ඇයට ලබා දුන්නා. දෙවි මෙයින් පෙන්නුම් කළේ ඇය රජවරුන්ගේ මුතුන්මිත්තනියක් වන බවයි. ඒ ගැන ඇය කොතරම් සතුටු වන්න ඇද්ද!—උත්පත්ති 17:15, 16.

ඇතැම් අවස්ථාවලදී දරුවන්ට දැමිය යුත්තේ කුමන නම්ද කියා දෙවි තීරණය කළා. ආබ්‍රහම්ගේ සහ සාරාගේ පුතාට ‘ඊසාක්’ යන නම තබන්න කියා දෙවි ඔවුන්ට පැවසුවා. එහි අර්ථය “සිනහව” යන්නයි. දෙවි එවැනි අර්ථයක් ඇති නමක් දරුවාට තබන්න කියා පැවසුවේ මහලු වියේ සිටි ආබ්‍රහම්ට සහ සාරාට දරුවෙක් උපදින්න යන බව දෙවි පැවසූ විට ඔවුන් සිනාසුණ නිසයි. අබ්‍රහම් සහ සාරා ඊසාක්ට එම නමින් ආමන්ත්‍රණය කරද්දී ඔවුන්ට ඒ සිද්ධිය මතකයට නැඟෙන්න ඇති.—උත්පත්ති 17:17, 19; 18:12, 15; 21:6.

 ඊසාක්ගේ ලේලිය වූ රාකෙල් ඇගේ දරුවාට තැබුවේ වෙනස් අර්ථයක් ඇති නමක්. දරුවාව බිහි කරන අවස්ථාවේදී රාකෙල් දරාගත නොහැකි ප්‍රසව වේදනාවකට පත් වී මිය ගියා. මිය යන්න කලින් ඒ දරුවාට දැමිය යුත්තේ ‘බෙන්-ඕනි’ යන නම බව රාකෙල් පවසා තිබුණා. එහි අර්ථය “මැරෙන මොහොතේ බිහි කළ පුත්‍රයා” යන්නයි. නමුත් පසුව මේ දරුවාගේ පියා වූ යාකොබ් එම නම ‘බෙන්ජමින්’ ලෙස වෙනස් කළා. ඊට තිබුණේ “දකුණතේ පුත්‍රයා” යන අර්ථයයි. එයින් විශේෂ අනුග්‍රහයක් මෙන්ම සහයෝගයක් තිබෙන බව අදහස් වෙනවා.—උත්පත්ති 35:16-19; 44:20.

දරුවන්ට නම් තැබීමේදී දෙමාපියන් ඔවුන්ගේ ශාරීරික ලක්ෂණ සැලකිල්ලට ගත් අවස්ථාද තිබුණා. උදාහරණයකට ඊසාක්ගේ සහ රෙබෙකාගේ නිවුන් දරුවන්ගෙන් වැඩිමලාට ඔවුන් තැබුවේ ‘ඒසව්’ යන නමයි. එහි අර්ථය “රෝමවලින් වැසුණු” යන්නයි. ඔවුන් එවැනි නමක් එම දරුවාට තැබුවේ ඒ දරුවා උපදින විට ලොම්වලින් සෑදූ වස්ත්‍රයක් ඇඳ සිටින්නාක් මෙන් ඔහුගේ ඇඟ පුරාම රතු රෝම තිබුණු නිසයි. (උත්පත්ති 25:25) තවත් උදාහරණයක් සලකා බලන්න. බයිබලයේ රූත් පොතේ සඳහන් වන ආකාරයට නයෝමිට පුතුන් දෙදෙනෙක් සිටියා. ඉන් එක් පුතෙකුට ඇය තැබුවේ “නිතරම ලෙඩ වෙන්නා” හෝ “රෝගියා” යන අර්ථය ඇති ‘මාලන්’ යන නමයි. අනික් පුතාට ඇය තැබුවේ “දුර්වල” යන අර්ථය ඇති ‘කිලියොන්’ යන නාමයයි. නයෝමි ඇගේ දරුවන්ට එවැනි නම් තැබුවේ ඔවුන් ඉපදුණ අවස්ථාවේදීද නැත්නම් පසු කාලයකදීද කියා බයිබලයේ සඳහන් වෙන්නේ නැහැ. කෙසේනමුත් තරුණ වියේදීම ඇගේ දරුවන් මිය යෑමෙන් පෙනී යන්නේ එම නම් ඔවුන්ට හොඳින් ගැළපුණ බවයි.—රූත් 1:5

අතීතයේදී සමහරුන් තමන්ගේ නම් වෙනස් කරගැනීමටත් පුරුදු වී සිටියා. තම පුතුන් දෙදෙනාගේත් සැමියාගේත් මරණයෙන් කලකිරීමට පත් වූ නයෝමි ඇගේ ගම වූ බෙත්ලෙහෙමට පැමිණි විට ‘මට නයොමි කියලා කියන්න එපා. සියලු බලැති දෙවි මාව අත්හැරලා. ඒ හින්දා මට මාරා [“තිත්ත”] කියලා කතා කරන්න’ කියා පැවසුවා.—රූත් 1:20, 21, NW.

දරුවන් ඉපදුණු දවසේ සිදු වූ යම් විශේෂිත සිදුවීමක් හෝ උත්සවයක් මුල් කරගෙන දරුවන්ට නම් තැබීමත් අතීතයේ පැවති සිරිතක් වුණා. උදාහරණයකට අනාගතවක්තෘ හග්ගයිගේ නමේ තේරුම වන්නේ “උත්සව දවසක උපත ලැබූ” යන්නයි. *

අලුත් ගිවිසුමේ ඇති අර්ථවත් නම්

යේසුස්ගේ නමට තිබෙන්නේ ඉතා සුවිශේෂී අර්ථයක්. යේසුස් උපදින්න පෙර දෙවි දේවදූතයෙක් මාර්ගයෙන් මරියාට සහ යෝසෙප්ට පැවසුවේ “ඔහුට යේසුස් යන නම තැබිය යුතු” බවයි. එහි අර්ථය වන්නේ “යෙහෝවා දෙවි දෙන ගැලවීම” යන්නයි. එම නම දැමීමට හේතුව කුමක්ද කියා එම දේවදූතයා මෙසේ පැහැදිලි කළා. “ඔහු තම ජනයාව ඔවුන්ගේ පාපවලින් ගලවාගන්නේය.” (මතෙව් 1:21) යේසුස් බව්තීස්ම වූ පසුව දෙවි ඔහුට තම බලය ලබා දුන්නා.  ඒ අවස්ථාවේ සිට ඔහුව “මෙසියස්” ලෙසත් හඳුන්වනු ලැබුවා. ග්‍රීක භාෂාවෙන් එය පරිවර්තනය වන්නේ “ක්‍රිස්තුස්” ලෙසයි. මෙම යෙදුම් දෙකේම අර්ථය වන්නේ “අභිෂේක ලත් තැනැත්තා” යන්නයි.—මතෙව් 2:4.

සමහර අවස්ථාවලදී යේසුස් තම ගෝලයන්ගේ පෞද්ගලිකත්වය සැලකිල්ලට ගෙන ඔවුන්ට ගැළපෙන නම් තැබුවා. උදාහරණයකට ‘සීමොන්ට’ “පර්වතය” යන අර්ථය ඇති ‘සීෆස්’ යන නාමය තැබුවා. ‘සීෆස්’ යන නම ග්‍රීක භාෂාවෙන් පරිවර්තනය වෙන්නේ ‘පේතෘස්’ ලෙසයි. පසු කාලයකදී සීෆස්ව වැඩියෙන්ම හැඳින්වූයේ පේතෘස් යන නාමයෙනුයි. (යොහන් 1:42) යේසුස් තමන් සමඟ උද්‍යෝගයෙන් සේවය කළ යාකොබ්ට සහ ඔහුගේ සහෝදරයා වූ යොහන්ට “බොවනර්ගේස්” යන නම තැබුවා. ඊට තිබෙන්නේ “ගර්ජනාවේ පුත්‍රයෝ” යන අර්ථයයි.—මාක් 3:16, 17.

යේසුස්ගේ ගෝලයන්ද සෙසු අයගේ පෞද්ගලිකත්වයට ගැළපෙන නම් දැමීමට පුරුදුව සිටියා. එවැනි නමක් ලැබුණු ගෝලයෙකු ලෙස යෝසෙප්ව හැඳින්විය හැකියි. ඔහුට “සැනසිල්ලේ පුත්‍රයා” යන අර්ථය ඇති ‘බානබස්’ යන නම තැබුවා. බානබස් සෙසු ක්‍රිස්තියානීන්ව සැනසවීම සහ දිරිගැන්වීම අතින් නම් දරා සිටි කෙනෙක්. ඒ නිසා ඔහු තමාගේ නාමයේ අර්ථයට එකඟව ජීවත් වුණා කියා පැවසිය හැකියි.—ක්‍රියා 4:34-37; 9:27; 15:25, 26

ඔබට තිබෙන්නේ කෙබඳු නාමයක්ද?

අපිට උපතින් ලැබෙන නාමය තීරණය කළේ අපි නොවෙයි. කෙසේනමුත් මම මොන වගේ කෙනෙක් වෙනවාද කියන එක තීරණය වන්නේ මගේ හැසිරීම මතයි. (හිතෝපදේශ 20:11) ඒ නිසා අපි අපෙන්ම මෙසේ අසාගනිමු. ‘මට නමක් දැමීමට යේසුස්ට සහ ඔහුගේ ගෝලයන්ට අවස්ථාවක් ලැබුණා නම් මගේ පෞද්ගලිකත්වය සහ ගතිගුණ සැලකිල්ලට ගෙන ඔවුන් මට මොන වගේ නමක් තබයිද?’

එම ප්‍රශ්නය ඇත්තෙන්ම ඉතා වැදගත්. ඊට හේතුව “වස්තු සම්භාරයක් තිබීමට වඩා වටින්නේ හොඳ නමක් ඇතුව සිටීම” බව බයිබලයේ සඳහන් වී තිබීමයි. (හිතෝපදේශ 22:1, NW) අපිට සමාජයේ හොඳ නමක් තිබෙනවා නම් එයින් යම් ප්‍රයෝජන ලැබෙනවා. නමුත් අපට දෙවි ඉදිරියේ හොඳ නමක් තිබෙනවා නම් දැනුත් සදාකාලයටත් අපි මහත් ප්‍රයෝජන අද්දකිනවා. එසේ පවසන්නේ ඇයි? දෙවි පොරොන්දු වී තිබෙන්නේ ඔහුට කීකරුව ජීවත් වන අයගේ නම් ඔහු තමාගේ මතකය නමැති පොතේ නොමැකෙන සේ සටහන් කරගන්නා බවයි. එවැනි අයට සදාකාලයටම ජීවත් වීමේ ප්‍රස්තාව දෙවි ලබා දෙනවා.—මලාකි 3:16; එළිදරව් 3:5; 20:12-15.

[පාදසටහන]

[15වන පිටුවේ වාක්‍ය කණ්ඩය]

මගේ පෞද්ගලිකත්වය සහ ගතිගුණ විස්තර කිරීමට උචිත නම කුමක්ද?

[14වන පිටුවේ කොටුව/පින්තූරය]

එම්මානුවෙල්

බයිබලයේ සඳහන් සමහර නම්වලට තිබුණේ අනාවැකිමය අර්ථයක්. පුද්ගලයෙක් අනාගතයේදී කිරීමට නියමිත දේවල් ගැන එයින් යම් ඉඟියක් ලබා දුන්නා. යෙහෝවා දෙවි අනාගතවක්තෘ යෙසායාට මෙවැනි දෙයක් වාර්තා කිරීමට මඟ පෙන්වූවා. “තරුණිය ගැබ්ගෙන පුතෙකු බිහි කරයි. ඇය ඔහුට එම්මානුවෙල් යන නම තබනු ඇත.” (යෙසායා 7:14, NW) එම්මානුවෙල් යන නමේ අර්ථය වන්නේ “දෙවි අප සමඟය” යන්නයි. එම්මානුවෙල් ගැන සඳහන් එම අනාවැකිය අදාළ වෙන්නේ ඊශ්‍රායෙල් රජෙකුට හෝ යෙසායාගේ පුතෙකුට කියා පෙන්වීමට බයිබල් විචාරකයන් උත්සාහ කර තිබෙනවා. නමුත් බයිබල් ලේඛකයෙකු වූ මතෙව් පවසන්නේ එම්මානුවෙල් ගැන සඳහන් අනාවැකිය යේසුස් ක්‍රිස්තුස්ට පමණක් අදාළ වූ බවයි.—මතෙව් 1:22, 23.

තවත් සමහර අය කියා සිටින්නේ එම්මානුවෙල් යන නම යේසුස්ට අදාළ කිරීමෙන් යේසුස් සියලු බලැති දෙවි බව බයිබලයේ පෙන්නුම් කරනවා කියායි. නමුත් එය නිවැරදි තර්කයක් නොවෙයි. උදාහරණයකට බයිබලයේ සඳහන් තරුණ එලීහුගේ නමේ අර්ථය වුණේ “මගේ දෙවි ඔහු” යන්නයි. එසේනම් එලීහුත් දෙවිට සමානයි කියා පැවසිය හැකිද?

යේසුස් කිසි දිනක තමා සියලු බලැති දෙවි කියා පැවසුවේ නැහැ. (යොහන් 14:28; ෆිලිප්පි 2:5, 6) නමුත් ඔහු දෙවිගේ ගතිගුණ හොඳින් විදහා පෙන්වූ අතර ගැලවුම්කරු සම්බන්ධව දෙවි පැවසූ දේවල්ද ඔහු ඉටු කළා. (යොහන් 14:9; 2 කොරින්ති 1:20) ගැලවුම්කරු හැටියටත් දාවිත්ගේ පෙළපතින් පැමිණෙන තැනැත්තා හැටියටත් යේසුස් කිරීමට යන කාර්යභාරය එම්මානුවෙල් යන නාමයෙන් මනාව විස්තර වෙනවා. එමෙන්ම දෙවි තම නමස්කාරකයන් සමඟ සිටින බවත් එයින් මතක් කර දෙනවා.

[පින්තූරය]

එම්මානුවෙල් “දෙවි අප සමඟය”

[15වන පිටුවේ කොටුව/පින්තූරය]

ශ්‍රේෂ්ඨතම නාමය

යෙහෝවා දෙවිගේ නාමය ශුද්ධ බයිබලයේ 7,000 වතාවක් පමණ සඳහන් වී තිබෙනවා. මුල් හෙබ්‍රෙව් භාෂාවෙන් දෙවිගේ නාමය ලිවීමට අක්ෂර සතරක් යොදාගත්තා. (יהוה) දෙවිගේ නාමයේ ඇති විශේෂත්වය කුමක්ද? අතීතයේ සිටි දෙවිගේ සේවකයෙක් වූ මෝසෙස් එක් අවස්ථාවකදී දෙවිගේ නාමය ගැන දෙවිගෙන්ම විමසුවා. එවිට දෙවි ඔහුට තමාගේ නාමය ගැන පැවසුවේ මා “කැමති දේ ඉටු කළ හැකි තැනැත්තාණන්” කියායි. (නික්මයාම 3:14, NW) එයින් පැහැදිලි වෙන්නේ යෙහෝවා දෙවි යම් පොරොන්දුවක් දී තිබෙනවා නම් එය ඉටු කිරීමට ඔහුට හැකියාව තිබෙන බවයි. (යෙසායා 55:8-11) ඒ නිසා යෙහෝවා දෙවි දී තිබෙන පොරොන්දු ඔහු අනිවාර්යයෙන්ම ඉටු කරන බවට අපට නිසැක විය හැකියි.

[13වන පිටුවේ පින්තූරය]

ආබ්‍රහම් “සමූහයකගේ පියා”

[13වන පිටුවේ පින්තූරය]

සාරා “කුමාරිකාව”