පාඨකයන් අසයි

ගෙහෙන්නාව කියන්නේ අපායටද?

▪ ගෙහෙන්නාව ගැන යේසුස් තම ගෝලයන්ට කළ අනතුරු ඇඟවීම් බයිබලයේ සඳහන් වෙනවා. ඔහු ගෙහෙන්නාව කියා යොමු දැක්වූයේ සදහටම ගින්නෙන් පිලිස්සී වධ විඳින අපායකටද?—මතෙව් 5:22.

එය තේරුම්ගැනීම සඳහා අපි මුලින්ම ගෙහෙන්නා යන වචනයේ අර්ථය දැනගනිමු. එම වචනය සෑදී තිබෙන්නේ ගෙහින්නොම් යන හෙබ්‍රෙව් වචනයෙනුයි. එහි අර්ථය “හින්නොම් නිම්නය” යන්නයි. එය “හින්නොම් පුත්‍රයන්ගේ නිම්නය” ලෙසත් හඳුන්වනවා. (යොෂුවා 15:8; 2 රාජාවලිය 23:10) වර්තමානයේ එම ස්ථානය හඳුන්වන්නේ ‘වාඩි ඒර් අබාබි’ ලෙසයි. එය යෙරුසලමේ දකුණු නිරිතදිගින් පිහිටා ඇති ගැඹුරු පටු නිම්නයක්.

ක්‍රිස්තු පූර්ව අටවන සියවසේ එනම් යූදා රජවරුන්ගේ පාලන සමයේ බොරු දෙවිවරුන්ට කළ නමස්කාර චාරිත්‍රයක් ලෙස දරුවන්ව හින්නොම් නිම්නයේදී ගින්නෙන් පූජා කළා. (2 ලේකම් 28:1-3; 33:1-6) පසු කාලයකදී අනාගතවක්තෘ යෙරෙමියා අනාවැකියක් පළ කරමින් පැවසුවේ දෙවිට විරුද්ධව කටයුතු කිරීම නිසා බැබිලෝනිවරුන් අතින් විනාශයට පත් වන යුදෙව්වන්ගේ මළ සිරුරු එම නිම්නයේම ගොඩගසනු ලබන බවයි. *—යෙරෙමියා 7:30-33; 19:6, 7.

යුදෙව් විශාරදයෙක් වන ඩේවිඩ් කිම්කෙ (ක්‍රි.ව. 1160-1235) පැවසූ ලෙස පසු කාලයේදී හින්නොම් නිම්නය යොදාගත්තේ යෙරුසලම් නගරයේ කැළි කසළ පිලිස්සීම සඳහායි. එම ස්ථානයේ තිබුණු ගින්දර දිගටම දැල්වුණු නිසා එයට යම් දෙයක් විසි කළ විට එය සම්පූර්ණයෙන්ම දැවී අළු වී ගියා.

නමුත් සමහර බයිබල් පරිවර්තනවල ගෙහෙන්නා යන වචනය පරිවර්තනය කර තිබෙන්නේ “නිරාගින්න” (අපාය) ලෙසයි. (මතෙව් 5:22, පැරණි අනුවාදය) ඊට හේතුව කුමක්ද? මිය ගිය දුෂ්ටයන් සදහටම අපායක වධ වේදනා විඳිනවා යන මිථ්‍යා ආගමික විශ්වාසය ඔවුන් යෙරුසලම් නගරයෙන් එපිට තිබූ ගෙහෙන්නාව නමැති ස්ථානයට සම්බන්ධ කිරීම ඊට හේතුවයි. නමුත් යේසුස් ගෙහෙන්නාව යන වචනය යොදාගත්තේ වධ විඳින ස්ථානයක් විස්තර කිරීමට නොවෙයි.

මිනිසුන්ව ගින්නෙන් පුලුස්සමින් වධ දීම යෙහෝවා දෙවිට ඉතා පිළිකුල්සහගත දෙයක් බව යේසුස් හොඳින්ම දැන සිටියා. යෙරෙමියා මාර්ගයෙන් යෙහෝවා දෙවි පැවසූ මේ වදන්වලින් එය හොඳින්ම පැහැදිලි වෙනවා. “තම දූදරුවන්ව ගින්නෙන් දැවීම සඳහා ඔවුහු බෙන්හින්නොම් නිම්නයේ පිහිටි තෝෆෙත් නම් ස්ථානයේ පූජාසන ගොඩනැඟුවෝය. එවැනි දෙයක් කරන ලෙස මම ඔවුන්ට අණ කළේ නැත. එවැනි දෙයක් කිරීමේ අදහසක්වත් මාගේ සිතට පහළ වුණේ නැත.” (යෙරෙමියා 7:31) ඇත්තෙන්ම ප්‍රේමණීය දෙවි කෙනෙක් ලෙස යෙහෝවා දෙවි මිනිසුන්ව අපායකට දමා වධ වේදනා විඳීමට සලස්වයි කියා සිතීමට කිසිම පදනමක් නැහැ. එමෙන්ම මිය ගිය අය “කිසිවක් දන්නේ නැත” කියා බයිබලයේ සඳහන් වන නිසා පව්කාරයන් අපායක දුක් විඳින බව පැවසිය නොහැකියි.—දේශනාකාරයා 9:5, 10.

ඒ අනුව යේසුස් ගෙහෙන්නාව යන වචනය යොදාගත්තේ වධ විඳින ස්ථානයක් විස්තර කිරීමට නොව යෙහෝවා දෙවිගේ විනිශ්චයට ලක් වී සදහටම විනාශ වී යන අයව විස්තර කිරීමටයි. “ගෙහෙන්නා” යන වචනයෙත් බයිබලයේ සඳහන් “ගිනිවිල” යන වචනයෙත් අර්ථය එක හා සමානයි. ඒ දෙකෙන්ම සංකේතවත් කරන්නේ නැවත නැඟිටීමක් නොමැතිව සදහටම විනාශ වී යෑමයි.—ලූක් 12:4, 5; එළිදරව් 20:14, 15.

[පාදසටහන]