සවස අඳුර වැටීගෙන එත්ම කමතේ වැඩ කරමින් සිටි අය එක්කෙනා දෙන්නා තම තමන්ගේ නිවෙස් බලා යෑමට සූදානම් වෙනවා. නමුත් රූත් තවමත් වැඩ නතර කරන පාටක් පේන්න නැහැ. දවස පුරා එකතු කරගත් බාර්ලි කරල් ළඟට වෙලා ඇය තවමත් කෝටුවකින් තළ තළ කරල්වලින් ඇට වෙන් කරගන්නවා. ඇගේ මුළු ගතම දහඩියෙන් නැහැවිලා. කොතරම් වෙහෙසකර දවසක් වුණත් ඇය සිටින්නේ සතුටින්.

මේ තරුණ වැන්දඹුව තම නැන්දණියව බලාගැනීමේ වගකීමත් කැමැත්තෙන්ම කරට අරන්. ඇය මේ තරම් වෙහෙසෙන්නේ ඒ නිසයි. මෝවබ් ජාතික ස්ත්‍රියක් වුණත් යෙහෝවා දෙවි මොන තරම් ප්‍රේමණීය කෙනෙක්ද කියා ඇය දැන් තේරුම්ගෙන තිබෙනවා. විදේශිකයන් ඇතුළු ඊශ්‍රායෙල් දේශයේ සිටි දිලිඳුන් වෙනුවෙන් දෙවි සපයා තිබෙන සැලැස්ම නිසා ඇයත් දැන් ප්‍රයෝජන ලබනවා. * ඒ විතරක් නෙවෙයි දෙවිගේ සෙනඟ දෙවිට මොන තරම් කීකරුද කියාත් අන් අයට මොන තරම් කාරුණිකව සලකනවාද කියාත් ඇය අද්දැක්කා.

බෝවස් කියන්නෙත් එවැනි කෙනෙක්. වත්පොහොසත් වැඩිහිටියෙක් වූ ඔහුට අයිති කෙතේ තමයි රූත් මේ වැඩ කරන්නේ. ඇය තම නැන්දණිය වන නායොමිව රැක බලාගනිමින් සැබෑ දෙවිට නමස්කාර කිරීමට ගත් තීරණය ගැන බෝවස් ඇයව බෙහෙවින් අගය කළා. ඔහු ඇයට සැලකුවේ පියෙක් ලෙසයි. ටික වෙලාවකට කලින් ඔහු තමන්ව අගය කළ අයුරු මතකයට නැඟුණු රූත්ගේ මුවඟට නැඟුණේ අහිංසක සිනහවක්.—රූත් 2:11-13.

ඒ කොහොමවුණත් අනාගතය ගැන සිතන විට ඇගේ සිතේ දහසකුත් ප්‍රශ්න මතු වෙන්න ඇති. සැමියෙක්වත් දරුමල්ලෙක්වත් නොමැතිව අසරණව සිටින ඇයට තම නැන්දණියව බලාගැනීමට හැකිවෙයිද කියාත් වයසට ගියාම කවුද මාව බලාගන්නේ කියාත් ඇයට සිතෙන්න ඇති. කරල් ඇහිඳීමට දෙවි දී තිබෙන සැලැස්මෙන් පමණක් ඒ සියල්ල කිරීමට හැකි වෙයිද කියාත් ඇය සිතන්න ඇති. ඇය මේ ප්‍රශ්නත් එක්ක අනාගතයට කොහොම මුහුණ දෙයිද? ඇගේ ආදර්ශය අද දිනත් ආර්ථික ප්‍රශ්නවලට මුහුණ දෙන අයට බෙහෙවින් ප්‍රයෝජනවත් වේවි.

රූත් දවස පුරා දැරූ වෙහෙස අපතේ ගියේ නැහැ. සියල්ල එකතු කර බලද්දී එතන සුද්ද කරගත්  බාර්ලි ඒපාවක් තිබුණා. (ඒපාවක් කියන්නේ ලීටර් 22ක් දැමිය හැකි මිනුම් භාජනයක්.) කිලෝ 14ක පමණ බරකින් යුත් ඒ බාර්ලි තොගය රෙද්දක ඔතාගත් ඇය එය හිසේ තබාගෙන නිවස බලා පිටත් වෙද්දී දසත ගොම්මන් අඳුර පැතිරෙමින් තිබුණා.—රූත් 2:17.

රූත් ගෙනා එම බාර්ලි තොගය දැකීමෙන් නායොමි පුදුම වුණා. බෝවස් සේවකයන්ට දුන් කෑමවලින් කොටසකුත් ඇය අරන් ඇවිත්. තම ලේලිය තමන්ට මොන තරම් ආදරෙයිද කියා ඇයට සිතුණා. දෙදෙනාම සතුටින් කෑම කන අතරතුරේදී නායොමි, රූත්ගෙන් මෙහෙම ඇහුවා. “අද කරල් ඇහින්දේ කොහෙද? අද දුව වැඩ කළේ කාගේ කෙතේද? දුවට හොඳින් සැලකූ තැනැත්තාට ආශීර්වාද ලැබෙන්න ඕනේ!” (රූත් 2:19) රූත්ට මෙතරම් දේවල් ලැබිලා තියෙන්නේ කවුරු හරි කෙනෙක් ඇයට කාරුණිකව සලකලා තියෙන නිසයි කියා නායොමිට හිතුණා.

නායොමි හරි. බෝවස් තමන්ට මොන තරම් හොඳින් සැලකුවාද කියා රූත් නායොමිට අකුරක් නෑර විස්තර කළා. ඔය අතර නායොමි මෙහෙම කිව්වා. “ජීවතුන් වගේම මළවුන්වත් කිසිදා අමතක නොකර නොසැලෙන ප්‍රේමයක් පෙන්වූ යෙහෝවා දෙවිගෙන් ඔහුට ආශීර්වාද ලැබේවා!” (රූත් 2:19, 20) ඇයට සැලකුවේ බෝවස් වුණත් ඒ සඳහා ඔහුව පොලඹවන්න ඇත්තේ යෙහෝවා දෙවි බව නායොමි වටහාගත්තා. අන් අයට කාරුණිකව සලකන අයට දෙවි ආශීර්වාද කරන බවත් නායොමිගේ මතකයේ තියෙන්න ඇති. *—හිතෝපදේශ 19:17.

“වෙන කෙතකට ගියොත් දුවට කරදරයක් වෙන්න පුළුවන්. ඒ නිසා බෝවස්ගේ සේවිකාවන් එක්කම ඉන්න.” නායොමි එහෙම කිව්වේ රූත් වෙන කෙතකට ගියොත් එහේ ඉන්න සේවකයන් ඇයට අරියාදු කරයි කියලා ඇගේ හිතේ භයක් තිබුණ නිසායි. රූත් ‘දිගටම ඇගේ නැන්දම්මාට කීකරු වෙමින් ඇය සමඟ ජීවත් වුණා.’ (රූත් 2:22, 23) අපේ පවුලේ අය අතරත් ඒ වගේ කිට්ටු බැඳීමක් තියෙනවාද? යෙහෝවා දෙවි කැමති අපිත් අපේ පවුලේ අය ගැන හිතලා එකිනෙකාට ආදරෙන් සලකනවාටයි.

පවුලක් කියද්දී ගොඩක් අය හිතන්නේ අම්මා, තාත්තා, දුව, පුතා, ආච්චි, සීයා වගේ හැමෝම ඉන්න ඕනේ කියලයි. ඒත් නායොමිගේ පවුලේ හිටියේ නායොමි හා රූත් විතරයි. පවුලේ අනික් සාමාජිකයන් නැති අඩුව නොදැනෙන විදිහට ඒ දෙන්නා එකිනෙකාට ආදරෙන් සැලකුවා. ඒ නිසා පවුලක නැති සාමාජිකයන් ගැන හිතහිතා දුක් වෙනවා වෙනුවට ඉන්න අයට ආදරෙන් සලකමින් සතුටින් ඉන්න අපිට පුළුවන්. දෙන්නෙක් තුන්දෙනෙක් ඉන්න පවුලක වුණත් ආදරය, රැකවරණය සහ කරුණාව තියෙනවා නම් තමන්ටත් පවුලක් තියෙනවා කියලා ඔවුන්ට හැඟෙනවා. ඇත්තටම පවුලක් නැති අයට ඒ අඩුව ක්‍රිස්තියානි සභාවේදී පිරෙන බව යේසුස් පවා එක අවස්ථාවකදී පැවසුවා.—මාක් 10:29, 30.

සාමාන්‍යයෙන් බාර්ලි අස්වැන්න නෙළන්නේ අප්‍රියෙල් මාසයේ සිට ජූනි මාසය දක්වා කාලයේයි. ඒ කාලය පුරාම රූත් වෙහෙස නොබලා බෝවස්ගේ කෙතේ කරල් ඇහිඳින්න ගියා. මේ විදිහට කාලය ගෙවී යද්දී නායොමි හිටියේ රූත් ගැන හිතේ කරදරෙන්. තම ලේලිය වෙනුවෙන් මට මොනවද කරන්න පුළුවන් කියලා ඇය නිතරම කල්පනා කළා. මෝවබ් දේශයෙන් එද්දී කවදාවත් රූත්ට ස්වාමිපුරුෂයෙක්ව සොයා දීමට හැකි වෙයි කියා නායොමි සිතුවේ නැහැ. (රූත් 1:11-13) ඒත් දැන් කාරණා වෙනතකට පෙරළෙන අයුරු දුටු නායොමි “දුවට සන්තෝෂයෙන් ඉන්න පුළුවන් හොඳ නිවහනක් හොයලා දෙන එක මගේ යුතුකමක්” කියා රූත්ට පැවසුවා. (රූත් 3:1) ඉන් ඇය අදහස් කළේ රූත්ට සහකාරයෙක් සොයා දීම ගැන ඇය සිතමින් සිටි බවයි.

බෝවස් ගැන රූත් සඳහන් කළ මුල් අවස්ථාවේදී නායොමි පැවසුවේ “බෝවස් අපේ නෑදෑයෙක්. ඒ නිසා නෑදෑයෙකු අතින් ඉටු විය යුතු වගකීම් ඔහු ඉෂ්ට කරාවි” කියායි. (රූත් 2:20) ඇය එසේ පැවසුවේ ඇයි? දෙවිගේ නීතියේ දිලිඳු, අසරණයන්ට සහනයක් ගෙන දෙන සැලැස්මක් තිබුණා. දරුවෙක් ලැබෙන්න කලින් කාන්තාවකට තම පුරුෂයාව අහිමි වුණොත් ඔහුගේ පෙළපත් නාමය ඉදිරියට ගෙන යෑමට නොහැකි වෙන නිසාත්, ඔහුගේ දේපළ  ඇයට අහිමි වන නිසාත් එවැනි බිරිඳක් අසරණ තත්වයකට පත් වුණා. නමුත් ඇය මිය ගිය පුරුෂයාගේ සහෝදරයෙක් සමඟ විවාහ වී දරුවෙක් බිහි කළොත් ඇයට මිය ගිය පුරුෂයාගේ පෙළපත් නාමය ඉදිරියට රැගෙන යෑමටත් පවුලේ ඔහුට හිමි දේපළ භුක්ති විඳීමටත් දෙවිගේ නීතියේ අවසර දී තිබුණා. *—ද්විතීය කතාව 25:5-7.

ඒ ගැන අවබෝධයෙන් සිටි නායොමිගේ හිතේ එක්තරා සැලැස්මක් ඇඳෙමින් තිබුණා. ඒ අහිංසක සැලැස්ම ගැන තම නැන්දණිය පවසද්දී රූත් ඈ දෙස දෑස් අයාගෙන බලා සිටින්න ඇති. විදේශිකයෙක් වූ රූත්ට ඊශ්‍රායෙල්වරුන්ට දී තිබූ නීතියත් ඒ චාරිත්‍ර වාරිත්‍රත් තවමත් ආගන්තුකයි. නායොමි පැවසූ දේවල් රූත්ට නුහුරු දේවල් වුණත් ලැජ්ජාවක් දැනුණත් “ඔබ කියන විදිහටම මම කරන්නම්” කියා ඇය නායොමිට පැවසුවා.—රූත් 3:5.

සමහර වෙලාවට වැඩිහිටි අය යම් උපදෙසක් දෙද්දී ඒකට කීකරු වෙන්න තරුණ අයට අමාරුයි. තරුණයන් බොහෝදෙනෙක් සිතන්නේ ඔවුන් මුහුණ දෙන ප්‍රශ්න ගැන වැඩිහිටි අයට එතරම් අවබෝධයක් නැහැ කියායි. නමුත් වැඩිහිටියන් අපිට ආදරෙන් දෙන උපදෙස් පිළිපැදීම අපට ප්‍රයෝජනවත් බව රූත්ගේ ආදර්ශයෙන් පැහැදිලි වෙනවා.

එදා තීරණාත්මක දවසක්. තම නැන්දණියගේ උපදෙස් පරිදි රූත් බෝවස්ගේ කෙතට පියනගද්දී හිරු අවරට යමින් තිබුණා. කෙත හරහා හමා ගිය සුළඟ දවස පුරාම වෙහෙසී සිටි මිනිසුන්ගේ ගතට ගෙන දුන්නේ පුදුම සිසිලසක්. ඒ සුළඟ ඔවුන්ට සිසිලසක් වුණා වගේම බාර්ලිවල තිබුණු දහයියා වෙන් කරගැනීම සඳහාත් කළේ විශාල කාර්යභාරයක්.

කෙතේ වැඩ කරමින් සිටි අයවත් බෝවස්වත් රූත්ගේ නෙත ගැටුණා. හෝරා කිහිපයකට පසුව දවසේ නිමාව එළඹෙයි. ආහාරවල සුවඳ කමත සිසාරා පැතිර යන්නේ කෑම කන වේලාව පැමිණ  තිබෙන බව කුසගින්නේ සිටින වැඩකරුවන්ට දන්වමින්. හොඳට කා බී තෘප්තියට පත්ව සිටින බෝවස් විශාල ධාන්‍ය ගොඩක් අයිනේ තමාව හොඳින් පොරවාගෙන නින්දට වැටුණා. තම අස්වැන්න සොර සතුරන්ගෙන් බේරාගැනීම සඳහා කෙතේ අයිතිකරුත් කෙතේම නිදාගැනීම එදා පැවති සාමාන්‍ය සිරිතක් වුණා. ටිකෙන් ටික කාලය ගෙවී ගියා. තම සැලැස්ම ක්‍රියාත්මක කිරීමට හොඳම වේලාව ඇවිත් කියා සිතූ රූත් හිමින් හිමින් බෝවස් ළඟට කිට්ටු වුණා.

අඩියෙන් අඩිය ඉදිරියට ඇදෙන විට ඇගේ හද ගැස්ම එන්න එන්නම වැඩි වෙන්න ඇති. හැමෝම තද නින්දේ. නායොමි කී ලෙසම ඇය කාටත් හොරා බෝවස් වෙතට කිට්ටු වී හීන් සැරේ ඔහුගේ පාදවලින් පොරෝනය ඉවත් කර ඒ අසල නිදාගත්තා. කාලය ගෙවී යද්දී ඒ සෑම තත්පරයක්ම ඇයට කාලාන්තරයක් මෙන් දැනෙන්න ඇති. බෝවස් මැදියම් රැයේදී අවදි වන්නේ සීතලෙන් ගැහෙමින්. කවුරු හරි ඔහුගේ පාදවලින් පොරෝනය ඉවත් කර ඇති බව දැනුණු නිසා ඔහු අඳුරේම ඒ දෙස බලද්දී තම පාද අසලින් “ස්ත්‍රියක නිදා සිටිනවා ඔහු” දැක්කා.—රූත් 3:8.

තිගැස්සුණු ඔහු, “ඔබ කවුද” කියා ඇගෙන් ඇසුවා. එවිට ඇය “මම ඔබේ දාසිය වන රූත්. ඔබේ දාසියට ඔබේ රැකවරණය ලබා දෙන්න. ඔබ අපේ නෑදෑයෙක් නිසා නෑදෑයෙකු අතින් ඉටු විය යුතු වගකීම් ඉටු කරන මෙන් මම ඔබෙන් ඉල්ලා සිටිනවා” කියා ඔහුට පැවසුවා.” (රූත් 3:9) ඇය එසේ පවසද්දී ඇගේ හද කොතරම් වේගයෙන් ගැහෙන්න ඇද්ද? සමහර පරිවර්තකයන් මේ සිද්ධිය විස්තර කරද්දී ඔවුන් දෙදෙනා අතර ලිංගික සම්බන්ධයක් සිදු වූ බව අනුමාන කරනවා. නමුත් ඉතා වැදගත් කාරණා දෙකක් එම පරිවර්තකයන් අමතක කර තිබෙනවා. පළමුවැන්න නම් ඔවුන් එදා පැවති සංස්කෘතිය අමතක කර තිබීමයි. මේ සිද්ධිය වුණේ මීට සියවස් ගණනාවකට කලින්. ඒ නිසා අද තිබෙන විකෘති සංස්කෘතීන් මනසේ පෙරදැරිකරගෙන ඒ සිද්ධිය අර්ථකථනය කිරීම සාධාරණ නැහැ. දෙවන හේතුව නම් බෝවස් ඇයට ඉතා ගෞරවයෙන් කතා කිරීමයි. ඔවුන් දෙදෙනා අතර යම් නොමනා දෙයක් සිදු වූවා නම් බෝවස් කවදාවත් රූත්ගේ චරිතය අගය කරමින් කතා කරයිද? ඒ අනුව ඔවුන් දෙදෙනා අතර කිසිදු අයථා සම්බන්ධයක් සිදු නොවූ බව පැහැදිලියි.

මෙතෙක් වෙලා හිතේ දෙගිඩියාවෙන් සිටි රූත්ගේ බිය සැක දුරු කරමින් බෝවස් මෙහෙම කිව්වා. “යෙහෝවා දෙවිගෙන් ඔබට ආශීර්වාද ලැබේවා! ඔබ කලින් කළ සියලු ක්‍රියාවලට වඩා දැන් කළ මේ දෙයින් ඔබේ ප්‍රේමය ඔප්පු කර පෙන්නුවා. ඔබට ධනවත් හෝ දුප්පත් තරුණයෙක්ව තෝරාගන්න පුළුවන්කම තිබියදීත් ඔබ එහෙම කළේ නැහැ.” (රූත් 3:10) ඔහුගේ එම කාරුණික වදන්වලින් ඇයට ඉමහත් සහනයක් දැනෙන්න ඇති. “කලින් කළ සියලු ක්‍රියා” කීමෙන් ඔහු අදහස් කළේ නායොමි වෙනුවෙන් රූත් කළ සියලු කැප කිරීම් ගැනයි. “දැන් කළ මේ දෙයින්” කියා ඔහු පැවසුවේ කුමක් ගැනද? රූත් වැන්දඹුවක් වුණත් ඇය තවමත් රූමත් තරුණ කාන්තාවක්. ඇයට ලේසියෙන්ම බෝවස්ට වඩා තරුණ කඩවසම් පුරුෂයෙක්ව සොයාගැනීමට අවස්ථාව තිබුණා. නමුත් තමන්ගේ සතුට ගැන සිතනවා වෙනුවට ඇය සිතුවේ තම මිය ගිය පුරුෂයාගේ පෙළපත ඉදිරියට ගෙන යෑම ගැනයි. “දැන් කළ මේ දෙයින්” කියා පවසමින් බෝවස් ඇයව අගය කළේ ඒ හේතු ගැනයි.

රූත්ව විවාහ කරගන්න ලැබීමේ සතුටත් හිතේ තියාගෙන බෝවස් මෙහෙම කිව්වා. “ඉතින් දුවේ, දැන් භය වෙන්න එපා. ඔබ කියන හැම දෙයක්ම මම කරන්නම්. ඔබ ඉතා අගනා කාන්තාවක් කියලා මගේ නුවරේ වැසියන් සියලුදෙනාම දන්නවා.” (රූත් 3:11) ඇගේ යෝජනාව ගැන ඔහු සතුටු වුණත් එය එදා පැවති චාරිත්‍රයක් නිසා ඔහු ඒ ගැන එතරම් පුදුම නොවෙන්නත් ඇති. බෝවස් ධර්මිෂ්ඨ කෙනෙක්. ඔහු තමන්ගේ සතුට ගැන පමණක් සිතුවේ නැහැ. ඔහුටත් වඩා නායොමිගේ මිය ගිය ස්වාමිපුරුෂයාගේ පවුලට කිට්ටුවෙන් නෑකම් කියන තවත් කෙනෙක් සිටින බව ඔහු දැන සිටියා. ඒ නිසා ඔහු රූත්ව විවාහ කරගැනීමේ අවස්ථාව ඒ තැනැත්තාට දෙන්න තීරණය කළා.

තවමත් මැදියම් රැය පහන් වී තිබුණේ නැති නිසා ඒ ස්ථානයේම රැය පහන් කර පසුවදා නිවසට යන්න කියා ඔහු පැවසුවා. ඔහු එසේ පැවසුවේ ඉන් රූත්ගේ නමටත් තමන්ගේ නමටත් ඇති විය හැකි කටකතා ගැන හිතලයි. පසුව දෙදෙනාම නැවතත් නින්දට වැටුණා. ඒ වෙලාවේ මෙතෙක් හිසේ දරා සිටි ලොකු බරක් බිමින් තිබ්බා වගේ සැහැල්ලුවක් රූත්ට දැනෙන්න ඇති. හිමිදිරි පාන්දරම එළිය වැටෙන්නත් කලින් අවදි වූ රූත් තම නිවස බලා යෑමට සූදානම් වෙද්දී බෝවස් ඇයට තෑග්ගක්  දුන්නා. තමන්ට තෑග්ගක් හැටියට ලැබුණු බාර්ලි තොගයත් රැගෙන රූත් ලහිලහියේ තම නිවස බලා පියමන් කළා.

තමන් “අගනා කාන්තාවක්” කියා නගරේ හැමෝම කතා වෙන බව දැනගන්න ලැබීම නිසා රූත්ට තමන් ගැන පුංචි ආඩම්බරයකුත් දැනෙන්න ඇති. ඇයට එවැනි හොඳ නමක් ලැබුණේ ඇය දෙවිට නමස්කාර කරන්න ගත් තීරණය නිසයි. ඇයට එම සංස්කෘතිය ආගන්තුක වුණත් ඒ චාරිත්‍ර පිළිපදින්න ඉදිරිපත් වීමෙන් ඇය පෙන්නුවේ නායොමි ගැනත් ඒ සෙනඟ ගැනත් ඇය සැලකිලිමත් වූ බවයි. අපිත් රූත්ව ආදර්ශයට ගන්නවා නම් වෙනත් සංස්කෘතීන්වලට ගරු කරන්න අපිට පුළුවන් වෙනවා. එහෙම කළොත් අපිටත් රූත්ට වගේ අන් අය ඉදිරියේ හොඳ නමක් දිනාගන්න හැකි වෙන බව සහතිකයි.

අඳුරේම කවුරුන් හෝ නිවසට පැමිණි බව දැනුණු නායොමි “මේ මගේ දුව රූත් නේද” කියා ඇසුවා. ඇය එසේ ඇසුවේ අඳුර නිසා පැමිණි කෙනාව හරියටම ඇයට හඳුනාගැනීමට නොහැකි වූ නිසා වෙන්න ඇති. කොහොමවුණත් වෙච්ච සිද්ධිය ගැන දැනගැනීමට නායොමි සිටියේ නොඉවසිල්ලෙන්. සතුටින් සිටි රූත් සිදු වූ දේ අකුරක් නෑර ගිරවියක් මෙන් කියන අතරේ නායොමිට දෙන්න කියා බෝවස් දුන් බාර්ලි මල්ලත් ඇයට දුන්නා. *—රූත් 3:16, 17.

අද කෙතට යන්න එපා. බෝවස් “කොහොමහරි අදම මේ කාරණය විසඳන බව මට විශ්වාසයි” කියා නායොමි, රූත්ට පැවසුවා.—රූත් 3:18.

නායොමි කිව්ව දේ හරි. බෝවස් එදාම නුවර දොරටු ළඟට ගියා. සාමාන්‍යයෙන් වැඩිමහල්ලන් රැස් වුණේ එතැන. දැන් බෝවස් නොඉවසිල්ලෙන් බලා සිටින්නේ නායොමිගේ නෑදෑයා එන තුරුයි. ඔහු  බලා සිටි මොහොත උදා වීමට වැඩි වේලාවක් ගත වුණේ නැහැ. ඔහු පැමිණි විට බෝවස් මතු වී ඇති තත්වය පැහැදිලි කර, රූත්ව විවාහ කරගැනීමට ඔබ කැමතිද කියා සාක්ෂිකරුවන් ඉදිරිපිටදී ඔහුගෙන් ඇසුවා. නමුත් එසේ කළොත් තමන්ගේ උරුමයට අලාභයක් වෙයි කියා පැවසූ ඔහු ඒ යෝජනාවට එකඟ වූයේ නැහැ. ඉන්පසු බෝවස් තමන්ගේ සැලැස්ම ගැන වැඩිමහල්ලන්ට දන්වමින් මෙසේ පැවසුවා. ‘නායොමිගේ පුරුෂයාට අයිති සියල්ල මම නායොමිගෙන් මිල දී ගන්න බවට ඔබ සියලුදෙනාම අද සාක්ෂිකරුවන්. මාලන්ගේ බිරිඳ වූ මෝවබ් ජාතික රූත්වත් මගේ බිරිඳ හැටියට මම මිල දී ගන්නවා. එතකොට මිය ගිය මිනිසාගේ නමින්ම ඔහුගේ උරුමය පවතියි.’ (රූත් 4:1-10) බෝවස් ඉතා කාරුණික, ධර්මිෂ්ඨ කෙනෙක් බව ඔහු ක්‍රියා කළ ආකාරයෙන් පැහැදිලි වෙනවා.

ඉන්පසු සිද්ධීන් පෙළගැසුණේ රූත්ගෙත් නායොමිගෙත් ජීවිතවලට මහත් සතුටක් ගෙන දෙමින්. බෝවස් රූත්ව විවාහ කරගත්තා. ඉන්පසු ‘යෙහෝවා දෙවි රූත්ට ආශීර්වාද කළ අතර ඇය පිළිසිඳගෙන පුතෙකු බිහි කළා.’ බෙත්ලෙහෙම් නුවර තැන තැන රොක් වූ ස්ත්‍රීන්ගේ මාතෘකාව වුණේ නායොමි. නායොමිට පුතුන් හත්දෙනෙකුටත් වඩා රූත්ව වටිනා බව පවසමින් ඔවුන් රූත්ව වර්ණනා කළා. යෙහෝවා දෙවිත් ඇයට ආශීර්වාද කළ නිසා රූත්ගේ පුතාට දාවිත්ගේ සීයා වීමට හැකි වුණා. (රූත් 4:11-22) ඒ නිසා යේසුස්ගේ මිත්තණියක් වීමටත් රූත්ට අවස්ථාව ලැබුණා.—මතෙව් 1:1. *

රූත් මෙන්ම නායොමිත් අලුත උපන් කිරිකැටියාගෙන් ලැබුවේ නිම් හිම් නැති සතුටක්. නායොමි ඒ දරුවාට සැලකුවේ තම කුසේම උපන් දරුවෙකුට මෙන් සෙනෙහසකින්. මේ දිරිය ළඳුන් දෙදෙනා ගැන දේවවචනයෙන් කියවන වාරයක් වාරයක් පාසා අපේ මතකයට නැඟෙන්නේ දෙවිට විශ්වාසවන්තව සිටිමින් වෙහෙස නොබලා තම පවුලේ අයව රැකගන්නා අයට දෙවි කොයි තරම් ආශීර්වාද කරනවාද යන කාරණයයි. රූත් මොන තරම් අගනා කාන්තාවක්ද!