දෙවියන් මිනිසුන් එක්ක අදහස් හුවමාරු කරලා තියෙනවා. ඔහු තම බලය මාර්ගයෙන් ඔහුගේ අදහස් බයිබලය ලිව්ව අයගේ හිත්වලට දැම්මා. (2 පේතෘස් 1:20, 21) ඒ නිසා බයිබලය කියවලා දෙවියන් ගැන සත්‍යය දැනගන්න අපිට පුළුවන්.—යොහන් 17:17 සහ 2 තිමෝති 3:16 කියවන්න.

යෙහෝවා දෙවියන් තමන් ගැන හුඟක් දේවල් බයිබලයේ කියලා තියෙනවා. මිනිසුන්ව නිර්මාණය කෙරුවේ ඇයි, අනාගතයේදී මිනිසුන් වෙනුවෙන් කරන්නේ මොනවාද, අපි මොන වගේ ජීවිතයක් ගත කරනවාටද කැමති කියලත් කියලා තියෙනවා. (ක්‍රියා 17:24-27) ඔහු කැමතියි අපි ඔහු ගැන සත්‍ය දැනගන්නවාට.—1 තිමෝති 2:3, 4 කියවන්න.

සත්‍යතාවේ දෙවියන් වන යෙහෝවා ඔහුගේ පුතා වන යේසුස්ව එව්වේ මිනිසුන්ට සත්‍යය කියලා දෙන්නයි. සත්‍යයට ඇලුම් කරන අය විතරයි යේසුස්ට සවන් දෙන්න පෙලඹෙන්නේ. (යොහන් 18:37) ඒ වගේ අය තමන්ට නමස්කාර කරනවාට දෙවියන් කැමතියි.—යොහන් 4:23, 24 කියවන්න.

සාතන් වන යක්ෂයා දෙවියන් ගැන බොරු උගන්වලා හුඟදෙනෙක්ව දෙවියන්ට ළං වෙන එකෙන් වළක්වලා. (2 කොරින්ති 4:3, 4) ඒ බොරු ඉගැන්වීම්වලට සවන් දෙන්න පෙලඹෙන්නේ සත්‍යයට අකමැති අයයි. (රෝම 1:25) හැබැයි බයිබලය උනන්දුවෙන් ඉගෙනගන්න මිලියන ගණන් අයට දෙවියන් ගැන සත්‍යය දැනගන්න ලැබිලා තියෙනවා.—ක්‍රියා 17:11 කියවන්න.