“ලෝකෙට සාමය උදා වෙන්න නම් අනිවාර්යයෙන්ම මිනිස්සු විවිධත්වයට ගරු කරන්න ඕනේ.”—යුනෙස්කෝ සංවිධානය, 1995.

 හැබැයි කෙනෙක් විවිධත්වයට ඉඩ දුන්නේ නැත්නම් එයා අනිත් අයට අගෞරව කරන්න, වෛර කරන්න පෙලඹෙනවා. ගොඩක් වෙලාවට එයාගේ කතාබහෙන්, එයා අනිත් අයට සලකන විදිහෙන් ඒක එළියට එනවා. අන්තිමේදී ඒක ගොඩක් දරුණු දේකින් වුණත් කෙළවර වෙන්න බැරි නැහැ.

 විවිධත්වයට ඉඩ දෙන එක ගැන මිනිස්සුන්ට එක එක අදහස් තියෙනවා. සමහර අය හිතන්නේ ඕනම කෙනෙක් කරන ඕනම දෙයක් අපි අනුමත කරන්න ඕනෙ කියලා. මේ කාරණය ගැන බයිබලයේ කියලා තියෙන විදිහට හිතන අයත් ඉන්නවා. එයාලා පිළිගන්නවා තමන්ට කැමති දෙයක් විශ්වාස කරන්න, කැමති තීරණ ගන්න හැමෝටම අයිතිය තියෙනවා කියලා. සමහර වෙලාවට ඒ දේවල් තමන් හිතන විදිහට වඩා වෙනස් වුණත් එයාලා අනිත් අයගේ නිදහසට බාධා කරන්නෙවත් ඒ අයව පහත් කරන්නෙවත් නැහැ.

 අනිත් අයගේ අදහස්වලට ගරු කරන, සාධාරණ කෙනෙක් වෙන්න අපිට උදව් කරන්න බයිබලයට පුළුවන්ද?

විවිධත්වයට ඉඩ දෙන්න ඕනෙ ඇයි?

 බයිබලයේ කියනවා “ඔබ සාධාරණ ලෙස කටයුතු කරන කෙනෙකු බව සියලුදෙනාටම පැහැදිලි විය යුතුයි” කියලා. (ෆිලිප්පි 4:5) ඒකෙන් තේරෙනවා බයිබලයේ අපිට දිරිගන්වන්නේ අනිත් අය ගැන සැලකිලිමත් වෙලා එයාලට කරුණාවෙන්, සාධාරණව සලකන්න කියලා. ඒ උපදෙස අදාළ කරගන්න කෙනෙක් වැඩ කරන්නේ කොහොමද? එයා අනිත් අයගේ හැම අදහසකටම එකඟ වුණේ නැතත් එයාලා කැමති විදිහට ජීවත් වෙන්න එයාලට ඉඩ දෙනවා.

 බයිබලයේ මෙහෙමත් කියනවා. “මනුෂ්‍යයෙනි, යහපත් දේ කුමක්ද කියා දෙවි ඔබට පැහැදිලිව කියා දී තිබේ.” (මීකා 6:8) ඒකෙන් පේනවා මිනිස්සු ජීවත් වෙන්න ඕන විදිහ ගැන යම් ප්‍රමිති දෙවියන් දීලා තියෙනවා කියලා. ඒ ප්‍රමිති අදාළ කරගත්තොත් සතුටින් පිරුණු, සාර්ථක ජීවිතයක් ගත කරන්න මිනිස්සුන්ට පුළුවන්.—යෙසායා 48:17, 18.

 අනිත් අයව විනිශ්චය කරන්න දෙවියන් අපි කාටවත් අයිතිය දීලා නැහැ. බයිබලයේ ඒ ගැන මෙහෙම කියනවා. ‘ඇත්තෙන්ම නීතිදායකයෙකු හා විනිශ්චයකරුවෙකු ලෙස සිටින්නේ එක් කෙනෙකු පමණි. එසේනම් ඔබේ අසල්වැසියාව විනිශ්චය කිරීමට ඔබ කවුද?’ (යාකොබ් 4:12) අපි කැමති විදිහට ජීවත් වෙන්න, කැමති තීරණ ගන්න දෙවියන් අපි හැමෝටම නිදහස දීලා තියෙනවා. හැබැයි අපි ගන්න හැම තීරණයකම වගකීම තියෙන්නේ අපේ අතේ.—ද්විතීය කතාව 30:19.

ගරු කරන එක ගැන බයිබලයේ කියන දේ

 බයිබලයේ අපිට කියන්නේ “සෑම තරාතිරමකම සිටින මිනිසුන්ට ගෞරව කරන්න” කියලා. (1 පේතෘස් 2:17) ඒ උපදෙස පිළිපදින කෙනෙක් අනිත් අය විශ්වාස කරන දේ මොකක්වුණත් එයාලා කොයි වගේ ජීවිත ගත කළත් හැමෝටම ගෞරවයෙන් සලකනවා. (ලූක් 6:31) හැබැයි ඒකෙන් අදහස් වෙන්නේ නැහැ ඒ කෙනා අනිත් අය ගන්න හැම තීරණයක්ම, එයාලා විශ්වාස කරන හැම දෙයක්ම අනුමත කරනවා කියලා. ඒත් තමන්ට වඩා වෙනස් විදිහට හිතන අයව පහත් කරනවා වෙනුවට එයා හැම තිස්සේම උත්සාහ කරන්නේ යේසුස් අනිත් අයට සලකපු විදිහටම එයාලට සලකන්න.

 උදාහරණයකට දවසක් වෙනත් ආගමක් අදහපු කාන්තාවක්ව යේසුස්ට හම්බ වුණා. එයා අදහපු ආගම යේසුස් අනුමත කළේ නැහැ. අනික ඒ කාන්තාව එක්ක එකට ජීවත් වුණ කෙනා එයාගේ ස්වාමිපුරුෂයාත් නෙවෙයි. යේසුස් ඒක අනුමත කළෙත් නැහැ. ඒ වුණත් යේසුස් ඒ කාන්තාවට සැලකුවේ හරිම ගෞරවයෙන්.—යොහන් 4:9, 17-24.

 යේසුස්ව ආදර්ශයට ගන්න ක්‍රිස්තියානීන් තමන්ගේ විශ්වාසයන් ගැන දැනගන්න කැමති හැමෝටම ඒ ගැන කියනවා. හැබැයි එයාලා ඒක කරන්නේ “ගැඹුරු ගෞරවයකින්.” (1 පේතෘස් 3:15) බයිබලයේ ක්‍රිස්තියානීන්ට පැහැදිලිවම කියනවා එයාලාගේ විශ්වාසයන් අනිත් අයට බලෙන් පටවන්න හදන්න එපා කියලා. එයාලා වෙනත් විශ්වාසයන් තියෙන අයත් එක්ක කතා කරද්දී ‘දබර කරන්නේ නැහැ. ඒ වෙනුවට සියලුදෙනා එක්ක මෘදුකමින් කටයුතු කරනවා.’—2 තිමෝති 2:24.

වෛරය ගැන බයිබලයේ කියන දේ

 බයිබලයේ අපිට කියනවා ‘සියලුදෙනා සමඟ සමාදානයෙන් සිටීමට දැඩි උත්සාහයක් දරන්න’ කියලා. (හෙබ්‍රෙව් 12:14) එහෙම කරන කෙනෙක් කවදාවත් අනිත් අයට වෛර කරන්නේ නැහැ. අනිත් අය නිසා එයාගේ ප්‍රතිපත්ති බාල කරගන්නේ නැතුව එයාලා එක්ක සමාදානයෙන් ඉන්න එයා ගොඩක් මහන්සි වෙනවා. (මතෙව් 5:9) ඇත්තටම බයිබලයේ අපිට කියන්නේ අපේ සතුරන්ටත් ඒ කියන්නේ දිගින් දිගටම අපිට නපුරුකම් කරන අයටත් ආදරේ කරන්න කියලයි.—මතෙව් 5:44.

 ඇත්ත, අනිත් අයට හානියක් වෙන දේවල් කරන එක දෙවියන් “ද්වේෂ කරනවා.” ඒ දේවල් ඔහු “පිළිකුල් කරනවා.” (හිතෝපදේශ 6:16-19) හැබැයි දෙවියන් “ද්වේෂ කරන්නේ” වැරදි කරන පුද්ගලයාට නෙවෙයි, එයා කරන ක්‍රියාවටයි. මොකද කෙනෙක් වැරදි අත්හැරලා දෙවියන්ගේ ප්‍රමිතිවලට අනුව ජීවිතේ වෙනස් කරගද්දී සමාව දීලා එයාට උදව් කරන්න දෙවියන් ආසාවෙන් ඉන්නවා.—යෙසායා 55:7.

විවිධත්වයට ගරු කරන එක ගැන තියෙන බයිබල් පද

 තීතස් 3:2: ‘සාධාරණව කටයුතු කරන්න. සියලුදෙනා සමඟ නිතරම මෘදුකමින් කටයුතු කරන්න.’

 මතෙව් 7:12: “අනුන් ඔබට යම් දෙයක් කරනවාට ඔබ කැමතිද ඔබත් ඒ දේම ඔවුන්ට කරන්න.”

 යොෂුවා 24:15: “ඔබ නමස්කාර කරන්නේ කාටද කියා අදම තීරණය කරන්න.”

 ක්‍රියා 10:34: “දෙවි සියල්ලන්ටම එක හා සමානව සලකනවා.”

 හබක්කුක් 1:12, 13: “නපුර ගණන් නොගෙන සිටීමට දෙවිට නොහැක.”

 රෝම 12:19: “දෙවිට සෑම දෙයක්ම භාර දී ඔහුට තම උදහස ප්‍රකාශ කිරීමට ඉඩ දෙන්න. මන්ද ලියවිලිවල සඳහන් ආකාරයට, ‘යුක්තිය ඉටු කිරීමේ අයිතිය මා සතුය. දඬුවම් කරන්නේ මමය කියා යෙහෝවා දෙවි පවසන්නේය.’” a

 දෙවියන් කාටවත් පළිගන්න අයිතිය දීලා නැහැ. ඒ වෙනුවට ඔහු නියම කරලා තියෙන කාලේදී අනිවාර්යයෙන්ම යුක්තිය ඉටු කරනවා කියලා ඔහු පොරොන්දු වෙලා තියෙනවා. ඒ ගැන තව දැනගන්න “හැමෝටම යුක්තිය ඉටු වෙන කාලයක් එයිද?” කියන ලිපිය බලන්න.