දෙවිට සේවය කරමින් අපි යන ගමනත් ධාවන තරගයක් වගෙයි. (හෙබ්‍රෙ 12:1) කාලයක් අපිත් එක්ක ඒ තරගයේ සහභාගි වුණු සමහර අයගේ වේගය එක එක හේතු නිසා දැන් අඩු වෙලා. ඒ හේතු කිහිපයක් ගැන ‘ආයෙත් එන්න’ සඟරාවේ තියෙනවා. හැම අවුරුද්දකම අක්‍රියාශීලී අයගෙන් හුඟදෙනෙක් යේසුස්ගේ මරණය සිහි කිරීමට සහභාගි වෙනවා. ඒ අයවත් දෙවි මිල දීලා අරන් තියෙන්නේ ඔහුගේ පුතාගේ ලේවලින් නිසා එයාලව තාමත් දෙවිට හුඟක් වටිනවා. (ක්‍රියා 20:28; 1පේතෘ 1:18, 19) ආයෙත් දෙවි ළඟට එන්න එයාලට උදව් කරන්න අපිට පුළුවන් කොහොමද?

රැළෙන් ඈතට ගිය බැටළුවෙක්ව හොයාගෙන යන එඬේරෙක් වගේ වැඩිමහල්ලනුත් අක්‍රියාශීලී අයව හොයාගෙන ගිහින් ඒ අයට උදව් කරනවා. (ලූක් 15:4-7) ඒකෙන් පේන්නේ යෙහෝවා දෙවිට ඒගොල්ලන් ගැන කොච්චර සැලකිල්ලක් තියෙනවද කියන එකයි. (යෙරෙ 23:3, 4) වැඩිමහල්ලන්ට විතරක් නෙමෙයි අපි හැමෝටම පුළුවන් එයාලව දිරිගන්වන්න. අපි එයාලට ආදරෙන් සලකද්දී ඒ ගැන යෙහෝවා දෙවි හුඟක් සතුටු වෙනවා. ඒකෙන් අපිටත් ලොකු සතුටක් ලැබෙනවා. (හිතෝ 19:17; ක්‍රියා 20:35) ඒ නිසා ඔයාට දිරිගන්වන්න පුළුවන් කාවද කියලා හොඳට හිතලා බලන්න.

‘අක්‍රියාශීලී අයව දිරිගන්වමු’ වීඩියෝ එක බලලා මේ ප්‍රශ්නවලට උත්තර දෙන්න:

• අඳුරන්නේ නැති සාක්ෂිකාරියක්ව හම්බවුණාම ඇබී කළේ මොනවද?

• අක්‍රියාශීලී කෙනෙක්ට උදව් කරන්න කලින් ඒ ගැන වැඩිමහල්ලන්ට දැනුම් දෙන්න ඕනෙ ඇයි?

• දෙවෙනි වතාවේ ලෝරාව හම්බ වෙන්න යන්න ඇබී සූදානම් වුණේ කොහොමද?

• ලෝරාව දිරිගන්වන්න වෑයම් කරද්දී ඇබී දිගටම ලොකු ඉවසීමකින්, ආදරයකින් වැඩ කළේ කොහොමද?

• ලූක් 15:8-10 සඳහන් යේසුස්ගේ උපමාවෙන් අපිට ඉගෙනගන්න පුළුවන් මොනවද?

• හැමෝම එකතු වෙලා ලෝරාට උදව් කරපු නිසා ලැබුණු ප්‍රතිඵල මොනවද?