ඔයාත් වයස අවුරුදු 23ත් 65ත් අතර ඉන්න පූර්ණකාලීන සේවයේ හවුල් වෙන කෙනෙක්ද? ඔයා හොඳ සෞඛ්‍යයක් තියෙන, අවශ්‍යතාව තියෙන ඕනම ප්‍රදේශයක සේවය කරන්න කැමති කෙනෙක්ද? ඒ ප්‍රශ්නවලට ඔයාගේ උත්තරය ඔව් නම් ශුභාරංචිය ප්‍රකාශ කරන්නන්ගේ පාසැලට අයදුම් කරන්න ඔයාත් කැමති නැද්ද? මුලින්ම පවත්වපු පාසැලේ ඉඳන් විවාහක යුවළයන්, තනිකඩ සහෝදරයන් සහ තනිකඩ සහෝදරියන් දහස් ගාණක් මේ පාසැලට අයදුම් කරලා තියෙනවා. කොහොමවුණත් තනිකඩ සහෝදරයන් තව වැඩියෙන් ඉල්ලුම් කරයි කියලා අපි බලාපොරොත්තු වෙනවා. යෙහෝවා දෙවියන්ව සතුටු කරන්නත් ඔහුගේ පුතාව ආදර්ශයට ගන්නත් ඔයාට තියෙන ආසාව තව වැඩි කරන්න කියලා ඔහුගෙන් ඉල්ලන්න. (ගීතා 40:8; මතෙ 20:28; හෙබ්‍රෙ 10:7) පවුලේ වගකීම්, ගෙවන්න තියෙන ණය එහෙමත් නැත්නම් රැකියාව වගේ දේවල යම් සකස් කිරීම් කරගෙන අවශ්‍ය සුදුසුකම් ලබාගන්න පුළුවන් විදි ගැන හිතලා බලන්න.

මේ පාසැලෙන් පුහුණුව ලබන අයට සේවය කරන්න ලැබෙන අවස්ථා මොනවාද? සමහර අයට වෙනත් භාෂාවක් කතා කරන ප්‍රදේශයක සේවය කරන්න හරි විශේෂ පොදු සේවයේ හවුල් වෙන්න හරි පැවරුමක් ලැබිලා තියෙනවා. තවත් අයට පස්සේ කාලෙක ආදේශක චාරිකා සේවකයන් විදිහට, චාරිකා සේවකයන් විදිහට නැත්නම් මිෂනාරිවරුන් විදිහට සේවය කරන්න පැවරුම් ලැබිලා තියෙනවා. යෙහෝවා දෙවියන්ට තවත් වැඩියෙන් සේවය කරන එක ගැන හිතද්දී “මම යන්න කැමතියි. මාව යවන්න” කියලා යෙසායාට තිබුණු ආකල්පය ඇති කරගන්න ඔයාත් උත්සාහ කරන්න.—යෙසා 6:8.

‘අස්වැන්න නෙළන අපේ මිෂනාරිවරුන්’ කියන වීඩියෝ එක බලලා මේ ප්‍රශ්නවලට උත්තර දෙන්න.

• මිෂනාරි සේවයට කෙනෙක්ව තෝරගන්නේ කොහොමද?

• මිෂනාරිවරුන් කරන්නේ මොන වගේ වටිනා සේවයක්ද?

• මිෂනාරි සේවයේ හවුල් වෙද්දී ලැබෙන ආශීර්වාදවලින් කිහිපයක් මොනවාද?