Yihowa Farciꞌraasine manna kaaꞌlannoha kaajja looso 200 saꞌanno gobbara loossanni no. Kuri gobbuwa giddo, gobbansara fushshinanni fushsho horoonsidhe loosonsa loosa dandiitannori 35 gobbuwa callate. Miinju anje noo gobbara heedhanno roduuwi loosonsa loosate hasiisanno woxe afidhannohu hiittoonniiti?

 Yihowa Farciꞌraasinehu Aliidi Bisi, alamete doyichora heedhanno roduuwi Yihowa magansiꞌratenna dancha duduwo duduwate mayi hasiisannonsaro seekke xiinxallanno. Hakkiinni, fushshotenni afiꞌnoonni woxe hayyotenni horoonsiꞌnanni gede assanno. Mitte sinu biiro fushshotenni afidhino woxi, hakko qooxeessira loonsanni loosira ikke gatiro gari woxe afidhannokki gobbuwara sonkanni. Tini qixxaawo heedhanno gede assinoonnihu, mimmito kaaꞌlanni duhansa ‘taalo’ beeqqinohu umi xibbi diri Kiristaani lawishsha harunsineeti. (2 Qorontoosi 8:14) Konni garinni kuri Kiristaani angate anje noonsare kaaꞌlino.

 Wole sinu biiro woxe uyitinonsa roduuwira mayi macciishshaminonsa? Lawishshaho Taanzaaniyaho, rooru manni barrunni afiꞌranno woxi lame doolaare diꞌꞌikkanno; wole sinu biiro sokkino woxinni hattee gobbara Maafinga yinanni songota Gambooshshu Addaraashe gatamarroonni. Hatte songo roduuwi togo yite sokka borreessitino: “Addaraashe gatamarrihu gedensaanni gambooshshe daanno manni kiiro lowo geeshsha lexxitino! Yihowa dirijjitenna alamete doyichora noo roduuwinke shaqqillunni kaaꞌlitinonke daafira galaxxineemmonsa; insa kaaꞌlonni togoota biifado Addaraashe afiꞌra dandiinoommo.”

 Koroonu fayyanni kainohunni Siri Laanku gobbara mitu roduuwinke sagale hoogge shettino. Kuri roduuwi giddo mitte, Imaara Fernaandootinna qaaqqose Inooshiiti. Wole gobbuwara heedhanno roduuwi fushshitino fushshonni insa hasiisannonsare afiꞌrino. Insa kaarde qixxeesse togo yee borreessino: “Tenne qarrissanno yannara baxille leellishinonke roduuwa galaxxineemmonsa. Ninke tenne maate wido ikkinoommo daafira lowo geeshsha hagiirraammaho; hattono tenne goofimarchu yannara Yihowa baalanka roduuwanke kaaꞌlanno gede huuccatto assa diagurreemmo.”

 Roduuwinke heedhanno gobba ikkitutano ikkituro, noonsare wolootu ledo beeqqitanno. Lawishshaho, Inooshi kaaꞌlo hasiissannonsa maate kaaꞌlate yee woxe codhanno saaxine seekkiꞌrino. Guwaadalupe Alvaareezi yinanni rodoono roduuwa kaaꞌla hasidhanno. Ise heedhannowa Meksikote qooxeessira mannu loose afiꞌrannori garire diꞌꞌikkino; mitu mannira isinni loosu dinonsa. Ikkirono, ise wolqase assitu geeshshire fushshitanno. Ise togo yite borreessitino: “Danchummasinna bagamannokki baxillisira Yihowa galaxxeemmasi. Ani fushshoomma woxe wolootu fushshitinohu ledo gamba assine kaaꞌlo hasiissannonsa roduuwa kaaꞌlinannita afoomma.”

 Kaaꞌlo hasiissanno qooxeessira woxe sokkinoti sinu biirono hatto assansanni hagiidhitino. Biraazilete Sinu Biiro Komite miili Antoonii Karvaaliyo togo yiino: “Batinye diro, gobbankera loosonke loonseemmohu wole gobba roduuwi woxunni kaaꞌlitannankeeti. Konni garinni kaaꞌlinoonninke daafira, dhagge ikkanno garinni lophinoommo. Xa miinjunni woyyaamboommo daafira, ninkenni woloota kaaꞌlate qoosso afiꞌnoommo. Roduuwinke sabbakate loosi alamete doyichora loonsanniha ikkinota huwattino daafira, uminsa qiniite agurte woloota kaaꞌla dandiitanno faro hasidhanno.”

 Yihowa Farciꞌraasine kaaꞌlo hasiissannonsa roduuwa danchu garinni kaaꞌla dandiitannohu hiittoonniiti? Insa tenne assitannohu wole gobbara noote sinu biirora xaaddotenni woxe sokke ikkikkinni, alamete doyichora loonsanni loosira woxe fushshiteeti. Gambooshshu Addaraashe giddo noote “Alamete Doyicho Loosira” yitanno saaxinera woxe worre woy donate.pr418.com widoonni woxe fushshine tenne assa dandiinanni. Fushshitinanni fushsho baalantera lowo geeshsha galanteemmoꞌne.