Alamete aana batinyu gashshooti, mannu xeertinyensa agadhanno gedenna mitteenni gamba yaa aguranno gede seera fushshino. Yihowa Farciꞌraasine konne gashshootu seera ayirrisate murcidhino; ikkirono, insa Magano mitteenni magansiꞌra hasidhanno. Tenne assate, songuwa viidiyotenni xaadate kaaꞌlitanno appilikeeshiine, lawishshaho Zuume horoonsidhanni no.

 Gambooshshenke ganyine assiꞌra dandiineemmo gede kaaꞌlate, Aliidi Bisi fushshote woxinni songote gambooshshira kaaꞌlitannota Zuumete akkaawuntuwa hirranni gede fajjino. Tini qixxaawo, viidiyotenni xaadate kaaꞌlitanno akkaawunte hidhate hasiisannohu 15-20 doolaare woy hakkuyi ale ikkanno woxi noonsakki songuwara lowore kaaꞌlitino. Tini songuwa alba horoonsidhanno appilikeeshiine gari manna eessitannokkitenna gari agarooshshe afidhinokkite. Xa kayinni, dirijjite hirtinota Zuumete akkaawunte horoonsidhanno songuwa baalanti akkaawuntensa agarooshshe uminsa illaallisa dandiitanno; qoleno tenne akkaawuntenni batinyu manni mitteenni xaada dandaanno. Xaa geeshsha, 170 saꞌanno gobbuwara nooti 65,000 saꞌanno songuwa tenne akkaawunte horoonsidhanni no.

 Indooneezhiyaho Aliyye Sulaweesihu qaru katamira Manaado nooti Kairaagii Songo, alba horoonsidhannota mulla dirrisiꞌnanni appilikeeshiine agurte dirijjite hidhitinota Zuumete akkaawunte horoonsiꞌra hanaffino. Roduu Hadii Santooso togo yiino: “Elekitirooniksete uduunne gari geeshsha horoonsiꞌra rossinokki roduuwi nafa xa songote gambooshshe dancha gede macciishsha dandiitino; mayira yiniro, xa mittu gambooshshira Zuume duucha higge faꞌna dihasiissannonsa.”

 Ikuwadoori gobbara Guyaakuyiili katamira Guyakeniisi Oosite songora cimeessa ikke soqqamannohu roduu Leesteri Jijooni togo yiino: “Batinyu roduuwi angate anje qarrissannore ikkitino daafira wonaatiro songo woꞌma eessitannota Zuumete akkaawunte hidha mite songora qarra ikkitannonsa. Xa kayi dirijjite uyitinonke akkaawunte batinye manna eessitannota ikkitino daafira kiiro woꞌmitanno yine yaandummokkinni woloota koyisa dandiineemmo.”

 Zaambiyaho Lusaaka katamira Aliyye Giweerere Songo cimeessi Joonseni Miwaanza togo yiino: “Batinyu roduuwi duucha higge, ‘dirijjite hirtinoti Zuumete akkaawunte albinni roore roduuwinkewa gamba yineemmo gede calla ikkikkinni Yihowa baxannonketanna towaatannonketa huwanteemmo gede assitinonke’ yitino.”

 Dirijjite tenne akkaawuntuwa hirtinohu dano iillitinore kaaꞌlate fushshinoonni woxi aaninni haadheeti. Togoo woxe afiꞌneemmohu alamete doyicho loosira mannu uminsa fajjonni fushshanno fushshonniiti. Batinyu manni fushsho fushshannohu donate.pr418.com widoonniiti. Togoo fushsho alamete doyichora qarrantinore wolu garinni kaaꞌlateno horoonsiꞌnanni. Shaqqillunni togoo fushsho fushshitinanni daafira lowo geeshsha galanteemmoꞌne.—2 Qorontoosi 8:14.