Xaa Yannara Noohu Wayi Qarri Daafira Qullaawu Maxaafi Mayyaanno?

FANI

Ninke baalunkura heeshshote heeꞌrate xalalu wayi hasiisannonke. Ikkollana, Buusantino Mangistubba Dirijjitehu Qaru Borreessaanchi Antooniyo Gutireezi togo yee qorophisiisino: “Alame woꞌmate wayi hasatto konni garinni lexxitanni hadhannoha ikkiro, waa hoonge lowo geeshsha qarrammeemmo.” Alamete doyichora lowo biliyoone ikkanno manni xa nafa agannoha xalala waa hooge qarrame no.

Strdel/AFP via Getty Images

Mannu baalu hasiꞌranno geeshshi waa afiꞌranno yanna daggannonso wayi hoonginni togo qarrammella heeꞌnanni? Qullaawu Maxaafi isi mayyaanno?

Wayi tuqishshi daafira Qullaawu Maxaafi kulanno hexxo

Qullaawu Maxaafi wayi hoongi heeꞌrannokki yanna daggannota kulanno. Isinni lowohu xalalu wayi heeꞌranno yanna dagganno.

“Halallitte gobbara wayi lolahanno. Iibbe itanno shaafi kofame ikkanno; moola baattora buicho burqitanno.”—Isayaasi 35:6, 7.

Tenne Qullaawu Maxaafi kulanno hexxo addaxxa dandiineemmohu mayiraati? Hanni Qullaawu Maxaafi pilaaneetenke kalaqantino gara mayyaannoro mitte hedo laꞌno.

Qullaawu Maxaafi baattotenna wayi doyichose daafira kulannore

“[Maganu] baatto seekke kalaqinohu . . . fano heedhara ikkikkinni, mannu heeꞌranno gedeeti.”—Isayaasi 45:18.

Maganu baatto heeshshote kalaqamira qae ikkitara hede kalaqino daafira, falahinohu xalalu wayi heeꞌranno gede kaaꞌlitannota kalaqamu wodho qixxeessino.

“Maganu waa baattotenni iimira qole fushshanno; gordu aanano xeenu widira qole soorranno. Xeenu gomichu giddonni fule, mannaho barada ikke dirranno gede assanno.”—Iyyoobi 36:27, 28.

Kuni qummeeshshi, Maganu baattote aana wayi goofannokki gede assate qixxeessinota kalaqamu wodho xaphi asse kulanno. Wayi baattotenna baaru aaninni foorare, loja ikkanno; hakkiinni xeena ikke dirranno; konni garinni mannuno saadano woꞌmanka woyite xalala waa afiꞌra dandiitanno.—Rosiisaancho 1:7; Amootsi 5:8.

“Xeena yannatenni eemmoꞌne; baatto gide fushshitannoꞌne; haqqeno laalo uyitannoꞌne.”—Leewaawoota 26:4.

Maganu loosidhe galtannota biꞌreeta Israeelete daga lowo gidenna laalo oye maassiꞌransara hexxo uyinonsa; konne assate woꞌmanka woyite xeena aannonsa. Loosiꞌne sagale afiꞌrate, duushshanno xeena yannasira afiꞌra hasiissannonketa isi afino.

Maganu hunda Israeelete dagara assinore muli yannara baatto woꞌmate aana assanno. (Isayaasi 30:23) Hakka geeshsha kayinni, alamete aana duuchu qooxeessira wayi qarri lexxannilla no; konni qarrira kaimu kayinni xeenu hoonge calla diꞌꞌikkino. Qullaawu Maxaafi wayi qarrira mala ikkannore wolere maa kulanno?

Wayi qarri baꞌꞌanno gara

Qullaawu Maxaafi kulanno garinni, Maganu Gashshootisi widoonni pilaaneetenke gawajjanni noo qarra baala lawishshaho wayi qarra hoolanno. (Maatewoosi 6:9, 10) Maganu Gashshooti baatto woꞌma gashshannoho gordu gashshooteeti. (Daanieeli 2:44; Yohaannisi Ajuuja 11:15) Maganu Gashshooti mannu gashshooti asse afannokkire assanno; hakkuno: Wayi qarrira kora ikkinore hunanno.

Qarra: Ayyarete gade soorrama wayi doyichora lowo guficho ikkitino. Konninni kainohunni baatto bayidhannokki xeena gananno daafira woy baaru gaxi lexxanno daafira, baatto moolle gantanno, hattono lolahu batiꞌranno.

Mala: Maganu Gashshooti pilaaneetenke gawajjinore baala hoole baatto haarooꞌmitanno gede assanno. Maganu “Kune, ani baalanka coye haaro asseemmo” yee hexxo uyinonke. (Yohaannisi Ajuuja 21:5) Moolte dhodhookkino baattora wayi woꞌmanno daafira, xaa yannara heeꞌrate injaannokki qarqarira nafa albillitte heeshshote kalaqami late heeꞌranno. (Isayaasi 41:17-20) Yesuusi Kiristoosi anga noohu Maganu Gashshooti baattonnita kalaqamu wolqano gaꞌlabbi assanno.

Yesuusi uullate aana noo waro, waajjishshanno hombobalatte sammi assino; konni garinni, Maganu isira uyinosi wolqa mageeshshitero eerino. (Maarqoosi 4:39, 41) Yesuusi Maganu Gashshooti Moote ikke baatto gashshanno woyite, kalaqamu dano diheedhanno. Mannu dano iillitannoe yee waajjikkinni, addu keerenna harshammo afiꞌre hagiidhanni teese heeꞌranno.

Qarra: Gaꞌata hedannokki manninna hafuuraamma dirijjitta lagga, garbuwa, hattono wole wayi buꞌa daaffe wayi hoongi lexxanno gede assitanno.

Mala: Maganu baatto keereensanno, hattono laggase, garbuwase, baarasenna bushshase haaroonsanno. Baatto gannate ikkitanno. Qullaawu Maxaafi tenne masalse kulanni togo yaanno: “Molo baatto hagiidhitanno; halalli baattorano daraaro fultanno.”—Isayaasi 35:1.

Qarqara woy wole manna gawajjannore assitannori hiikkitannoyya? Maganu “baatto huntannore [hunara]” hexxo uyinonke.—Yohaannisi Ajuuja 11:18; Lawishsha 2:21, 22.

Qarra: Mannu ooso waa afimalsitanni no; qoleno waa baatto qola dandiitannokki deerrinni horoonsidhanni no.

Mala: Maganu Gashshooti umonsa calla baxanno manni fajjo ikkikkinni Maganu fajjo ‘uullate aana ikkitanno’ gede assanno. (Maatewoosi 6:9, 10) Maganu Gashshooti qansootasi seekke rosiisanno. Isayaasi 11:9 ‘Kaaliiqa [“Yihowa,” Haaro Alame Tiro] egennino manni baatto woꞌmanno’ yitanno. a Mannu ooso hattee jawa egenno afidhannohura, hattono Maganonna kalaqamasi baala lubbora baxxanno daafira, biifado pilaaneetenkenna kalaqamu jirose seekkite towaattanno.

Maganu Gashshooti wolere maa assannoro ledde afate, “Maganu Mangiste Maa Assitanno?” yaanno birxicho lai.
Baatto soorrante gannate ikkitannohu hiittoonniitiro umikki buuxa dandaatto gede, Qullaawu Maxaafiha Isayaasi maxaafa fooliishsho 35 nabbawi.
Maganu baattotenna mannu oosora hedinore ledde afate, Maganu Uulla Kalaqinohu Mayiraati? yitanno viidiyo lai.