Maaja 2022, alamete deerrinni iibbillu albinni roore lexxino:

•   “Chayinu gashshaasine xaano mite 70 katammara ayyare quwa saꞌe iibbitannota kulte qorowisiissino.”—Maaja 25, 2022, CNN Wire Service.

•   “Awuroppaho baalankawa iibbillu batiꞌrino daafira, lowo gobbara dubbu giira kaꞌino.”—Maaja 17, 2022, Ze Gaardiyani.

•   “Ameerikaho Soojjaati Qaccera, Wodiidoonninna Mereeri Galchimi widoonni arru batiꞌrino daafira, Sambatu barra batinye katammara iibbillu baasa lexxino.”—Maaja 24, 2022, Ze Niwu Yoorki Taymisi.

 Kuni baalu ikkanni noohu mayiraati? Baatto isi marte marte heeꞌnannikkita ikkitaraatikka? Qullaawu Maxaafi tenne daafira mayyaanno?

 Ee. Gobba baalate iibbillu lexxa, Qullaawu Maxaafi yannankera ikkanno yiino coyi ledo mittete. Lawishshaho, Yesuusi “anfe egenninoonnikkirinna waajjishshannoti jajjabba malaatta leeltanno” yee masaalino. (Luqaasi 21:11) Alame woꞌmate lexxino iibbilli, batinyu manni mannu ooso baatto huntaraati yee waajjanno gede assino.

 Diꞌꞌikkitanno. Maganu baatto kalaqinohu mannu oosora hegere qae ikkitaraati. (Faarso 115:16; Rosiisaancho 1:4) Isi mannu baatto hunara wore dilaꞌꞌanno; hatteentenni, “baatto huntannore [hunanno].”—Yohaannisi Ajuuja 11:18.

 Hanni Maganu baattote hedinore kultannota lame masaalo calla laꞌno:

•   “Molo baatto hagiidhitanno; halalli baattorano daraaro fultanno.” (Isayaasi 35:1) Maganu baatto mitturino heeꞌra dandaannokki halalla ikkitara wore diaguranno; hatteentenni daafamino qarqarase haaroonse biifisanno.

•   “Xeena uyite baatto towatootto; lowo geeshshano qawaaxxisootto.” (Faarso 65:9) Maganu baatto maassiꞌre gannate ikkitanno gede assanno.

 Ayyarete gade soorrantino gari Qullaawu Maxaafi masaalo woꞌmitanno gede assannohu hiittoonniitiro ledde afate, “Ayyarete Gade Soorrante Bao Abbita Ikka? Qullaawu Maxaafi Mayyaanno?” yaanno birxicho nabbawi.

 Baatto soorrante gannate ikkitanno yee Qullaawu Maxaafi kulanno hexxo daafira ledde afate, “Baato Gatisannohu Ayeti?” yaanno birxicho lai.