Sai diro, fayyimmate ogeeyye callimma ordu fayyimma lowo geya gawajjitanno daafira mala hasa hasiissannota coyidhino. Ikkina callimmate malu heeꞌrakka?

•   Ameerikunnihu fayyimmate Ogeessi Dokter Viveki Merti, “Callimmanna mannunniwa gambo giwa, fayyimmankeranna keeraanchimmankera bala ikkitanni no” yiino. Isi lede, “Kayinni hansiro malu dihooganno” yee coyiꞌrino. Malu maatiyya? “Shiimare ikkiro nafa barru baala wolootu ledo noonke aante kaajjishannore assate.” a

 Callimma amaddannohu mannunniwa gambo gimboonni daafira calla diꞌꞌikkino. Mitoota lowo manni ledo heedheenna nafa callimma amaddansara dandiitanno. Callimmate kora ikkanno coyi ikkihano ikkiro, Qullaawu Maxaafi kaaꞌlannonke. Qullaawu Maxaafi, jaaloomanke kaajjishiꞌrate kaaꞌlitannonketa kaajja amaale aanno.

 Mannu ledo dancha gede hasaawate dandoo lossiꞌri. Tenne assate, ati calla hasaaphattoha ikkikki wolootu hasaaphitanno woyite macciishshattoha ikka hasiissannohe. Wolootahono hedattota leellishattoha ikkiro, jaaloomiꞌne kaajjado ikkanno.

•   Qullaawu Maxaafi biddishsha: “Mittu mittunku woleho woyyannore hedo ikkinnina, umisira woyyannore calla laoonke.”—Filiphisiyusi Sokka 2:4.

 Addi addi gari manni ledo jaalooꞌmi. Darawokki ikkitinokkiri ledo woy diro roorattori ledo hattono addi addi budi, losso woy gaꞌre noonsari ledo jaalooꞌmi.

•   Qullaawu Maxaafi biddishsha: “Wodana halaꞌle.”—2 Qorontoosi 6:13.

 Wolootu ledo dancha jaalooma kalaqiꞌra dandiinanni gara ledde afate, “Jaalooma Kalaqiꞌrate Hasatto” yaanno birxicho nabbawi.