Dubbu saada woy gaxigalu heeshsho agarsiisate loossannoti mitte uurrinsha (WWF), Birra 9, 2024 mannu gaxigala gawajjanni noo gara kultannota yaachishshanno rippoorte fushshitino. Tini rippoorte kultanno garinni, “saihu 50 diri giddo (1970-2020), noo gaxigali giddonni xibbunni 73 anga ikkannohu goofino.” Rippoorte ledde togo yite qorophisiissino: “Daannohu ontu diri giddo adhinanni qaafo, Baattote aana heeshshote kalaqami heeꞌranno woy heeꞌrannokki gede assitara dandiitanno yine coyiꞌra dandiineemmo.”

 Batinyu manni togoo rippoorte macciishshanno woyite masansa woy dadillansa garankolla. Ninke mannu ooso biifado pilaaneetenke banxeemmo; qoleno ise aana noo gaxigalinna saada gawajjantara dihasiꞌneemmo. Korkaatuno Maganu kalaqinonkehu saada towaata banxeemmo gede asseeti.​—Kalaqama 1:27, 28; Lawishsha 12:10.

 Hakko daafira, ‘Dubbu saada baotenni gatisa dandiinammokka? Qullaawu Maxaafi tennera mayyaanno?’ yite hedattoha ikkara dandaanno.

 Gaxigala towaatate aye geeshshano sharrammummoro, addinta saadate heeshsho baotenni gatisannohu Maganoho. Qullaawu Maxaafi giddo Yohaannisi Ajuuja 11:18 aana, Maganu daafira “Baatto huntannore hunatto yanna iillitu” yine masaalloonni. Konni qummeeshshinni lame coye ronseemmo:

1.  1. Maganu mannu baatto gawajjannota woy gudise hunannota hoolanno.

2.  2. Maganu mulenni qaafo adhanno. Tenne mayinni anfeemmo? Xaa yanna gede mannu ooso baattote aana noo saada hunate kaꞌinoti wole yanna horo dino.

 Maganu konne qarra tirate maa assanno? Isi baatto woꞌma gashshate gordu Gashshootesi soyanno. (Maatewoosi 6:10) Kuni gashshooti, owaata mannu oosora saadanna gaxigala towaatanna agara dandiinanni gara rosiisanno hattono qajeelsanno.—Isayaasi 11:9.