DEANTINOONTE!
Kiristinnu Ammaꞌnonna Ola—Qullaawu Maxaafi Mayyaanno?
Yukireenete kaino olira, batinyu Kiristinnu ammaꞌno murrooti, mannu mittu widira kaaꞌlamanno gede jawaachishshanni no. Hanni lamunku widiti ammaꞌnote murrooti olaho karsantino gara laꞌno:
“Gobbaꞌne Yukireene diinu anganni gatisate gaarantinanni heedhinoonni olamaasinenke baalunkura lowo ayirrinyinna galati hasiisannoꞌne . . . Woꞌmanka woyite ledoꞌne heeꞌnoommo; kaaꞌlineemmoꞌne, huuccattono assineemmoꞌne.”—Kiiyivunnihu Metiropolitaani Epifaanesi Umihu coyiꞌrinore, Ze Jerusaalem Poost, Badheessa 16, 2022.
“Ruusiyu Yukireenete gobbara hanafino gaado lainohunni, Ruusiyu Ortodokse Beetekiristaane murrichi Sambatu barra Ruusiyu olantora baxxitinota ammaꞌnote pirogiraame qixxeessino; isi hatte pirogiraamewa ‘Ruusiyu bashshonni jannu janna ikkinonte gede’ gobbaꞌnera gaaramme yiino.”—Royitersi, Dotteessa 3, 2022.
Kiristaanu olaho mittu widira kaaꞌlama hasiissannonsa? Qullaawu Maxaafi isi mayyaanno?
Qullaawu Maxaafi mayyaanno?
Qullaawu Maxaafi, Yesuusi Kiristoosa halaalunni harunsitannori olaho karsantannokkita kulanno.
“Bise fushshidhannori bisetenni reyitannona bisekki kou giddora qoli!”—Maatewoosi 26:52.
Ola olammanni gede jawaachishannohu woy olaho haꞌre olamanno manchi Yesuusi coyiꞌrinore assanni noo yaa dandiinanni?
“Kiꞌne kiꞌneneewa baxantinanni gede, haaro hajajo eemmoꞌne; ani baxummoꞌnente gede kiꞌne kiꞌneneewa baxamme! Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.”—Yohaannisi 13:34, 35.
Olaho kaaꞌlamanno manchi, Yesuusi rosaano woy harunsaano bande anfanni gede assanno baxille mannaho leellishanni no yaa dandiinanni?
Tenne daafira ledde afate, “Kiristaanu Ola Olama Hasiissannonsa?” yaanno birxicho lai.
Kiristinnu ammaꞌnonna ola yannankera
Yannankera olaho horonta karsamannokki Kiristaani nooyya? Ee no. Qullaawu Maxaafi tenne heeꞌnoommote “goofimarchu yannara” addi addi gobbanni dayinohu ola olamannokki manni heeꞌrannota balaxe kulino; kuni manni hatto assannokkihu Yesuusi roso harunsanno daafiraati.—Isayaasi 2:2, 4.
Tenne daafira ledde afate, “Maganu Ola Olammannita Baxanno?” yaanno birxicho afidhinota Agarooshshu Shae nabbawi.
Muli yannara “keeru Magani” Yihowa, a iimi gashshootisi widoonni “gadadaamma shettotewiinni fushshannonsa.”—Filiphisiyusi Sokka 4:9; Faarso 72:14.
Isi hatto assannohu hiittoonniitiro afate, Maganu Mangiste Maati? yitanno viidiyo lai.
a Yihowa Maganu suꞌmaati.—Faarso 83:18, NW