Xaa yannara alamete aana mite 70 miliyoone meddi yitanno danqooti no; kuri giddo batinyu danqootu qaali giddo mito coyidhannoreeti; alamete aana 200 ale ikkannohu danqootu qaali no. Hige ma assinayi, danqoota duucha woyite mannu miicannonsa; konni woroonni noo rippoorte tenne leellishshanno:

•   “Alame woꞌmate, mannu duucha woyite danqootunna macca dunkino manni qoosso lashshi assanno.”—Danqootunniha Gobboomu Maamara (Yunayitid Isteetise).

•   “Buxicho gobbuwara heedhanno danqooti buxane baala roore buxaneeti; qoleno roore anga hasiisannonsa roso, looso woy mashalaqqe diafidhanno.”—Danqootunnita Kalqete Federeeshiine.

 Maganu danqoota mararannoyya? Qullaawu Maxaafi danqootu daafira mayyaanno? Yihowa Farciꞌraasine togoo manna kaaꞌlitanni noohu hiittoonniiti?

Maganu Danqoota Mararanno?

 Qullaawu Maxaafi Maganu Yihowa a danqoota lowo geeshsha mararannota kulanno. Qoleno Maganu danqoota wolu manni ledo taashshine laꞌnaranna insa isi rosiisanno roso rossara hasiꞌranno.

 Qummeeshsha: “Macciweelo xontinoonte.”—Leewaawoota 19:14.

 Qummeeshsha: “Maganu manna [dimallaadanno].”—Soqqamaasinete Looso 10:34.

 Qummeeshsha: “Yesuusi . . . Maganu Gashshootiha dancha duduwo sabbakanni . . . haꞌrami.”​—Maatewoosi 9:35.

 Qummeeshsha: Yesuusi wole agurina “macciweelootu macciishshitanno gede, danqootu coyidhanno gede [assino].”—Maarqoosi 7:37.

 Qummeeshsha: “Macciweelootu macca faꞌnitanno.”—Isayaasi 35:5.

 Tiro: Yihowa albillitte danqootu macciishshitanno yanna daggannota masaalino.

Yihowa Farciꞌraasine Danqoota Kaaꞌlitanni Noo Gara

 Alamete doyichora Yihowa Farciꞌraasine Maganu uyino hexxo danqootahono kultanno. Tenne assinanni heeꞌnoommohu hiittoonniiti? Qullaawa Maxaafanna Qullaawu Maxaafi aana xintantino viidiyubba 100 saꞌꞌannohu danqootu qaalinni qixxeessinanni heeꞌnoommo. Qoleno Qullaawa Maxaafa rosiinseemmonsa, hattono danqootu afiinni songote gambooshshe qineessineemmo. Tenne baala qixxaawo Maganu kaaꞌlo hasiꞌranno manni baalu woxe baaxxikki afiꞌranno gede assineemmo. Mayira? Yesuusi togo yee hajajino daafira: “Mulla adhitinoonnire mulla uuyye.”—Maatewoosi 10:8.

 Tenne baala qixxaawo, interneetete aana aanchine kulloonni basera afiꞌra woy elekitirooniksete uduunnichikkira dirrisiꞌra dandaatto:

 JW.ORG. Hasiꞌroottohu danqootu afiinni qixxeessinoonnire afiꞌrate, webisayitete umi adda afuu malaate kisi.

 JW Library Sign Language. Tenne appilikeeshiine silkekki aana dirrisidhe, danqootu afiinni qixxeessinoonni viidiyubba dirrisiꞌra woy interneetete aana heedheenna laꞌꞌa dandaatto.

Maganu Qaale Xiinxallate Kaaꞌlanno Uduunne

 Danqootu afiiha Qullaawa Maxaafa. Danqootu afiinni mite yine qixxeessinoonnihu woꞌmu Qullaawu Maxaafi, Ameerikunnihu Danqootu Afiinni qixxeessinoonnite Haaro Alame Tirooti. Xaa yannara Haaro Alame Tiro woꞌma woy gama batinyu afiinni qixxeessinoonni; qoleno Qullaawa Maxaafa tirrannihu danqootu afii kiiro diru dirunku lexxitanni no. (Hiikkuy hiikkuy qaalinni nooro afate woy Qullaawa Maxaafa interneete aana laꞌꞌate, “ Haaro Alame Tiro—Qullaawa Maxaafa Danqootu Afiinni” yitanno saaxine lai.)

•   Qullaawa Maxaafa danqootu afiinni qixxeessate loonseemmo loosi hiittoohoro afate, Woꞌma Haaro Alame Tiro Ameerikunnihu Danqootu Afiinni Qixxeessinoonni yitanno viidiyo lai.

•   Roore biifinse qixxeessinoonnita Qullaawu Maxaafi niwaawe macciishshate, JW Library Sign Language yinanni appilikeeshiine dirrisiꞌri. Tenne appilikeeshiine aana danqootu afiinni qixxeessinoonnihu Qullaawu Maxaafi aaninni hasiꞌrootto qummeeshsha doodhite macciishsha dandaatto.

•  Dimitironna Vitaa yinanni minaanninna minaamara lame ooso noonsa; insa danqootaho, oosonsa kay macciishsha dandiitanno. Insa Qullaawa Maxaafa danqootu afiinni barru baala laꞌꞌansa maatensara kaaꞌlitino gara wodanchi.

 Qullaawa Maxaafa xiinxallinanni viidiyubba. Yihowa Farciꞌraasine, mannu Qullaawu Maxaafi biddishsha afannonna harunsanno gede kaaꞌlitannota addi addi viidiyubba danqootu afiinni qixxeessitino; lawishshaho:

•   Adhamino manniranna maatete

•   Wedellootahonna aja dumera

•   Oosote

 Mittu manchira mitto rosiisaancho worreenna Qullaawa Maxaafa xiinxallanno. Xiinxallisannohe rosiisaancho worreenna Qullaawa Maxaafa danqootu afiinni dandookki deerrinni xiinxalla dandaatto. Qullaawa Maxaafa xiinxallinseemmo gara leellinsheemmohe gede kuꞌla dandaatto.

 Jeesen Senahonon Filippiinsi gobbara heeꞌranno manchooti. Qullaawu Maxaafi xiinxallonke isi Maganu ledo muli jaalooma kalaqiꞌranno gede kaaꞌlitinosi gara wodanchi.

 Maariyo Antunees Hondurasi gobbara beetekiristaanete murrichaati. “Alba Lowo Xaꞌmo Nooe” yitannota heeshshosi xagge nabbawatto woyite, Qullaawu Maxaafi xaꞌmuwasira dawaro afiꞌrino gara huwata dandaatto.

 Addi addi gambooshshe. Alamete doyichora danqootu afii songuwanna gaamo noonke; kuri songuwanna gaamo giddo danqootu lamalate kiiro gamba yite Magano magansidhanno. Qoleno diru dirunku Qullaawa Maxaafa ronsanniha jajjabba danqootu afii gambooshshe qixxeessineemmo. Songotenna jajjabbu gambooshshinkewa, maccano illeno baꞌinonsari rosiinsanni heeꞌnoonni roso affanno gede insa anga horoonsiꞌne malaatinsanni gede assineemmo. Qoleno ballootaho bireelete borro qixxeessine mulla tuqinseemmo.

•   Songo noo bayicho layiꞌri.

•   Qoqqowunna woradu gambooshshinke daafira afi.

•   Yesuusi reyo Qaagooshshe ledonke ayirrisi; kuni ayyaani ninkera diru giddo wole baala rooranno gambooshsheeti.

 Hose Luyis Aayaala Meksikote heeꞌranno. Isi ilami woyite danqichaho; gedensoonni qole illeno baꞌinosi. Isi uyinoonnisi kaaꞌlo adhe worba Qullaawu Maxaafi rosiisaancho ikka dandiino gara wodanchi.