Buusantino Mangistubba ayyarete gade soorro daafira hasaawate gamba yitinoha 27^ki gambooshshensa Sambata, Bocaasa 20, 2022 guxxitino. Konni gambooshshiwa, gashshaanonna fullahaano buxicho gobbuwa ayyarete gade soorramanni kainohunni daanno qarra gargadhitanno gede kaaꞌlate woxe fushshate sheemaate eꞌinoha ikkirono, batinyu manni kayinni tini konne qarra tirtannokkita wodanchino.

•   Buusantino Mangistubba dirijjitera qara borreessaancho ikkinohu Antooniyo Gutireezi Bocaasa 19, 2022nni togo yiino: “Ayyarete gade soorro gawajjitanno gobbuwa kaaꞌlate woxe fushshate sumuu yinoommo daafira hagiidhoommo.” Isi lede togo yiino: “Ikkirono hatto assa calla ikkitannokkita anfoommo . . . Pilaaneetenke xaano quuxxote giddolla no.”

•   “Muli yannara baattote aana ayyare soorrante lowore daaffukki digattanno.”—Meerii Roobinsen, Albiti Ayerilaandete pirezidaantittenna Albiti Buusantino Mangistubbara Kalaqamu Qoosso Soqqamaancho, Bocaasa 20, 2022.

 Hakko iso aja dume albillitte baatto hiikkitakka yite yaaddanno. Ikkina mangistubba mitteenni kaaꞌlante ayyarete gade soorrama abbitanno qarra hoola dandiitanno? Qullaawu Maxaafi tenne daafira mayyaanno?

 Qullaawu Maxaafi, mangistubba ayyarete gade soorrama abbitanno qarra mito geeshsha woyyeessa dandiitannoha ikkirono, konne qarra gudisse tira dandiitannokkita kulanno. Tennera korkaata ikkannoha lame coye laꞌno:

•   “Shokkashshu suwara didandaanno.”—Rosiisaancho 1:15.

   Hatto yaa mayyaate? Mannu ooso uminsa umonsa gashshitara kalaqantinore ikkitinokki daafira, uullate gashshooti xeꞌne nooho. (Ermiyaasi 10:23) Mangistubba mittimmatenni loosa dandiituro nafa, aye geeshshano diinaggaabbe loossuro, alamete qarra tirtanno wolqa diheedhannonsa.

•   “Mannu umosi baxannoha, woxe baxannoha, . . . araara giwannoha [ikkanno].”—2 Ximootewoosi 3:2, 3.

   Hatto yaa mayyaate? Qullaawu Maxaafi, yannankera mannu umosi roorsiꞌrannohanna dagooma kaaꞌlannore assate sumuu yee loosannokkiha ikkanno yee masaalino masaalo xa woꞌmitanni no.

 Ikkollana, albillitte pilaaneetenke aana noo qarra tiranno yine hexxineemmohu mannu gashshoote diꞌꞌikkino. Maganu alame woꞌma gashshate malinoha Yesuusa Kiristoosa shoomino. Qullaawu Maxaafi isi daafira kulanni togo yaanno:

•   “Isino gashshaancho ikkanno; suꞌmasino, ‘Dhaggete Amaalaancho, Wolqaataamo Magano, Hegere Anna, Keeru Roorricha’ yinanni.”—Isayaasi 9:6.

 Yesuusi Maganu Mangiste woy gashshooti Mooteeti. (Maatewoosi 6:10) Isira baattonkenna aanase heeꞌranno kalaqama towaatate wolqa, egennonna hasatto noosi. (Faarso 72:12, 16) Isi konni gordu gashshooti widoonni ‘baatto huntanni noore’ hunanno, hattono baatto wirro heeꞌrate injiitannota assanno.—Yohaannisi Ajuuja 11:18; Isayaasi 35:1, 7.

 Ayyarete gade soorro abbitanno qarra gudise hoolate kaaꞌlannohu qaru coyi maatiro ledde afate, “Ayyarete Gade Soorrante Bao Abbita Ikka? Qullaawu Maxaafi Mayyaanno?” yaanno birxicho nabbawi.