Alamete aana kuꞌu koꞌoye giwannohu, hattono wole xissiisannore coyiꞌranno woy assanno manni batiꞌrino; qoleno wole gaꞌre wido ikkitinore bade gawajjanno. Oluno halaꞌlino. Tuqu xaadooshshira togoo odoo batidhino.

•   “Israeeletenna Gaaza mereero kaino olinni hattono shittunna finqilu manninni kainohunni, xaa yannara gibbo halashshannore coyiꞌra dagoomittete miidiyi aana albinni roore lexxitino.”—Ze Niwu Yoorki Tayimis, Bocaasa 15, 2023.

•   “Birra 7 kawa, alamete aana mimmito giwanno manni, woloota gawajjannore coyiꞌranno manni, hattono wole gaꞌre bade sianno manni lowo geeshsha lexxino.”—Deenisi Firansis, Buusantino Mangistubba Dirijjite Xaphoomu Shongo prezidaante, Bocaasa 3, 2023.

 Hige mannu wole gawajjannore coyiꞌransa, finqilansanna olamansa wosincho coye diꞌꞌikkitino. Isinni Qullaawu Maxaafi biꞌree waro ‘harfaamu afiinni maxxu gede qasannore’ coyiꞌranno manni, hattono olanna finqille baxanno manni noota kulanno. (Faarso 64:3; 120:7; 140:1) Ikkollana Qullaawu Maxaafi yannankera mannu mimmito giwansa baxxitino tiro afidhinota xawisanno.

 Yannankera mannu mimmito giwanno gede assinohu lamu korkaati noota Qullaawu Maxaafi xawise kulanno.

1.  1. “Lowo manni baxilli qiidanno” yanna daggannota balanxe masaalloonni. (Maatewoosi 24:12) Duuchu manni baxillunkunni roore gibbo halaꞌlitanno gede assanno akata leellishanno.—2 Ximootewoosi 3:1-5.

2.  2. Yannankera alamete aana mannu mimmito togo giwannohu Sheexaanu Daawuloosi xagarronna bunshenni kainohunniiti. Qullaawu Maxaafi kulanno garinni, ‘alame gudisidhe bushu anga no.’—1 Yohaannisi 5:19; Yohaannisi Ajuuja 12:9, 12.

 Ikkollana, Qullaawu Maxaafi Maganu muli yannara mimmito giwate kaima ikkinore hunannotano kulanno. Qoleno togoo giwa abbitino gawajjo baalantano Maganu mulenni dhaawanno. Qullaawu Maxaafi togo yee hexxo aannonke:

•   Maganu “hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Yohaannisi Ajuuja 21:4.