“Keeru heeꞌrannohu mimmito dandiine heeꞌniro callaati.”—UNESCO Mimmito Dandee Heeꞌrate Daafira Fushshitino Lallawa, 1995.

 Mimmito dandee heeꞌra hoogguro kayinni mannu mimmito diayirrisanno; hakkiino sae mimmito giwanno. Wodanu giddo togoo hedo heedhuro, mannu duucha woyite busha qaale coyiꞌranno, mallaadanno, hattono woloota gawajjannore assanno.

 Kayinni mimmito dandee heeꞌrate daafira mannaho addi addi lao noonsa. Mitu manni mimmito dandee heeꞌrate yaa wolootu assitannore baala woy ikkitonsa baala maahoyye yee adhate yee hedanno. Wolu kayinni, Qullaawu Maxaafi yaannonte gede, mimmito dandiine heeꞌneemmo yaa wolootu doorshanna ammana sumuu yine adhineemmokkiha ikkiro nafa baxisinonsare doodhate qoossonsa ayirrinseemmo yaa ikkitinota huwatino.

 Qullaawu Maxaafi yannankera addinta mannu mimmito dandee heeꞌranno gede kaaꞌlanno?

Qullaawu Maxaafi kulannoha mimmito dandee heeꞌrate kaaꞌlanno coye

 Qullaawu Maxaafi mannu mimmito dandee heeꞌranno gede kaaꞌlanno. Togo yaanno: “Danchummaꞌne manna baalaho leelto!” (Filiphisiyusi Sokka 4:5) Qullaawu Maxaafi mannaho shaqqadda, jooguullenna mararreemmore ikkineemmo gede jawaachishannonke. Tenne amaale harunsitannori wolootu doorsha sumuu yite adha hooggara dandiitanno; kayinni woloota doodhitino dilgonsa assidhara fajjitanno ikkinnina diokkitannonsa.

 Ikkollana, Qullaawu Maxaafi Maganu mannu oosora wodho uyinonsata xawise kulanno. Togo yaanno: “Danchu coyi maatiro Kaaliiqi [kulinohe].” (Mikiyaasi 6:8) Qullaawu Maxaafi Maganu mannu oosora uyino seera kulanno; Maganu konne seera uyinonkehu woyyitinota dancha heeshsho heeꞌnammora yeeti.—Isayaasi 48:17, 18.

 Maganu wolu manni aana yoo yinammora roorre diuyinonke. Qullaawu Maxaafi yaanno garinni, “Seera aannohunna yoo yaannohu mitto Magano callaho; . . . Anfina, manna bushiishattora isi ati ayeti?” (Yaiqoobi 4:12) Maganu ninke mittu mittunku uminke doorsha doodhinammora fajjinonke; doodhineemmo coyira xaꞌmammeemmorino ninkeentilla.—Marro 30:19.

Qullaawu Maxaafi manna ayirrisate daafira mayyaanno?

 Qullaawu Maxaafi, “Manna baala ayirrisse” yaannonke. (1 Pheexiroosi 2:17) Konni daafira, Qullaawu Maxaafi wodho garinni heeꞌra doodhitannori, ammanansanna heeshshonsa gari ikkihano ikkiro manna baalanka ayirrissanno. (Luqaasi 6:31) Hatto yaa kayinni Qullaawu Maxaafi wodho harunsitannori, wolootu ammantannore baala ammantanno woy wolootu doorsha baala maahoyye yite adhitanno yaa diꞌꞌikkino. Hatteentenni, woloota woffi assantenni, Yesuusi lawishsha harunsate dandaaminsare baala assitanno.

 Lawishshaho, mitte hige Yesuusi isi harunsannokkita wole ammaꞌno harunsitanno manchonni xaadino. Qoleno hatti mancho minaannase ikkinokki manchi ledo mitteenni heedhannote; tini ikkitoseno Yesuusi sumuu yaannota diꞌꞌikkitino. Ikkirono, Yesuusi hattee mancho ayirrinyunni hasaawisino.—Yohaannisi 4:9, 17-24.

 Yesuusi gede, Kiristaanu macciishshate maahoyye yaanno mannira ammanansa daafira xawisate qixxaawinoho; tenne assannohu kayinni ‘shaqqillunninna owaantetenniiti.’ (1 Pheexiroosi 3:15, 16) Qullaawu Maxaafi, Kiristaanu ninke yinummota calla macciishshe yee manna okkannokki gede rosiisanno. Kiristoosi soqqamaancho ikkinohu “baalanka [wole ammaꞌno harunsannohano] mararannoha . . . ikka hasiissannosi ikkinnina giwama dihasiissannosi” yaanno.—2 Ximootewoosi 2:24.

Qullaawu Maxaafi manna giwate daafira kulannore

 Qullaawu Maxaafi “mannu baalu ledo keere heeꞌrate” jawaanteemmo gede amaalannonke. (Ibiraawoota 12:14) Keere heeꞌra hasiꞌranno manchi manna digiwanno. Togoo manchi ammanasi lashshi assannokkiha ikkirono, wolootu ledo keere heeꞌrate dandaamisire baala assanno. (Maatewoosi 5:9) Isinni Qullaawu Maxaafi Kiristaanu xiiwannonsa mannira danchare assatenni baarigaaransa baxanno gede nafa amaalanno.—Maatewoosi 5:44.

 Hige Qullaawu Maxaafi, Maganu manna shollishanno amanyoote woy woloota gawajjannore assinannita ‘tiyyire giwannota’ kulanno. (Lawishsha 6:16-19) Ikkollana Qullaawu Maxaafi “giwa” yaanno qaale horoonsiꞌrinohu Maganu busha assoote effire giwannota kulateeti. Qoleno Qullaawu Maxaafi Maganu heeshshonsa biddi assidhe isi seerinni gala hasidhannore maarannota kulanno.—Isayaasi 55:7.

Mimmito dandee heeꞌratenna ayirrisate daafira kultanno qummeeshshuwa

 Tiito 3:2: “Mannu ledo giwantannokkirenna arshoota, mannaho joongille leellishshannore ikkito.”

 Maatewoosi 7:12: “Mannu kiꞌnera assaꞌnera hasidhinannire baala kiꞌneno insara assensa!”

 Iyyaasu 24:15: “Magansidhinanniha techo doodhe.”

 Soqqamaasinete Looso 10:34: “Maganu manna [dimallaadanno].”

 Imbaaqoomi 1:12, 13: ‘[Maganu] busha coye assinanna lae dicincanno.’

 Roomu Sokka 12:19: “Maganoho uyitine agurre ikkinnina kiꞌne rabbisidhinoonte. Mootichu, ‘Rabba anete; rabba ani qoleemmo’ yaanno.”

 Maganu Yihowa a aye manchirano rabbisiꞌranno gede silxaane diuyino. Isi yiino yannara taashsho abbanno. Ledde afate, “Mannu Taashsho Afiꞌrate Raaranno Raare Macciishshannohu Heeꞌra Ikka?” yaanno birxicho nabbawi.