Yukireenete gobbara kaino olinna ayyarete gade soorramase, alame woꞌmate mannu albinni roore hudiꞌranno gede assitanni no. Hakko iso batinyu manni haaꞌre afooho wodhannore hoogino gobbuwara tini roore qarra ikkitino.

•   “Olu, ayyarete gade soorramase, nadaaje giira kaxxasenna woleno togoo coyibba gari sagale qixxeessine tuqinsannikki gede ataawe ikkitanni no.”—Buusantino Mangistubba Dirijjitehu qaru borreessaanchi Antooniyo Gutireezi, Maaja 17, 2023.

•   “Ruusiyu gobba gide baara widira soyate eꞌino sheemaate diigase, angate anje noo gobbuwara hakko iso Aliyye Afirikiranna Mereerimu Soojjaatira hude halaꞌlitanno gedenna sagalete hoongi amadanno gede assitanno yite xiinxallaasine himantanni no.”—Atalayar.com, Maaja 23, 2023.

 Hanni Qullaawu Maxaafi sagalete hoongi daafiranna albillittete yanna daafira yaannore laꞌno.

•   Yesuusi togo yee masaalino: “Daga dagate aana, gashshootuno gashshootu aana ola kayisanno; addi addi darga hude ubbanno.”—Maatewoosi 24:7.

•   Qullaawu Maxaafihu Ajuujate maxaafira shoole faradaasine kulloonni. Kuri giddo mittu olaho lawishshaho. Isira hoodete hudete lawishsha ikkino farashshaanni gulufe no; tinino gari sagale heedhannokkitanna hattino giira kaxxitannota leellishshanno. “Kolishsho farashsho afummo; farashsho gulufe noohu keenaasincho anga haaꞌre no. . . . ‘Mittu barri loosi kirira, kiilote darate ikkitanno qamadenna mitte kiilonna darate ikkanno hayixe calla uyinona . . .’ yaanna macciishshummo.”—Yohaannisi Ajuuja 6:5, 6.

 Sagalete anje heedhannota kultannoti tini Qullaawu Maxaafi masaalo xaa yannara woꞌmitanni no; tenne yanna Qullaawu Maxaafi “goofimarchu barra” yaanno. (2 Ximootewoosi 3:1) Tenne ‘goofimarchu barruwanna’ Ajuujate maxaafi giddo kulli gulufaasine daafira ledde afate, Alame 1914 Kawa Soorrantino yitanno viidiyo lai; “Farado Guluffinori Shoolu Ayeooti?” yaanno birxichono nabbawi.

•   Qullaawu Maxaafi qarra ikkanno coye, lawishshaho sagale giira kaxxiturono wole agurina hude heedhurono cincine saꞌꞌate kaaꞌlitanno amaale kulanno. Tennera mito lawishsha laꞌꞌate, “Shiimu Woxinni Heeꞌra Dandiinanni Gara” yaanno birxicho nabbawi.

•   Qoleno Qullaawu Maxaafi woyyitino alame daggannota kule hexxo aannonke. ‘Baattote aana gidunna jajju woꞌmannotinna’ mannu baalunku sagale duuwanno yanna daggannota kulanno. (Faarso 72:16) Maganu Qaali kulannote tenne hexxorenna tenne hexxo addaxxa dandaattohu mayiraatiro ledde afate, “Woyyitino Yanna Dagganno Yine Hexxa Dandiineemmo?” yaanno birxicho nabbawi.