Ammajje 24, 2022 soodimaroho Ruusiyu gashshooti Yukireene horra hanafino; alamete gashshaasine kuni ikkannota hoolate sharranturono diqiniinonsa. Kuni oli alame gawajjara dandaannohu hiittoonniiti? Buusantino Mangistubba Dirijjitehu qaru borreessaanchi Antooniyo Gutireezi boodu barri albaanni togo yiino: “Kuni oli abbanno qarrinna bao hattono Awuroppu gobbuwahanna alame woꞌmate keere hunanno gari heda dandiineemmohura nafa aleenniiti.”

•   Yesuusi Kiristoosi “gosa gosate aana, gashshootu gashshootu aana ola kayisanno” yanna daggannota balaxe masaalino. (Maatewoosi 24:7) Yannankera noo oli Yesuusi coyiꞌrino masaalo woꞌmitanni noota leellishanno gara huwatate, “‘Goofimarchu Barri’ Malaati Maati?” yaanno birxicho nabbawi.

•   Qullaawu Maxaafihu Ajuujate maxaafi giddo, ola ‘duumo farashsho gulufe’ “gobbate aaninni keere hunanno” faradaasinchi ledo heewisiinsoonni. (Yohaannisi Ajuuja 6:4) Tini masaalo yannankera noo ola kultannota ikkitinota huwatate, “Shoolu Faradaasine Ayeooti?” yaanno birxicho nabbawi.

•   Daanieeli maxaafi giddo ‘aliyye mootenna’ “wodiidi moote” mimmito okkitannota woy xiibbannota balanxe masaalloonni. (Daanieeli 11:25-45) Ruusiyunna miillasi aliyye mooteeti yineemmohu mayiraatiro huwatate, Woꞌmitino Masaalo—Daanieeli Fooliishsho 11 yitanno viidiyo lai. a

•   Ajuujate maxaafi, ‘Woꞌmanka Dandaanno Maganihu batiꞌru barri oli’ daafirano kulanno. (Yohaannisi Ajuuja 16:14, 16) Ikkollana, hakku oli xa laꞌnanni heeꞌnoommo oli gede dagate mereero kaꞌꞌannoha diꞌꞌikkino. Konni albillitte kaꞌꞌanno oli daafira ledde afate, “Armagedooni Oli Maati?” yaanno birxicho nabbawi.

•   Qullaawu Maxaafi, Maganu “baattote qacce geeshsha nooha ola uurrisanno” yaanno. (Faarso 46:9) Maganu abbara qaale einote albillittete yanna daafira ledde afate, “Woyyitino Yanna Dagganno Yine Hexxa Dandiineemmo?” yaanno birxicho nabbawi.

•   Yesuusi rosaanosi Maganu Mangiste daggara huuccidhanno gede rosiisino. (Maatewoosi 6:9, 10) Hatti Mangiste Maganu baattote hedinore wonshannoho gordu gashshooteeti; Maganu hedinori giddo mittu alame keere ikkitanno gedeeti. Maganu Mangiste atera kaaꞌlitannohehu hiittoonniitiro afate, Maganu Mangiste Maati? yitanno viidiyo lai.

 Yukireenete 129,000 saꞌannori Yihowa Farciꞌraasine no. Wole baalante gobbuwara heedhanno roduuwinsante gede, insano poletiku coyira anga diwodhitanno hattono olaho dikarsantanno; konni garinni Yesuusi faale hadhanno. (Yohaannisi 18:36) Yihowa Farciꞌraasine mannu ooso qarra baalanka oluno gatikkinni hunannohu Maganu Gashshoote ikkinota affino daafira, ‘konne Gashshootunniha Dancha Duduwo’ alame woꞌmate dudubbanni no. (Maatewoosi 24:14) Qullaawu Maxaafi kulanno hexxo daafira ledde rosate, hasaawinseemmohe gede kuꞌla dandaatto.