Yaaddo a amaddino mancho hedatto woyite, waajje wolqa bainoha, soodo maꞌnanni kaꞌꞌa gooddo ikkitinosiha woy woꞌmanka woyite qarrisi daafira calla hasaawanno mancho hedattoha ikkara dandaanno.

 Yaaddo amaddinohu mitu manni hatto ikkara dandaanno. Ikkollana xiinxallaano, mitu manni hakko iso labballu yaaddo amaddannonsa woyite wole akata leellishshannota buuxxino. Mitte rippoorte kultanno garinni, labballu “yaaddo gargadhate roore anga agohonna jingilli assitanno xaggara higganno; hakko daafira, mitto mancho agu araado qarrissannosiha ikkiro, tini quwa saꞌino yaaddo noosita leellishanno malaate ikkitara dandiitanno. Qoleno duucha woyite labballu yaaddo amaddannonsa woyite hanqitanno, hattono caaccaabbanno.”

 Hige yaaddo amaddino labballi baalunku hatto ikkanno yaa diꞌꞌikkino. Mannu yaaddo amadduro ikkanno gari babbaxxinoha ikkirono, xaa yannara yaaddo roore batidhino; korkaatuno heeꞌnoommohu “qarrissanno yanna” giddooti. (2 Ximootewoosi 3:1) Yaaddo amaddinoheha ikkiro, Qullaawu Maxaafi kaaꞌlannohe?

 Qullaawu Maxaafi giddo yaaddo gargadhate kaaꞌlitannoti lowo amaale no. Hanni kuri giddo sase laꞌno.

1.  1. “[Gaꞌi] umisira yaadannona, gaꞌara yaaddinoonte. Mittu mittunku barrira umisi qarri ikkannosi.”—Maatewoosi 6:34.

    Hatto yaa mayyaate? Albillitte ikkarano hoogarano dandaanno coyira quwa saꞌne yaada dihasiissannonke. Duucha woyite, ikkanno yine yaandoommohu bushu coyi ikkikki gatanno. Mito woyite isinni, waajjinoommo coyi soorrame dancha ikkanno.

    Togo assate woꞌnaali: Konni albaanni ikkanno yite waajjite heedheenna ikkikki gatino coye qaagate woꞌnaali. Hakkiinni, xa yaachishanni noohe coyi daafira, ‘Kuni coyi addinta ani hedummo gede lowo qarra kalaqara dandaanno?’ yite hedi.

2.  2. “Siwiilu siwiila gamaxannonte gede, mannuno manna gamaxanno.”—Lawishsha 27:17.

    Hatto yaa mayyaate? Wolootu kaaꞌlitankera maahoyye yinummoro, yaaddo qeeꞌlineemmo gede kaaꞌlitankera dandiitanno. Insa heeshshonsa giddo laꞌino coyinni, kaaꞌlitanno amaale uyitankera dandiitanno. Ajayi ajeenna, yaachishinonke coye wolu garinni laꞌneemmo gede kaaꞌlitankera dandiitanno.

    Togo assate woꞌnaali: Dancha amaale aahera dandaanno manchi ayetiro hedi; hakko iso atera iillinohe qarri iille egenninosiha ikkiro roore kaaꞌlahera dandaanno. Isira kaaꞌlinosiri maatironna kaaꞌlinosikki coyi maatiro xaꞌmi.

3.  3. “Kiꞌnere malannohu isootina [Maganohona], qarrisannoꞌnere baala isi aana tuqqe.”—1 Pheexiroosi 5:7.

    Hatto yaa mayyaate? Maganu qarrante yaaddanni noore lowo geeshsha mararanno. Isi yaachishannonke coye baala huuccattotenni isira kuꞌlinammora koyisinonke.

    Togo assate woꞌnaali: Yaachishanni noohe coye baalanka borreessi. Hakkiinni, mitto mittonka qarra Maganoho xawisse kultanni, dandiite heeꞌratto gede kaaꞌlahera huucciꞌri.

 Qullaawu Maxaafi yaaddo gargadhate kaaꞌlitanno amaale oye calla diaguranno. Xaa yannara yaachishannonke coyi baalunku muli yannara hegerera baꞌꞌannotano kulanno. Kuni ikkannohu hiittoonniiti?

 Maganu Gashshooti yaaddote kaima ikkannore hunanno. (Yohaannisi Ajuuja 21:4) Isinni hakkunni Gashshooti yannara, yaandeemmo gede assinonkere qaange dixissiisiꞌneemmo.—Isayaasi 65:17.

 “Keere aanno Magani” atino hattee heeshsho ragiꞌrattora hasiꞌranno. (Roomu Sokka 16:20) Isi togo yee hexxo uyinonke: “Kiꞌnera hedeemmore ani egennoommo; hedoꞌyano hexxonna albillittete ikkitannoꞌne gede, keerunnite ikkinnina bunshennita diꞌꞌikkitino.”—Ermiyaasi 29:11.