Yannankera Noo Hude Daafira Qullaawu Maxaafi Mayyaanno?

FANI

“Hude huna.” Alamete gashshaasine mannu ooso qarra tirate fushshidhino mixo giddo mitte tenneeti: mannu baalu sagale afiꞌranno gede assite hude hunate. a Ikkina alamete aana hude horonta heedhannokki yanna dagga ikka? Qullaawu Maxaafi isi mayyaanno?

Yannankera hude heedhannota Qullaawu Maxaafi giddo balanxe masaalloonni

Qullaawu Maxaafi tenne ninke heeꞌnoommo yannara hude heedhannota balaxe kulino; tenne yanna “goofimarchu barra” yinanni. (2 Ximootewoosi 3:1) Hude abbinohu Magano diꞌꞌikkino; ikkirono isi kuni qarri heeꞌrannota balaxe kulinonke. (Yaiqoobi 1:13) Hanni lame Qullaawu Maxaafi masaalo laꞌno.

“Addi addi darga hude . . . ikkanno.” (Maatewoosi 24:7) Tenne masaalora kulloonni garinni, gobba baalate hude ubbanno. Muli yannara sagalete tuqishshi daafira xiinxallitanno mannooti fushshitino rippoorte togo yitanno: “Alamete aana hude, sagalete anjenna taaltino sagale hoonge hunate assinanni heeꞌnoonni sharro kaaꞌlite yitinori dino; isinni coyi roore bushanni haꞌranni no.” b Batinye gobbara heeꞌrannohu lowo miliyoone ikkanno manni hasiissannonsa sagale afiꞌra didandaanno. Hige ma assinanni, konninni kainohunni lowo manni reyanno.

“Kolishsho farashsho afummo; farashsho gulufe noohu keenaasincho anga haaꞌre no.” (Yohaannisi Ajuuja 6:5) Tenne masaalo giddo, masalsine kulli farashshinna iso gulufino farashshaanni, goofimarchu yannara heedhanno hudera lawishshaho. c Konni farashshaanni anga noo keenaasinchi, noota shiima sagale keenne baalaho tuqinsannita leellishannoho. Kuni farashshaanni gulufanno woyite, sagale waaga giira kaxxitanno daafira noo sagale daddaꞌlinanni gede kultanno huuro macciishshantino. (Yohaannisi Ajuuja 6:6) Tini masaalo yannankera nooha sagalete qarra dancha gede assite kultannote; alamete aana lowo biliyoone ikkanno manni dancha sagale afiꞌra woy hidha didandiino.

Hude baꞌanno gara

Xiinxallaasine yitanno gara ikkiro, baatto aanase noo mannira ikkite gattanno geeshshi sagale laashshitanno. Hatto ikkina, manna sagalete hoongi amadanno gede assinori maatiyya? Qoleno Qullaawu Maxaafi, Kalaqaanchinke Yihowa d konne qarra tirate maa assanno yaanno?

Qarra: Hude abbitannota buximanna taashshote xeꞌne gashshaasine hoolte diaffanno.

Mala: Guuta ikkinokkihu mannu gashshooti baeenna guutu gashshooti yaano Maganu Mangiste gashshitanno. (Daanieeli 2:44; Maatewoosi 6:10) Yannankera batinye buxanera sagale afiꞌra gooddo ikkitannonsa; Maganu Gashshooti yannara kayi togoo qarri diheeꞌranno. Qullaawu Maxaafi Maganu Gashshooti Moote ikkinohu Yesuusi Kiristoosi daafira kulanni togo yaanno: “Qarraataamo woshshiꞌrannosi woyite gatisannosi; buxichonna gadadaamo kaaꞌlanno. Baatto gide laashshito; ilaallate aana jajju woꞌmo.”—Faarso 72:12, 16.

Qarra: Olu lowore hunanno, qoleno ikonoome gananno; tini qolte mannu hasiissannonsa sagale hooganno gede assitanno.

Mala: “[Yihowa] baattote qacce geeshsha nooha ola uurrisanno; digaana hiiqqanno; amaxxo cancananno; wonqono giire hunanno.” (Faarso 46:9) Maganu olu bagadono ikko ola kayisanno manna hunanno. Konni garinni, mannu qarramikkinninna yaadikkinni sagale afiꞌranno gede assanno. Qullaawu Maxaafi, ‘keeraano qawaaxxidhannotanna jiro woy keeru batiꞌrannota’ kulanno.—Faarso 72:7.

Qarra: Kalaqamu danonninna ayyarete gade soorramanni gidunna saada gooffanno.

Mala: Maganu baattonnita kalaqamu wolquwa aada asseenna sagale kaasiꞌre fushshiꞌrate injiitannota ikkitanno. Qullaawu Maxaafi togo yaanno: “[Yihowa] gugganno hombobolatte gabbi assi; dambaluno sammi yii. Galagalche halalla kofammate, moola gobba lolakkanno xashshuwara soorri. Hudiꞌrino manni hakkiicho heeꞌranno gede assi; . . . Gate gide wixidhu; woyinete haqqeno kaasidhu; lowo jajjano gamba assidhu.”—Faarso 107:29, 35-37.

Qarra: Hafuuraamunna maaeelu manni daafantino sagale qixxeessanno; woy sagale mannaho iillitannokki gede assanno.

Mala: Maganu Gashshooti bushanna hafuuraamo manna baala hunanno. (Faarso 37:10, 11; Isayaasi 61:8) Qullaawu Maxaafi, Maganu Yihowa “Shettinorira halaale coyiꞌranno; hudidhinorira sagale aanno” yaanno.—Faarso 146:7.

Qarra: Diru dirunku, alamete aana noo sagale giddo sase anga ikkitannota fushshine hunnanni.

Mala: Maganu Gashshooti giddo sagale diafimalsinanni. Yesuusi uullate aana noo waro, sagale mulla hunnannita hoolino. Lawishshaho isi mitte hige, maalaletenni 5,000 saꞌꞌanno manna itisino. Isi gedensoonni rosaanosi togo yee hajajino: “Shiimuno baikkinni intanna gatino hambaa gamba asse!”—Yohaannisi 6:5-13.

Maganu Gashshooti hudete kora ikkino coye baala hunanno daafira, mannu baalunku falakkinota taaltino sagale afiꞌre hagiidhanno. (Isayaasi 25:6) Maganu Gashshooti tenne assannohu mamarootiro afate, “Maganu Mangiste Uulla Gashshitannohu Mamarooti?” yaanno birxicho lai.

a Buusantino Mangistubba Uurrinsha wido ikkitino gobbuwa baala 2015nni sumuu yite 2030nni hasaawate wodhitino haja.

b Buusantino Mangistubbati Sagaletenna Irshu Uurrinsha, Irshu Lopho Irkissannoti Alamete Doyicho Uurrinsha, Buusantino Mangistubbati Qaaqquullu Kaaꞌlo Uurrinsha, Buusantino Mangistubbati Alamete Sagalete Uurrinshanna Alamenniti Fayyimmate Uurrinsha mitteenni qixxeessitino rippoorte.

c Ajuujate maxaafira kulloonniri shoolunku faradaasine daafira ledde afate, “Farado Guluffinori Shoolu Ayeooti?” yaanno birxicho lai.

d Yihowa Maganu suꞌmaati. (Faarso 83:18) “Yihowa Ayeti?” yaanno birxicho lai.