Hanni Yesuusi yannara Galiilaho noottohu gede assite hedi. Daasu Ayyaana ayirrisate Yerusaalame haꞌrootto. Haammatu Magano magansiꞌranno manni konne ayyaana ayirrisate xeertowiinni dayino daafira katamu giddo kandanniwi dino. Ati Yihowara kakkalo shiqishiꞌra hasiꞌrootto. Konnira meichokki goshooshidhanni injiitannokkinna mannu batiꞌreenna ruukkitino doogo amadde qullaawu mini noowa haꞌra hanafitto. Qullaawu minira iillatto wote atente gede kakkalo shiqishiꞌranno manni hakko woꞌme no. Jeefoteno ate tari iilleenna meichokki amadde kakkalaasinchu albaanni maritto. Tenne giddo mittu giwamootto rodiikki qulli yiihe, kuni rodiikki hakko mannu woꞌminowa woy wolewa katamu giddo heeꞌrara dandaanno. Yesuusi togoo coyi kalaqamanno wote maa assa hasiissannohero xawisino. (Maatewoosi 5:24 nabbawi.) Yesuusi kulino garinni atinna giwamootto rodiikki araarama woy salaame kalaqa dandiitinannihu hiittoonniiti? Woroonni kulloonni doorshi giddo gara ikkinoha malaatisi.

ATI ASSA HASIISSANNOHERE

• Rodookki hasaawisa hasiissannohehu iso hanqanno gede assinori noota buuxitto gedensaanni callaati

• Rodiikki coye iibbabbishinoha woy soꞌrinoha ikkiro iso ammansiisse biddi assate woꞌnaala hasiissannohe

• Rodiikki hedosi coyiꞌranna cincite macciishsha, hattono yaannore gudde buuxa hoogittoro nafa koffi yiinoheteranna hedoottokkiri ikkinotera giddokkinni maaro xaꞌmira

RODIIKKI ASSA HASIISSANNOSIRE

• Wolootu songote giddo noo roduuwira koffi asoottosire kule kaaꞌlo hasiꞌra

• Atera hanqe coyira, koffi assoottosire mitto mittonka coye kulehe bushu ate ikkoottota ammansiisa

• Ati iso hasaawisate umokki heeshshi assoottota huwate wodaninni gatona yaa hasiissannosi

Yannankera Maganoho saadate kakkalo shiqinsheemmokkiha ikkirono, Yesuusi rodiinke ledo noonke salaamenna Magano hagiirsiisanno garinni magansiꞌrate mereero noo fiixooma kulinohu hiittoonniiti?