Diro kiiro Yihowa manni Qaagooshshu Ayyaana mitteenni ayirrisate quqquxamanno. Qaagooshshu Ayyaanira albaanninna gedensaanni noo lamalara, wodote kakkalora galatu noonketa leellishate Yihowa guwisiˈneemmota baxxitino faro afiˈneemmo. (Ef 1:3, 7) Lawishshaho Qaagooshshu Ayyaanira daanno gede manna koyisate sharrammeemmo. Mitootu Badheessunna Dotteessu aganira 30 woy 50 saate soqqante kaaˈlaano suwisaano ikkate mixo fushshidhanno. Kiˈneno Qaagooshshu Ayyaani woggara albinni roore soqqama dandiitinanni? Togo assitinanni gede kaaˈlannoˈneri maati?

Duucha woyite, balanxe qixxaambeemmoha ikkiro hendoommori qinaanno. (La 21:5) Qaagooshshu Ayyaana ayirrinsanni wogga iillitanni noo daafira xaanni qixxaawa hasiissannonke. Qaagooshshu Ayyaani woggara soqqanshoˈne halashshiˈra dandiitinanni gara hedde hattono mixoˈne wonshiˈrate maa assa hasiissannoˈnero hiince. Hakkiinni Yihowa assitinannire maassiˈrannoˈne gede huuccidhe.—1Yo 5:14, 15.

Qaagooshshu Ayyaani woggara soqqanshoˈne halashshiˈra dandiitinanniti mite doogga hiikkuriiti?