Kiristaanu Muse Seeri hunda nooha ikka hoogirono, Maganonna olliichonke baxa hasiissannonketa kultannoti baalanta roortannoti lame hajajo, Yihowa maa assinammora hasiˈrannoro xaphi assite kultannonke. (Mt 22:37-39) Togoo baxilli mulla afiˈnanniha diˈˈikkino. Kuni baxilli heeˈranno gede assiˈra hasiisannoho. Hiittoonni? Mitte qara doogo Qullaawa Maxaafa barru baala nabbawate. Qullaawa borro giddo kulloonnita addi addita Maganu akatta xiinxallinummoro, Yihowa “danchumma laˈneemmo.” (Fa 27:4) Tini Maganoho noonke baxilli lexxanno gedenna hedonkeno isite gedeeta ikkitanno gede assitannonke. Tini qolte, Maganu uminke horo agurre wolu mannira baxille leellinshammora hajajinonke hajajo agadhineemmo gede kakkayisannonke. (Yoh 13:34, 35; 1Yo 5:3) Aane noohu sasu coyi Qullaawu Maxaafi niwaawe roore baxissannota assiˈrate kaaˈlannoho:

• Nabbawattore seekkite hedi, huwatote bisi kifillakki horoonsiˈri. Hakko noottohu gede assite hedi. Qooxeessaho noore lai, huuro macciishshi, foole suˈniissi hattono Qullaawu Maxaafi xagge giddo kulloonni mannira mayi macciishshaminonsaro huwatate woˈnaali.

• Addi addi hayyo horoonsiˈri. Aanchine kulloonnire horoonsiˈri: Huurokki naggi assite nabbawi woy qoonqote qaddaˈnoonni borro macciishshi. Qullaawa Maxaafa fooliishshote aante garinni nabbawantenni, giddosi kulloonni manchi xagge aana woy mitte hajo aanna illachishshe nabbawi. Lawishshaho Yesuusi daafira roore afate Maganu Qaale Xiinxalli yitanno biroshere gafa 4 woy 16 nabbawa dandaatto. Barru qummeeshsha nabbawatto wote qummeeshsha haˈnoonni fooliishsho woˈma nabbawi. Qullaawa Maxaafa, borreessinoonni aante garinni nabbawi.

• Nabbabbanni noottore huwatate woˈnaali. Nabbambe gudate yine lowo fooliishsho nabbawantenni, mitto barra mitte fooliishsho nafa ikkituro nabbambenna hiincine huwata woyyitanno. Mamiwaro (hakkawaro noo ikkitonna yanna) wodanchate woˈnaali. Mitto mittonka coye hedi. Kaartuwanna fiixxanno hedo kultanno qummeeshshuwa horoonsiˈri. Nabbawatto wote leellinohekkiri giddo ajayi ajeenna mitto coye buuxate xiinxalli. Dandaamannoha ikkiro, nabbawate gaaˈmootto geeshshi yanna hiincateno gaaˈma dandaatto.