HASIISSANNOHU MAYIRAATI? Qullaawu Maxaafi rosaano qixxaabbannoha ikkiro rosiinseemmonsare wodanchanna qaaga dandiitanno. Roore wodanchitanninna qaagganni hadhu kiiro, ayyaanaamittetenni rakke lophitanno. Insa cuuantu gedensaanni nafa, ‘jaatte woy baqqi yite agadhate’ woꞌmanka wote gambooshshehonna soqqanshote qixxaawa hasiissannonsa. (Mt 25:13) Xiinxallinanni gara affuronna dancha xiinxallote gade heedhunsaro heeshshonsa diro baala horo afidhanno. Qullaawa Maxaafa biddiitto xiinxallisa hananfanni heeꞌnenni, rosaanonke xiinxallote qixxaawa roso assidhanno gede kaaꞌla hasiissannonke.

TENNE ASSA DANDIINANNI GARA:

• Dancha lawishsha ikke. (Ro 2:21) Mitto mittonka xiinxallissinanni gafa rosaanoꞌne heddinanni qixxaabbe. (km 11/15 3) Rosaanchiꞌnera qixxaabbinoonni borro leellishshesi

• Qixxaawanno gede jawaachishshe. Xiinxallisa hanaffini gedensaanni rosaanchiꞌnera, qixxaawa Qullaawa Maxaafa xiinxallate wido ikkitinota afanno gedenna tenne assasinni afiꞌranno horo kullesi. Qixxaawate yanna gaaꞌma dandaannohu hiittoonniitiro leellishshesi. Mitu roduuwi Qullaawa Maxaafa xiinxallissanno wote rosaanonsa qixxaawa afidhino horo huwattanno gede kaaꞌlate, insa qixxaabbino borro uyitannonsa. Qixxaabbe dagganno wote galattensa

• Qixxaabbanno gara leellishshensa. Mitu roduuwi umonni, xiinxallissanno yanna horoonsidhe Qullaawu Maxaafi rosaanonsara qixxaabbanno gara leellishshannonsa