Yihowa ledo muli jaalooma kalaqiˈra dandaannohu amanyootunni xuru noonsakki manna callaho. (1Ph 1:14-16) Qullaawu Maxaafi rosaano busha rosicho qeeˈlituro, maatensa heeshshonna fayyimmansa woyyaabbanno; hattono woxu qarri diamadannonsa.

Yihowaha amanyootu seeranna isi konne seera uyinonkehu mayiraatiro hattono konne seera harunsa kaaˈlitannonke gara xawissine kullensa. Rosaanoˈne heddanno gara biddi assidhanno gede kaaˈlensa; insa heddanno gara biddi assidhuro assootensano biddi assiˈra dandiitanno. (Ef 4:22-24) Rosaanoˈne Yihowa kaaˈlonni lowo diro qarrisinonsaha busha rosicho qeeˈla dandiitannota kullensa. (2Qo 4:7) Insa cubbo loosate doogantanno woyite, Yihowa kaaˈlansara eeggifatte huuccidhanno gede rosiissensa. Fonqolo ikkannonsa coye affe qorophitanno gede kaaˈlensa. Insa busha rosicho agurte dancha coye assitanno gede jawaachishshensa. Qullaawu Maxaafi rosaanoˈne Yihowa kaaˈlonni heeshshonsa biddi assidhanna laˈinanni woyite lowo geeshsha hagiidhitinanni.

QULLAAWU MAXAAFI ROSAANOˈNE BUSHA ROSICHO AGURTANNO GEDE KAAˈLENSA YITANNO VIIDIYO LAˈINIHU GEDENSAANNI, AANTE NOO XAˈMUWARA DAWARO QOLATE WOˈNAALLE:

• Songote cimeeyyenna Niita, Jeedi busha rosicho qeeˈlitanno yite hexxitannota leellishshinohu hiittoonniiti?

• Niita, Jeedi ledde kaaˈlitinosehu hiittoonniiti?

• Jeedi Yihowa kaaˈlo hasidhinohu ma garinniiti?