Xaa yannara kalaqamu dano albinni roore rosantinota ikkitino. Dano kalaqantanno woyite, kaaˈlo hasiissannonsare qinaawino garinni kaaˈla hasiissanno. Aliidi Bisi baalante sinu biirora, Dano Kalaqantanno Woyite Kaaˈlanno Goli heeˈranno gede assinohu iseraati.

Konni golira loossanno roduuwi dano kalaqantinota affuro, halashshaanote mayi kaaˈlo hasiissannoro afate bayichonkonni songote cimeeyye ledo xaaddanno. Dano abbitino gawajjo qooxeessu halashshaano biddi assa dandiitannokkita ikkituro, sinu biiro kaaˈlo hasiissannonsare kaaˈlate looso massagganno gede dandoo noonsa roduuwa gaantanno. Kuri roduuwi, roduuwu uminsa fajjonni kaaˈlitanno gede woy mito coye shaqqillunni uyitanno gede xaˈmitara hattono hasiisannore hirte beekkara dandiitanno.

Konni garinni kaaˈla lowo horo afidhino. Tini, mannu wolqa mulla gooffannokki gede, coyi gurchaawannokki gedenna womaashshunna uduunnichu afimalannokki gede kaaˈlitanno; roduuwu uminsanni calla kaˈe assitannoha ikkiro togoo qarri kalaqamara dandaanno.

Sinu biiro shoontino roduuwi dano kalaqantinowa mageeshshi woxinna kaaˈlannohu mageeshshi manni hasiisannoro murtanno. Qoleno insa qooxeessu gashshaano ledo hasaabbara dandiitanno; kuri gashshaano kaaˈlo hasiissannonsa roduuwinkera ranke iillineemmonsa gede kaaˈlitannonke. Hakko daafira, umiˈnenni kaˈine woxe gamba assitinoonte, dano kalaqantinowa mitore sokkinoonte woy kulliˈnekkinni hakko qooxeessa hadhinoonte.

Ikkirono dano kalaqantanno woyite kaaˈla hasiˈneemmo. (Ib 13:16) Ammanate roduuwanke banxeemmonsa! Insa kaaˈlate ma assa dandiineemmo? Roorenkanni, kalaqamu danonni gawajjantino roduuwiranna insa kaaˈlitanni noo roduuwi daafira huuccatto assa dandiineemmo. Qoleno alamete doyicho loosi widoonni woxe fushsha dandiineemmo. Sinu biiro, Aliidi Bisi aanno biddishshi garinni kuni woxi roore hasiisannohu hiikko qooxeessiraatiro seekkite affino. Mittu mittunku konni loosira kaaˈlama hasiˈnummoro, Qooxeessunnite Akeekunna Gimbaatu Kifile Forme (DC-50) wonsha dandiineemmo.

BIRAAZILETE GOBBA LOLAHU BAASA GAWAJJINO YITANNO VIIDIYO LAˈINIHU GEDENSAANNI AANTE NOO XAˈMORA DAWARO QOLATE WOˈNAALLE:

Biraazilete 2020nni lolahu dano kalaqantu gedensaanni Yihowa Farciˈraasine manna kaaˈlate assitinori giddo dhagge ikkinoheri maati?