Soqqanshote horoonsiˈneemmoti, Qullaawa Maxaafa xiinxallate daafira kultannoti shoole viidiyo noonke. Tenne mitte mittenta viidiyo qixxeessinoonnihu maa hendeeti?

• Qullaawa Maxaafa Xiinxalla Hasiissannohu Mayiraati?—Woˈma Viidiyo: Tenne viidiyo qixxeessinoonnihu mittu manchi ammaˈno ikkitutano ikkituro Qullaawa Maxaafa xiinxallate hasatto heedhannosi gede assateeti. Tini viidiyo mannu huluullitannonsa xaˈmuwara dawaro Qullaawu Maxaafi giddonni hasiˈranno gede jawaachishshanno; hattono Qullaawu Maxaafi giddo ammansiissanno taje noota kultanno. Qoleno Qullaawa Maxaafa xiinxalla hasiˈranno manni xiinxallo hanafate xaˈmiˈra dandaanno gara kultanno.

• Qullaawa Maxaafa Xiinxalla Hasiissannohu Mayiraati? (harancho) yitanno viidiyo, woˈma viidiyo ledo mittu garite; kayinni mitto daqiiqa saˈe yitannori dino. Roorenkanni tenne viidiyo qixxeessinoonnihu hasaawate gari yanna afiˈrinokki manniraati.

• Qullaawa Maxaafa Xiinxallinseemmohu Hiittoonniiti? yitanno viidiyo qixxeessinoonnihu mannaho Qullaawa Maxaafa mulla xiinxallinseemmota kulateeti; hattono tini viidiyo xiinxallinseemmo gara lainohunni mannu xaˈmara dandaannote mite xaˈmora dawaro qoltanno; qoleno xiinxalla hasiˈranno manni xiinxallinsansara xaˈmiˈra dandaanno gara kultanno.

• Qullaawu Maxaafi Xiinxallora Hawalle Keere Dayootto yitanno viidiyo qixxeessinoonnihu Qullaawa Maxaafa xiinxallanno mannira leellishateeti. Tini viidiyo Hegerera Hagiidhitanni Heeˈra Dandaatto! yaanno maxaafa qoola lame egensiissannoha ikkirono, Hegerera Hagiidhitanni Heeˈra Dandaatto! yitanno biroshere xiinxallinsanni woyiteno leellisha dandiinanni. Qoleno tini viidiyo maxaafu amadonna rosaanchu xiinxallannohu hiittoonniitiro xawissanno.

Mitte mittenta viidiyo qixxeessinoonni korkaati heeˈrirono, hasiissanno yannara kuri viidiyubba mannaho leellisha woy soya dandiineemmo. Kuri viidiyubba seekkitine egentinanni gedenna soqqanshote yannara danchu garinni horoonsidhinanni gede jawaachinsheemmoˈne.