Yihowa cincasi gooffeenna tenne busha alame muli yanna giddo hunanno. Kaphu ammaˈno baˈanno, buusantino daga Maganu manna siˈanno hattono Yihowa Armagedooni yannara bushuulle gudanno. Kiristaanu tenne dhagge ikkitanno yanna quqquxame agadhanno.

Hige bayiru qarri yannara ikkannoha mitto mittonka coye dianfoommo. Lawishshaho kuni qarri hanafannohu mamooteetiro dianfoommo. Poletiku gashshaano kaphu ammaˈno hunate kaˈanno gede assannonsari maatiro dianfoommo. Daga Maganu manna siˈanni mageeshshi yanna keeshshitannoro woy ma garinni siˈannoro dianfoommo. Qoleno Yihowa Armagedooni yannara bushuulle hunate maa maa horoonsiˈrannoro dianfoommo.

Ikkirono Qullaawa Borro tenne albillitte dagganno yanna waajjineemmokki gedenna worbuulle ikkineemmo gede kaaˈlitanno mashalaqqe kultannonke. Lawishshaho heeˈnoommohu “goofimarchu barra” ikkinota anfoommo. (2Xi 3:1) Halaalaancho ammaˈno baˈannokki gede kaphu ammaˈno siˈnanni barruwa ‘haraˈmitannota’ anfoommo. (Mt 24:22) Yihowa mannasi gatisannota anfoommo. (2Ph 2:9) Qoleno Yihowa bushuulle hunanno gedenna lowo manni Armagedooni gate saˈˈanno gede assate doorinohu Yesuusi keeraanchonna wolqaataamo ikkinota anfoommo.—Aj 19:11, 15, 16.

Albillitte dagganno yanna mannu “waajje daaqanno” gede assitannoti egennantinote. Ikkirono, Yihowa konni albaanni mannasi gatisino garanna isi albillitte ikkannori daafira kulinore nabbawanna hiincanke gatonke barri iillinota addaxxine ‘iima hinge laˈneemmo’ gede assitannonke.—Lu 21:26, 28.