Boohaarsha hayyotenni doodha hasiissannonkehu mayiraati? Korkaatuno filme laˈnammora, muuziiqa macciishshinammora, webisayite daaˈˈantammora, maxaafa nabbambammoranna, viidiyote geeme godoˈlinammora doodhineemmo woyite, surrenke giddora eanno coye doodhinanni heeˈnoommo. Doodhineemmo coyi akatanke seekkara woy hunara dandaanno. Xaa yannara noohu batinyu boohaarshi Yihowa effire giwannore assinanni gede assannoho. (Fa 11:5; Ga 5:19-21) Qullaawu Maxaafi Yihowa ayirranno gede assannore heda agurreemmokki gede jawaachishannonkehu iseraati.—Fil 4:8.

HIITTOO BOOHAARSHA DOODHA HASIISSANNOE? YITANNO VIIDIYO LAˈINIHU GEDENSAANNI AANTE NOO XAˈMUWARA DAWARO QOLLE:

• Hundi waro Roomu gilaadiyaterooti godoˈlitanno godoˈle xaa yannara noohu mitu boohaarshi ledo xaado afidhinohu hiittoonniiti?

• Songote miilla, wedellu boohaarsha hayyotenni doodhitanno gede kaaˈla dandiitannohu hiittoonniiti?

• Roomu Sokka 12:9 boohaarsha doodhineemmo woyite kaaˈlitannonkehu hiittoonniiti?

• Qooxeessiˈnera noohu gara ikkinohu mitu boohaarshi hiikkonneeti?