Arfaasa 2018nni hanafe, Kiristaanu Heeshshonna Soqqansho Xiinxallote Maxaafichora aaniidi qoolira lawishsha ikkanno hasaawi fulanni keeshshino. Lawishsha ikkanno hasaawa horoonsiˈra dandiineemmohu hiittoonniiti?

Rosaanote Kifile Shiqinsheemmo Woyite: Lawishsha ikkanno hasaawi hunda noo xaˈmo, qummeeshshanna wolu woyitira yaannohuwa noo xaˈmo horoonsiˈra hasiissannonke. Ikkirono, lawishsha ikkanno hasaawa leellishshanno viidiyo giddo noore baalare horoonsiˈra hasiissannonke yaa diˈˈikkino. Lawishshaho manna hasaawinseemmo yannanna bayicho, hasaawu bitima, hasaawinseemmo garanna wolere uminkenni doodha dandiineemmo. Bande kulloonnikkiha ikkiro nafa, Rosiisate Horoonsiˈneemmo Borro giddonni mitte borro ela dandiineemmo.

Soqqammeemmo Woyite: Lawishsha ikkanno hasaawa qixxeessinoonnihu kaaˈlitanno hedo afiˈneemmo gedeeti. Qaete anni hasatto noosiha ikkironna roore afa hasiˈriro, galagalle marre hasaawinsanni woyitira qixxeessinoonni xaˈmo horoonsidhine leddine hasaawa dandiitinanni. Lawishsha ikkanno hasaawa kiˈnera injaanno garinni biddi assiˈra woy gudissine soorra dandiitinanni. Qooxeessiˈne manna roore baxisannohu sai aganira fulinoho lawishsha ikkanno hasaawaatinso wole qummeeshshaati? Mannu roore hasaawa hasiˈrannohu haarote fultino odootinso qooxeessaho ikkinoreeti? Lawishsha ikkanno hasaawa horoonsiˈneemmo gari ikkihano ikkiro, mixonke ‘dancha duduwo’ kulate dandiinummore baala assate.—1Qo 9:22, 23.