Ayyaanaamittete mixo fushshiˈnummoro wolqanke hayyotenni horoonsiˈneemmo. (1Qo 9:26) Ayyaanaamittete mixo tini busha alame baˈara albaanni noo yanna danchu garinni horoonsiˈneemmo gede kaaˈlitannonke. (Ef 5:15, 16) Maatete magansiˈra yannara haaru soqqanshote dirira fushshidhinanni mixo daafira hasaawa dandiitinanni. Kiˈne kaaˈlate, tenne xiinxallote maxaafichora fushshiˈra dandiitinannita mite mixo kulloonni; tenne mixo huuccatto assidhine heda dandiitinanni.—Ya 1:5.

Lawishshaho, ajayi ajeenna maateˈne giddonni mittu woˈma yanna suwisaancho ikkanno gede kaaˈla dandiitinanni? Soqqanshote saate wonshiˈra dandiitinannironna teˈee huluullantiniro, suwisaano ikkite soqqantanni noore kiˈnete gedee heeshsho heedhannore mito roduuwa amaaˈle. (La 15:22) Maatete magansiˈra assidhinanni yannara mitto suwisaancho koyissine qaalu xaˈmo xaˈma dandiitinanni. Hakkiinni assitinara heddinoonnire borreessitine wodhe. Alba suwisaano ikkitine soqqantinoonniha ikkiro, xa heedhinoonni gari suwisaano ikkitine soqqamate injaannoˈneronna teˈee hedde.

Maateˈne giddonni mitu mitto agana woy hakkii saˈino yanna kaaˈlaano suwisaano ikkite soqqama dandiitanno? Dhuku anje nooˈneha ikkiro barru baala shiima shiima saate soqqantinanni kaaˈlaano suwisaano ikka dandiitinanni. Barra woˈma loossinayi daafira woy roso rossinayi daafira lamalate mereero soqqansho fula dandiitinannikkiha ikkiro, ayyaanu heeˈrannoha woy onte Qidaamenna Sambati noo agana doodha dandiitinanni. Kaaˈlaancho suwisaancho ikkate heddinoonni yanna borreessitine amaxxe.—La 21:5.

WORBUULLE IKKE . . . SUWISAANO YITANNO VIIDIYO LAˈINIHU GEDENSAANNI, AANTE NOO XAˈMORA DAWARO QOLATE WOˈNAALLE:

• Rodoo Aamandi woˈnaalshi, Yihowa uminsa horo agurte suwisaano ikkitannore baxillunni towaatannonsata leellishannohu hiittoonniiti?