Wocawaaru aganira, Hegerera Hagiidhitanni Heeˈra Dandaatto! yitanno biroshere horoonsiˈne baalunku mannira Qullaawu Maxaafi xiinxallo hanafisiisate albinni roore sharrammeemmo. Halashshaano konni aganira 30 saate soqqante kaaˈlanno suwisaano ikka dandiitanno. Konni baxxino zamachinni soqqama dandiineemmohu hiittoonniiti?

• Manna Umo Hasaawinseemmo Woyite: Mannu hasatto kakkayisate birosherete badhiidi qoolira noo hedo horoonsidhe; hattono Qullaawa Maxaafa xiinxallinseemmo gara leellishshe. Konni albaanni hasatto noonsata leellishinohanna galagaltine martine hasaawissinanni mannano habbinoonte. Insa alba Qullaawa Maxaafa xiinxalla gibbinoha ikkirono, xa haaro biroshere horoonsiˈne xiinxallinseemmo gara kayinni baxxara dandiitanno. Tenne biroshere cufame noo mine xullote worre haˈra woy alba hasatto noonsata leellishinokki mannira borrote sokka ledo soya dihasiissannonke. Songonniti Soqqanshote Komite konni aganira lende soqqanshote gambooshshe assinanni gede qixxaawo assitara dandiitanno.

• Wole Faro Horoonsiˈneemmo Woyite: Songoˈne borrote gaare horoonsidhannoha ikkiro, Hegerera Hagiidhitanni Heeˈra Dandaatto! yitanno biroshere albaanni worre. Hasatto noonsata leellishinohu biroshere adhino mannira Qullaawa Maxaafa mulla xiinxallinseemmota kulle. Qoleno, haransitine Qullaawa Maxaafa xiinxallinseemmo gara kulle woy wole yannara leellishshinanninsata kullensa. Soqqanshote aliidi laˈˈaanchi ikkadda ikkitino halashshaano qoqqowinsara noohu daddalu qooxeessira sabbakkanno gedenna Qullaawu Maxaafi xiinxallo hanafisiissanno gede kulansara dandaanno. Ledokki rossannorira woy sabbakate fuloottokki woyite xaadatto mannira Qullaawa Maxaafa xiinxallanno gede koyisa dandaatto.

Yesuusi manna ‘rosiinse’ ‘rosaanosi’ assinammora hajajinonke. (Mt 28:19, 20) Kuni baxxino zamachi Hegerera Hagiidhitanni Heeˈra Dandaatto! yitanno biroshere horoonsiˈne tenne hajajo wonshineemmo gede kaaˈlannonke yine hexxineemmo.