Qoonqotenni qixxeessinoonniti Qullaawu Maxaafi niwaawe maati? Qoonqotenni qixxeessinoonniti Qullaawu Maxaafi niwaawe haaroonsine qixxeessinoonnita Haaro Alame Tiro qoonqotenni qaddaˈnoonnite. Dandaami deerrinni sunu sununni batinyu afiinni qixxeessinanni heeˈnoonni. Qoonqotenni qixxeessinoonnite Qullaawu Maxaafi niwaawera Qullaawu Maxaafi giddo kulloonni manna ikke qaddaˈˈaminohu addi addi mannaati. Qullaawu Maxaafi sokka garunni sayisate mitto mittonka qaale nabbamboonnihu hedo xawisanno garinninna iibbado giddonniiti.

Mitootu qoonqotenni qixxeessinoonnite Qullaawu Maxaafi niwaawenni horo afidhanninoohu hiittoonniiti? Togoo niwaawe ganyite macciishshitannori batinyu roduuwi Maganu Qaali xawe leellannonsa gede assitinonsa daafira tenne lowo geya baxxino. Insa Qullaawu Maxaafi giddo kulloonni manna ikke qaddaˈˈaminohunnita addi addi huuro macciishshansa xagge albinni roore xabbe leeltannonsa gedenna borreessinoonni hedo roore huwatanno gede assitinonsata coyidhino. (La 4:5) Wolootu batinyu roduuwi qolte qoonqotenni qixxeessinoonnita Qullaawu Maxaafi niwaawe macciishshansa yaaddo amaddannonsa woyite sheshifachishshaansata huwattino.—Fa 94:19.

Maganu Qaale nabbambanna macciishshanke lowo geya kaaˈlitannonke. (2Du 34:19-21) Kiˈne huwattinanni afiinni qoonqotenni qixxeessinoonniti gama woy woˈma Qullaawu Maxaafi niwaawe nooha ikkiro, ganyitine macciishsha dandiitinakka?

QULLAAWA MAXAAFA QOONQOTENNI QIXXEESSA—MURRE HAAˈNOONNITA YITANNO VIIDIYO LAˈINIHU GEDENSAANNI AANTE NOO XAˈMORA DAWARO QOLATE WOˈNAALLE:

Qullaawa Maxaafa qoonqotenni qixxeessate daafira kiˈnera dhagge ikkinoˈneri maati?