Qaaqqu fulanno wote annasinna amasi woshshanno gede kula hasiissannonke. Tini insa ayirrinseemmota leellishanno. (La 6:20) Qaaqqu minira eˈe yiinkero ea dihasiissannonke. Annisinna amasi qaete nookkiha ikkiro, wole wote mara hasiissannonke.

Qaaqqu naggi yinoha, miteekke 15nni 19 diri geeshsha ikkannosiha ikkiro nafa, annasinna amasi woshshanno gede kula hasiissanno. Insa nookkiha ikkiro, hasiˈrinore nabbawanno gede annisinna amasi fajjitannositanna teˈee xaˈma hasiissannonke. Fajjitannosiha ikkiro borro uyinammosira woy jw.org aaninni nabbawanno gede kullammosira dandiineemmo.

Hasatto noosita leellishinoha naggi yino wedellicha hasaawisate galagalle marreemmo wote, annisinna amasi ledo xaadisannonke gede assa hasiissannonke. Togo assa marroommohu mayiraatiro xawisatenna addaxxinannitanna maatete kaaˈlitannota Qullaawu Maxaafi giddo noo amaale kulleemmonsa gede kaaˈlitannonke. (Fa 119:86, 138) Konni garinni qaete annanna ama ayirrinseemmotanna insara hendeemmota leellisha, dancha lawishsha ikkitaranna hatte maatera dancha duduwo kulate wolu wotira faro fantankera dandiitanno.—1Ph 2:12.