Yesuusi sabbakate fulinokki woyite Samaaritte manchora farciꞌra dandiinohu ise hasaawisino daafiraati. Anfoommokki manni ledo hasaawa hanafate dandoonke woyyeessiꞌra dandiineemmohu hiittoonniiti?

• Manna faasiiqqine hasaawisse. Yesuusi daafure nooha ikkiro nafa, aganno waa xaꞌmire hasaawa hanafino. Hakko daafira kiꞌneno faasiiqqine keere haadhine, ayyarete gara xaꞌmitine, woy muli yanna giddo ikkinore kayissine hasaawa hanafa dandiitinanni. Hasidhinoonnihu hasaawa hanafa ikkinota deꞌinoonte; hakko daafira manchu hasaawa baxannore aye coyeno kayissine hasaawa dandiitinanni. Hasaawa giwirono qarru dino. Iso agurtine wole manna hasaawisate woꞌnaalle. Worbuulle ikkitinanni gede Yihowa huuccidhe.—Ne 2:4; Soq 4:29.

• Dancha duduwo farcidhinanni faro saꞌe baꞌoonkeꞌne; kayinni muddantinoonte. Qooxeessiꞌnera rosamino garinni hasaawate woꞌnaalle. Hasidhinoonni hajo aana calla illachishshiniro manchu gurchaawaranna hasaawa agurara dandaanno. Farciꞌra hanaffinikkinni hasaawa aguriro hexxo mudhitinoonte. Dancha duduwo duduwa waajjitinanniha ikkiro, farciꞌrate heddinikkinni mulla mannu ledo hasaawa hanafa dandiinanni gara rosiisidhe. [Umi viidiyo fanitto gedensaanni hasaabbe.]

• Hasaabbinanni woyite farcidhinanni faro kalaqiꞌrate, macciishshanno manchi lede afa hasiꞌranno gede assannoha ammanaꞌne daafira kulannoha mito coye kula dandiitinanni. Yesuusi Samaaritte mancho xaꞌmo xaꞌmitanno gede kakkayisannore coyiꞌrino. Isi xaꞌmosera dawaro qolinohu, dancha duduwo kuleeti. [Layinki viidiyo fanitto gedensaanni hasaabbe, hakkiinni sayikki viidiyo fani, iseno hasaabbe.]