Mannaho Qullaawa Maxaafa xiinxallinseemmota haaro birosherenna haaro maxaafa afiˈnoommo daafira lowo geeshsha tashshi yiinonke! Yihowa lowo manna rosaano assate assineemmore maassiˈrannonke gede huuccatto assineemmo. (Mt 28:18-20; 1Qo 3:6-9) Tenne haaro borro ma garinni horoonsiˈra dandiineemmo?

Hegerera Hagiidhitanni Heeˈra Dandaatto! yitanno borro horoonsiˈne xiinxallinseemmohu alba ronsoommo garinni ikkikkinni baxxino garinniiti; hakko daafira mannaho Qullaawa Maxaafa xiinxallisate qixxaawatto woyitenna xiinxallisatto woyite aane noo biddishsha harunsi. *

• Gufo nabbabbine, xaˈmuwa hasaabbe

• “Nabbawi” yinoonni qummeeshshuwa nabbabbe; hattono rosaanchu qummeeshshu hedo huwatanno gede kaaˈle

• Viidiyo laˈinihu gedensaanni, qixxeessinoonni xaˈmuwa horoonsidhine hasaabbe

• Mitto roso mitte higgine xiinxallissine gudate woˈnaalle

Soqqantinanni woyite hasaawissinanni manchi hasatto afate biroshere elle. (“ Manna Umo Hasaawinseemmo Woyite Hegerera Hagiidhitanni Heeˈra Dandaatto! Yitanno Biroshere Ela Dandiineemmo Gara” yitanno saaxine lai.) Biroshere xiinxallissine guddinihu gedensaanni, rosaanchu lede xiinxalla hasiˈriro maxaafa eltine, 4^ki rosinni hanaffe. Mitto mancho Maa Ronseemmo? yaanno maxaafanna Maganu Baxilli Giddo Heedhe yaanno maxaafa xiinxallissinanni heedhinoonniha ikkiro, xiinxallo Hegerera Hagiidhitanni Heeˈra Dandaatto! yaanno maxaafira qoltine meekki rosinni hanaffinanniro doorre.

QULLAAWU MAXAAFI XIINXALLORA HAWALLE KEERE DAYOOTTO YITANNO VIIDIYO LAˈINIHU GEDENSAANNI, AANTE NOO XAˈMUWARA DAWARO QOLATE WOˈNAALLE:

• Qullaawu Maxaafi rosaano haaru maxaafinni maa maa rossanno?

• Tenne viidiyo haaro rosaanora leellisha hasiissannonkehu mayiraati?

• Rosaanchu hiittee hiittee mixo fushshiˈre wonshiˈranno gede ganyine jawaachisha hasiissannonke?—“ Mittu Mittunku Gafita Qara Hedonna Mixo” yitanno sanxarazhe lai.