Alame Gashshanni Noohu Ayeeti?

Batinynyu manni aleenni kaˈino xaˈmora Maganoho yite haˈranchunni qoltanno. Ikkollanna kayinni, Qullaawu Maxaafi mittowano Yesuusi Kristoosino ikko Annasi tenne alame gashshitanno diyaanno. Konnii baxxinohunni Yesuusi: ‘Tenne alame gashshinoha gobbara fushshine tunganni.’ Ledeno ‘Tenne alame gashshannohu daaraati, isira Ane aana walqa dinosi’ yiino.—Yohaannisi 12:31; 14:30; 16:11.

Konni daafiˈra tenne alame gashshanni noohu Yesuusi diinaati. Kuni diini ayee ikkara dandaanno?

Alamete Noo Ikkito Marcho Leellishshannoro

Subbino hedo noonsa manni dandaamannonsare tuqa assiturono, tini alame seedu dirira mararsanno qarrinni sayissino. Tini ikkito gazeexu qixxeessancho Deevidi Lawureensi maalaˈlisseenna: “Ayee manchino ‘uullate aana keeru’ heeˈrara hasiˈranno. Alamete doyichchora heeˈranno manni mittu woleho ‘danchare hedanno’ yaate dandiinanni. Ikkollanna, qarra kalaqinorchchi maati? Mannu oosora togooti dancha hasatto heedhunsana, olu manchi beetti heeshsho aana gawajjo iillishshanni noohu mayiraatiyya?” yiinte gede tenne alame ikkito wodanchanno mannano maalaˈlissanno.

Ise iseneewa sumuu yitannokki yaatto labbanno, dilabba-ikka? Keerunni heeˈra kalaqamunni Manchi beetti hasatto ikkite heedhenna mannu mimmito giwanno, hakkii saeno mararro nookkiha mimmito shaanno. Mannu ooso mararro nookkiha iillishshanno dano wodanchi. Hadhote gaaze woˈmitino kifile, manna mittowa ganba assinanni kaanbe, giira tuffanno qawwe, naappalimi yinanni boombanna wole coyiˈrate nafa cimmi assannorichcho horoonsidhe mararro nookkiha mimmito shitannonna gorritanno.

Mannu keerenna hagiirre halchanni heeˈre, coyiˈrate nafa waajjishshanno dano wolootu aana illishshanno yite ammanatto? Mannu tenne giwissanno ikkito assara kakkayisse hasiˈrummokkinni togoore assoommo yaanno busha ikkito giddora  eessitanno wolqaataammi ayeooti? Mannu toogoota cimmi assitanno bunshe assanno gede kakkayisannohu illete leellannokkihu bushu ayyaani no yite hedde egennootto?

Alame Gashshitannori Ayeeootiro Xawinsoonni

Kuni coyi sammi yine hedote coyiiˈnanniha diˈˈikkino, korkaatuno, xiinxalla ikkinnohu illete leellannokki bisi, mannanna gosa isi hunda gashshanni noota Qullaawu Maxaafi egensiisannohuraati. Hakkuno: ‘Alame duuchcha Sheexaanu gashshooti hunda ikkitino.’ Ledeno Qullaawu Maxaafi: “manna duuchcha soˈrisiisannohu Durriisa woy Sheexaane yaamame woshshamannohu biˈre hamashshooti” yee bade egensiisanno. —1 Yohaannisi 5:19; Ajuuja 12:9.

Yesuusi “Dawulooosinni jifami” yannara Sheexaanu tenne alame gashshaancho ikkasi dimoromino. Qullaawu Maxaafi hattee yannara noo ikkito xawisanni: “Hakkunni gedensaanni Sheexaanu jifanno gede, Qullaawu Ayyaani Yesuusi halallu gobba tullichcha fulanno gede assisi. Ledeno Sheexaanu Yesuusi seedu ilaali iimira giddisiise alame duuchchate gashshoote ayirrinynyise ledo leellishshisi. “Guluphphite anera sagadittoero konne duuchchanka oyeemmohe,” yiisi. Hakka woyite Yesuusi, “Ati Sheexaane, anewiinni fafi! ‘Mootichchu Maganikkira sagadi, iso calla magansiri!’ yine borressinoonnina,” yiisi yaanno.—Maatewoosi 4:1, 8-10.

Hanni tenne hajo wodanchi. Sheexaanu Yesuusi jifinohu “alamete gashshoote baala” oyeemmohe yeeti. Sheexaanu tenne alame gashshaancho ikka hoogoommero, oyeemmohe yee shiqishinorichchi halaalaancho jifa ikkanno? Horonta diˈˈikkanno. Yesuusi alamete gashshooti baalu sheexaanunniha ikkinota dimoromino, hatto ikka hoogoommero mayi biilleenynyi noohe yaasi digattanno. Konni daafiˈra, Sheexaanu Dawuloosi illete leellannokki tenne alame gashshaanchooti! Qullaawu Maxaafi, iso ‘tenne alame magano’ yaanno. (2 Qorontoosi 4:4) Ikkollana, kuni bunshete woˈminohu togoo biilleenynya afiˈra dandiinohu hiittoonniiti?

Yannate gedensaanni Sheexaane ikkinohu Maganu kalaqino sokkaanchooti, ikkollana Maganu ayirrinynye lae hinaasi. Maganu gashshooti halaalanynya ikkasi aana hettisami. Umi meyaata Hewaani, hamashsho horoonsire sorisiisi, hakkunni gedensaanni,  Hewaaninna galtese Addaami, Maganoho hajajamantenni isi halcho wonshitannore assa dandiino. (Kalaqo 3:1-6; 2 Qorontoosi 11:3) Ledeno Addaaminna Hewaani sircho baala Maganuwiinni xeertiˈranno gede asseemmo yee booˈni. Yaattosi adda ikkasenna hoogase woˈnaale buxisiisanno gede Maganu Sheexaaneho yanna fajjisi, ikkollana, Sheexaaneho dinjiinosi.—Iyyoobi 1:6-12; 2:1-10.

Sheexaanu alame gashshanni noohu callasi diˈˈikkino. Sheexaanu Maganu aana kayisino finqillera wolootu sokkaasine isira hale ikkittanno gede assino woˈnaalshi injiinosi. Kuriuu sokkaasine durriissa ikkite, isira ayyaanaame miilla ikkitino. Qullaawu Maxaafi kristiyaanaho: “Sheexaanu xagarro giwa dandiitinanni gede, Maganunniha urdete uduunnichcho duuchcha uddidhe. Wommatenna biillate  ledo, tenne tunsichchu alame gashshitanno gashshaano ledo, gordu iima noori bushuullu ayyaanna olanto ledooti ikkinnina, gaarammeemmohu mannu ledo diˈˈikkinona” yitanno amaale aanno.—Efesooni 6:11, 12.

Busha Ayyaanna Gargadhi

Kuri illete leellitannokkiri bushuullu alamete gashshaano mannu ooso baala sorisiisatenna Maganuwiinni badate qodhite kaˈino. Busha ayyaanna manna sorisiisannoti mitte doogo manchu reyiro lubbosi heeshshoote suffanno yitanno hedo halashshateeti, Qullaawu Maxaafi kayinni reyitiyori mittore affanokkita xawisanno. (Kalaqo 2:17; 3:19; Hiziqeeli 18:4; Faarso 146:3, 4; Mekibibi 9:5, 10) Bushu ayyaani, reyino manchi qoonqo lawise woy anfoonki alamenni dagganno “qoonqo” ragaanni woy sheexaaneho hayyaatanno manchi ragaanni heeshshote noo fiixasi woy jaallasi, coyishiishara dandaanno. Tini “qoonqo” reyino manchita labbara dandiitanno, ikkollana durriisunnite!

Konni daafiˈra togoo “qoonqo” macciishshittoro dogantooti. Yaannore horonta giwi, hakkii saˈeno Yesuusi yiinte gede: “Ati Sheexaane, anewiinni fafi!” yii. (Maatewoosi 4:10; Yaaqoobi 4:7) Ayyaanaame alamere afate noohe hasatto, bushu ayyaani ledo sarraaqqahera fajjitooti. Togoo ikkito durriissate loosooti yinanni, Maganu iso magansidhannori ayee doogonni durriissate loosinni faffanno gede qorophphisiisinonsa. Qullaawu Maxaafi “hellee laˈˈannohu . . . woyi sheexaaneho hayyaattannori ledo xaadu noonsihu woy kiilannohu woy bushu ayyaani ragaanni reyitinore hassawisannohu mereerokki heeˈroonke” yaanno.—Marro 18:10-12; Galatiya 5:19-21; Ajuuja 21:8.

Durriissate loosi mitto mancho durriissate borrojjichcho assano daafiˈra, ayee geeshshano godoˈlenna hagiirsiisannoha lawirono, hattoo loosinni fafi. Togoo ikkito ciichcho woyi ayyaana layira, angate hoowinninna wolurinni kiila, gudumaaleho kakkala lawannoreeti. Leddeno durriissa qoqqowonsa assidhino minna giddo qoonqo macciishshishsharanna illete lellannoreno assitara dandiitanno.

Hakkii saˈeno, busha ayyaanna mannu kalaqamunni rosaminohunni gobbaanni siimu xadooshshe assanno gede kakkayissanno borro, filimme, televizhiinete porograame halaˈlitanno gede assate mannu oosota cubbaataame hedo buusa assidhe horoonsidhanno.  Busha hedo surrete gido rumuxxittannokki gede assa hoongiro, hardite hooˈla dandiinannikki dirima iilitara dandiitannotanna mannu hatto durriissate gede battaawara dandaannota durriissa affino.—Kalaqo 6:1, 2; 1 Teselonqe 4:3-8; Yihudi 6.

Addaho, batinynyeho tenne alame gashshitannori bushuulle ayyaannaati yitanno hedo haariimo ikkitansara dandiitanno. Ikkollana, Qullaawu Maxaafi: “Sheexaanu nafa xawaabbu soqqamaancho lawara umosi soorranno” yaanno daafiˈra ammana hoogansa xagge diˈˈikkitanno. (2 Qorontoosi 11:14) Sheexaanu manna dogannoti lowo geeshsha dahaabbino doogo batinynyu manni isino ikko durriissasi heeˈransa ammanannokki gede assateeti. Dogantooti! Dawuloosinna durriissasi nooreeti, ikkinohura ganynyite garagadha hasiissannohe.—1 Pheexiroosi 5:8, 9.

Sheexaanunna miillasi baˈanno yanna mule ikkase hagiirsiissanno! Qullaawu Maxaafi, ‘Alame [gashshaanose ikkitino durriissa ledo] saˈanno; Maganu baxannore assannohu kayinni hegere heeshshora heeˈrano’ yaanno. (1 Yohaannisi 2:17) Kuri manna gawajjannori nookkiha heeˈra hagiirsiisano! Konni daafiˈra, Maganu fajjo assitannori mereero ikkineemmorenna, keeranchimma woˈmitino haaro alame Maganunnite giddo hegerera heeˈneemmore assonke.—Faarso 37:9-11, 29; 2 Pheexiroosi 3:13; Ajuuja 21:3, 4.

Addi xawishsha aa hoongi geeshsha tenne borro giddo noo qummeeshsha haaˈnoonnihu Ibirayisixete Qullaawa Borro (Akkala Gondooro) Haaro Alame Inigilizete Afii Tiro Xawishshu Ledo nootenniiti. Kristiyaanu Girikinynyu Qullaawa Borro (Haaro Gondooro) 1993 M.D attammoonni Sidaamu afii tiroonniiti.

[Qoola 4 noo misile]

Alamete gashshooti baalu Sheexaanunniha ikka hoogoommero Yesuusira oyeemmohe yaano?