Maatete Heeshshonni Hagiidha

Addinta maate hagiirraame ikka dandiitanno?

Kuni ikkara dandaannohu hiittoonniiti?

Tenne borro aana noo gedee maate mittimmanna hagiirru noonsata affe egennootto? Ayeewano ikkiro Maate diigantanni no. Adhamate diigaamme, loosiisidhannori loosaasine hasidhu yannara loosunni shorra dandaansa, annu woyi ama calla maatete hasiisannore wonshshate assitanno millimmonni iillanonsa qarrinna, caaccaanbe kuri baalu ganba yee buutote qarri iillanno gede irko assino. Maatete hajo egennaamo ikkinohu miittu manchi: “Galle honsiro Maate diheedhanno yitanno masaalo xaa yannara ayeerano xabbe leelitino” yee galtinosi yaaddo xawisino.

Yannankera maate buutote qarrinni gawajjantanni noohu mayiraati? Maatenke heeshsho hagiidhaame assa dandiineemmohu hiittoonniiti?

Maate Hiittoo Hanafantinoro

Tenne xaˈmora dawaro afiˈrate, Adhanna adhama hattono maate xintinohu ayeetiro afa hasiissanonke. Kuri xintinohunna kalaqinohu heeriro, maatete miilla hasiissanno amaale isiwiinni afiˈra hasiissannosa, korkaatuno maate hagirisiisannori maatiro ayeenni roore afinohu isooti.

Maalaˈlisannohulla, lowo manni maate kalaqinohu dino yite amanansaati. Ze Insayiklopiidiya Ameerikaana: “Mitu Mitu tenne alame egennaammi adhanna adhama hanafantinohu mannuwiinni woroo ikkitino saada meyaatinna labbaahu lame lame ikkite heedhanno garinniiti yaate widira higgino” yiino. Ikkollana, Yesuusi Kristoosi kayinni labbaahunna meyaati kalaqamansare coyirino. Umo borreessinoonniha Qullaawa Maxaafa taje asse: ‘Maganu xaadinsonsare mannu badoonkensa’ yiino.—Maatewoosi 19:4-6.

Yesuusi Kristoosi yinonte gede xiinxallu Magani umi manna kalaqi gedensaanni hagiidhaame maatete heeshsho qixxeesinonsa. Maganu umire meyaatanna labbaaha adhamatenni mitto assinsahu gedensaanni manchu “minaamasi ledo mittooˈmanno, lamunku mitto biso ikkitanno” yiino. (Kalaqo 2:22-24) Ikkirono, yannankera maate qarru aana ubbinohu Kalaqanchu Qullaawu Qaalisi giddo, yinore agurte uminsa doogonni haransanniiti ikka?

Qinaado Doogo Hiitteeti?

Afoottonte gede, xaa alame mittu mittunku halchosi wonshiraranna umisi hagiirrira calla dodamara jawaachchishshanno. Mittu miinju egennaami Ameeriku kolejenni rosse maassantanni nooriˈra, “Honqooqichchimma hasiisanno akataati” yee coyirinonsa. “Honqooqeeyye ikkitinirono umiˈnera dancha hedo galtaˈnera dandiitanno” yee kuni manchi lede coyirino. Ikkollana, tenne alame jiro shorra qinaado heeshshowa dimassitanno. Isinni, alamete jiro shorra, maatete heeshsho qarraho tugannorichchi giddo qaraho. Mayira yiniro mannu merero heeranno fiixoomira gufichcho kalaqqanno, konni saeno yannanna woxe gawajjitanno. Wole ragaanni, lamu Qullaawu Maxaafi lawishshi calla nafa hagiirre afirate hiitto kaaˈlannokero lai.

“Gibbo noowa cooma itantenni baxillu noowa shaana ita woyyitanno.”

“Gibbo noowa intanniri wo’mino jilinni baxillu noowa moola tima ita roorete.”

Lawishsha 15:17; 17:1.

Lowo geeshsha, jawaata yaatto diˈikkitino? Maate baalanti heeshshote balaxisiinsannire baalaxisiissoommero tini alame xa noo garinni mageeshsha woyyitinota ikkitannoro hedi! Qullaawu Maxaafi maatete miilla mimmito hiitto asse irkisa hasiissannonsaro egensiisanno. Kuni Maxaafi yaannorichchi giddo shiimunni laˈno.

Minaannuwa: ‘Uminsa mannimma gede assite uminisa ayiddaamuwa baxxanonsa gede hasiisanno.’—Efesooni 5:28-30.

Ayirritinnokkitenna loosu aana hosiinsara dandiinanni amaaleeti. Qullaawu Maxaafi lede minaannira ‘minaamakki ayiirisi’ yitanno amaale aanno. (1 Pheexiroosi 3:7) Konne assannohu minaamasi shaqqillunni, baxillunninna addi illachcha tuge jawaachchishateeti. Ledeno yitannore mishshikkinni gotti asse laˈˈatenna wodanche macciishshateeti. (Kalaqo 21:12 ledo heewisiisi.) Minaanni isira assinasira hasirannore minaamasira assannoha ikkiro aye maateno horo afidhanno yiniro sumuu diyaatto?—Maatewoosi 7:12.

Minaama: “Minaamano minaannase ayirrisso.”—Efesooni 5:33.

Minaama maate lainohunni minaanni noosi duhano shaaltannosi gede irkisate maate hagiirraame ikkitanno gede kaaˈlo assa dandiitanno. Mitte Minaamawiinni agrrannihu hasiisannorichchi konneeti. kunino Maganu minaama kalaqinohu “kaaˈlaanchonna xeˈnesi wonshitannota” ikkitanno gedeeti. (Kalaqo 2:18) Minaama maate lainohunni Minaanni sayiisanno muro irkisatenna maatete hasatto jeefo gantanno gede assate minaanni ledo sumuu yaatenni ayyirrissannosiha ikkiro maate afidhanno atoote heda dandaatto?

Minaanninna Minaama: ‘Adhanna adhama duuchchunkunniwa ayirritinota ikkito; ayiddaanninna ayiddaama soorrote maˈnansa batteessitoonke.’—Ibiraawuyaani 13:4.

Minaanninna minaama mimmito ammanannoha ikkiro maatete heeshsho woyyaabbanno. Soorro kayinni maate diigganno. (Lawishsha 6:27-29, 32) Konnira, Qullaawu Maxaafi, “Wedellichchimmakki yanna minaamakkinni tashshi yoohe, beettoˈya wole meyaate kikkiˈla mayiira hanqafiratto?” yee dancha seejjo aanno—Lawishsha 5:18-20.

Annunna ama: “Oosoˈne halaalancho doogo hadhanno gede qajeelishensa.”—Lawishsha 22:6.

Annunna ama oosonsara illachcha tugge yanna uyiitunsaro maatete heeshsho huluullo nookkiha woyyaabbanno. Ikkasinni Qullaawu Maxaafi annunna ama oosonsa ‘minensa ofoltanno, doogo hadhanno, goxxannonna kaˈˈanno wote’ subbino doogo rosiissannonsa gede amaale aanno. (Marro 11:19) Hattono Qullaawu Maxaafi annunna ama oosonsa seejjate baxillensa leellishsha hasiissannosata egensiisanno.—Efesooni 6:4.

Ooso: “Oosoˈya ballo Mootichchu Yesuusire ikkitinoonnihura iltino’ne annuwiˈneranna amuwiˈnera hajajamme.”—Efesooni 6:1.

Addaho, tenne amanynyootu xeino alamera, duuchcha wote annahonna amate hajajama shota coye diˈˈikkino. Ikkirono maate Kalaqinohu yinore assa busullete yiniro sumuu diyaatto? Korkaatuno Maatenke roore hagiirisiisannohu maatiro afinohu isooti. Konnira annikkiranna amakkira hajajamate dandaamannohere tuqa assi. Bushare assattora xixxiwannoheri tenne alame jifanni xooqanna qaafo adha hasiissannohe.—Lawishsha 1:10-19.

Halaˈladunni mittu mittunku maatete miili Qullaawu Maxaafi amaale loosu aana hosiisannoha ikkiro maate hagiirraame ikkitanno. Kunino maate xa calla ikkikki Maganu abbeemmo yiino haaro alame giddo heerate hagiirsiissanno hexxo afidhanno gede assanno. (2 Pheexiroosi 3:13; Ajuuja 21:3, 4) Konnira Qullaawa Maxaafa mittimmate xiinxalla maateˈne bude assidhe! Miliyoonete kiirranni maate, Maatete Hagiirrira Qarurichchi Maati? * yaanno maxaafa xiinxallate horo afidhino.

Addi xawishsha aa hoongi geeshsha tenne borro giddo noo qummeeshsha haa’noonnihu Ibirayisixete Qullaawa borro (Akkala Gondooro) Haaro Alame Ingilizete afii tiro Xawishshu ledo nootenniiti. Kristaanu Girikinynyu Qullaawa borro (Haaro Gondooro) 1993 M.D attammoonni Sidaamu afii tironniiti.

Amaaru afiinni no