1, 2. Xaa yannara beˈe yineemmokki mine ikkankera dandaannohu ayeeti?

XEENA ganara gordu tunse noo barra doogo hadhanni nootto gede assite hedi. Gordu lowo geeshsha tunsanni haˈri. Banqo beleqanna xadha jammartu, hakkiinnino biite xeena gani. Xeeˈnattowa afiˈrate caaqulantanni wiinama jammaritto. Hakkiinnino doogote qaccera minu nooha laitto. Kuni mini milli diyaannoho, dixissannoho, hattono eate baxisannoho. Xeeˈnate konne dancha mine afiˈrakkinni lowo geeshsha hagiidhatto!

² Heeˈnoommo yanna buutote qarrinni hembeelantanni noote. Alamete ikkito roore bushshanni hadhino. Ikkollana hegere gawajjo iillitannonkekki gede golo ikkannonkehu mittu beˈe yineemmokki mini noonke. Hakku mini maati? Hanni Qullaawu Maxaafi yaannore wodanchi: “Yihowa togo yeemmo: ‘Ati irkoˈyaatinna goloˈyaati, qoleno addaxxeemmohe Maganoˈyaati.’”—Faarso 91:2.

3. Yihowa irkonke assiˈra dandiineemmohu hiittoonniiti?

³ Tini mayyaatero hanni hedi! Kalqete alame Kalaqaanchinna Aliidi Gashshaanchi Yihowa gawajjotenni agarannonke mine ikkankera dandaanno. Gawajjannonke coyi baalunkunni  lowo geeshsha roortino wolqa noosi daafira, gawajjotenni agarannonke. Gawajjo iillitunkero nafa, Yihowa dhaawa dandaanno. Yihowa irkonke assiˈra dandiineemmohu hiittoonniiti? Umihunni, iso addaxxa hasiissannonke. Hakkiinni saeno Maganu Qaali, “Maganu baxillinni fultinikki heedhe” yee amaalannonke. (Yihuda 21, NW) Addaho, Maganu baxillinni fullummokki heeˈra hasiissannonke; qoleno iimi Anninke ledo noonkehu danchu jaaloomi lexxanni haˈranno gede assiˈra hasiissannonke. Hatto assineemmoha ikkiro, isi irkonke ikkannota mittore dihuluullammeemmo. Ikkina togoo fiixooma kalaqiˈra dandiineemmohu hiittoonniiti?

4, 5. Yihowa baxillesi ninkera leellishino doogo giddo gama hiitteeti?

⁴ Maganu baxillinni fullummokki heeˈrate, Yihowa ninkera baxillesi leellishino doogo huwata hasiissannonke. Konni maxaafi kaaˈlonni rosoottoha mito mito Qullaawu Maxaafi roso hanni qaagi. Yihowa Kalaqaancho ikkinohura, uulla ninkera hagiirsiissanno qae asse uyinonke. Uullate aana lowo sagalenna wayi, kalaqamu jironna laˈˈate baxissanno saada heedhanno gede, hattono uulla babbaxxino garinni biiffe ofoltanno gede assino. Isi Qaalisi widoonni suˈmasinna akatasi ninkera kulinonke. Duuchchunkunni roore, baxannoha mitto Beettosi Yesuusa uullara soyinota, hattono ninkera yee qarramanno gedenna reyanno gede faqqadinota Qaalisi kulannonke. (Yohaannisi 3:16) Yihowa Beettosi sayise aasi ninkera mayi horo uyitanno? Konni kaˈira hexxo heedhannonke gede assitanno.

⁵ Konni kaˈira hexxo heedhannonke gede Maganu wolereno assino. Yihowa iimi gashshoote yaano Mesihichchu Mangiste uurrisino. Tini Mangiste muli yanna giddo qarra baalanka hooltanno, hattono uulla gannate assitanno. Tini mayyaatero hanni hedi! Gannatete giddo keerunninna hagiirrunni hegerera heeˈra dandiineemmo yaate. (Faarso 37:29) Hakka geeshsha kayinni, Maganu xa nafanni dancha heeshsho heeˈneemmo gede kaaˈlannonke biddishsha uyinonke. Qoleno huuccattote kaayyo uyinonke; konni daafira ayee yannarano ikko ayeewano heeˈne iso huucciˈra dandiineemmo. Yihowa mannu ooso woˈmatenna atera gillete deerrinni baxillesi leellishino doogo giddo gama kuriiti.

6. Yihowa baxillira galata qola dandaattohu hiittoonniiti?

 ⁶ Xa assaawa hasiissannoheti qara xaˈmo, Yihowa baxillira galata qola dandeemmohu hiittoonniiti? yitannote. Tenne xaˈmora duuchchu manni, “Anino qole Yihowa baxa hasiissannoe” yee qolanno. Atino hatto yite hedatto? Yesuusi, ‘[Yihowa] Maganokki woˈmu wodanikkinni, woˈma lubbokkinninna woˈma hedokkinni baxi’ yitanno hajajo baalante hajajonni roore ikkitinota xawisino. (Maatewoosi 22:37) Addaho, Magano Yihowa baxatto gede assannohehu batinynyu korkaati no. Ikkina, Yihowara dancha lao noonke daafira calla iso woˈmu wodaninni, woˈma lubbonninna woˈma hedonni banxeemmo yaa dandiineemmo?

7. Magano woˈmunni woˈma baxeemmo yaate, isira baxillu lao noonkere ikkanke calla baqe ikkitannoni? Xawisi.

⁷ Qullaawu Maxaafi xawisannonte gede, Maganoho dancha lao noonkehura calla, iso banxeemmo yaa diˈˈikkino. Yihowara baxillu lao noonkere ikkanke dancha ikkiturono, tini isira noonkehura addu baxillira hanafotella. Mitte intanni haqqichcho kaase fushshirate hatte haqqichcho gumi hasiisanno. Laalose ita hasiˈrittoro kayinni, mittu manchi haqqichchonniha guma calla uyihero hagiidhatto? Horonta dihagiidhatto! Hatteente gede, Maganoho baxillu lao noonkere ikkanke hanafotella. Qullaawu Maxaafi togo yaanno: “Magano baxa hajajosi agadhate, hajajosino diqarrissannote.” (1 Yohaannisi 5:3) Magano addinta banxeemmo yaate, baxillinke dancha guma laala hasiissannosi. Yaano baxillenke loosunni leellisha hasiissannonke.—Maatewoosi 7:16-20.

8, 9. Magano banxeemmota leellishanna galata qola dandiineemmohu hiittoonniiti?

⁸ Maganu hajajo ayirrisatenninna seerasi loosu aana hosiisatenni iso banxeemmota leellisha dandiineemmo. Hajajosi ayirrisa duha diˈˈikkitino. Yihowa higge duha diˈˈikkitino; hatteentenni, hagiirsiissannotanna geˈino heeshsho heeˈneemmo gede ninke kaaˈlate qixxaabbinote. (Isayyaasi 48:17, 18) Yihowa biddishshi garinni heeˈneemmoha ikkiro, iimi Anninke assinonke  coyi baalunkura galatu noonketa leellisha dandiineemmo. Xaa yannara togoo galati noonsata leellishannohu shiima mannaatilla; tini dadillissannote. Yesuusi warihu mitu manni gede galatu noonkekkire ikka dihasiissannonke. Yesuusi tonne laanshaawino manna hursita, iso galatate galagale higinohu kayinni mitto callaho. (Luqaasi 17:12-17) Galata baˈuri honsu mannooti gede ikkikkinni galata qoli manchi gede ikka hasiˈneemmo!

⁹ Ikkina, ayirrisa hasiissannonketi Yihowa hajajo hiitteeti? Konni maxaafi giddo duuchcha hajajo ronsoommo; ikkeennano hanni gama galagalle laˈno. Maganu hajajo ayirrisa isi baxillinni fullummokki heeˈneemmo gede kaaˈlitannonke.

10. Maganinke Yihoware lende anfanni haˈra hasiissannonkehu mayiraatiro xawisi.

¹⁰ Yihoware rosa isiwa shiqate lowo kaaˈlo afidhino. Isire rosa uurrannore diˈˈikkino. Qorru uwe noo yannara mitto hashsha gobba giira giwaadhanni nootto yino; hakkawote giira xoˈara sammi yite laˈˈattoni? Dilaˈˈatto. Giira xoˈannokki gedenna iibbitanno gede haqqe woratto. Hattee yannara qorrunni reyattokki gede giira xoˈannota gargadha lowo geeshsha  hasiissannohe! Haqqe, giira bubbanno gede assitannonte gede, ‘Magano seekke afanke’ Yihowara noonke baxilli lexxanni haˈranno gede assitanno.—Lawishsha 2:1-5.

11. Yesuusi harunsaanosi rosiisinori maaho kaaˈlinonsa?

¹¹ Yesuusi, rosaanosi Yihowaranna muxxe ikkino Qaalisira noonsa baxilli qiidannokki gedenna lexxanni haˈranno gede assidhara hasiˈrino. Yesuusi reyotenni kai gedensaanni, lame rosaanosira Ibirayisxete Qullaawa Borro giddonni isi aana woˈmitinota mite mite masaalo xawise kulinsa. Tenne assasi maaho kaaˈlitinonsa? Gedensaanni higge rosaanosi togo yitino: ‘Doogote aana coyishiishannankenna [Qullaawa] borro [xawise] kulannanke wodaninke lowo hagiirrinni iibbi.’—Luqaasi 24:32.

12, 13. (a) Xaa yannara rooru mannira Maganohonna Qullaawu Maxaafira noonsa baxilli hiikkino? (b) Baxillinke qiidannokki gede assa dandiineemmohu hiittoonniiti?

¹² Qullaawu Maxaafi addinta mayyee rosiisannoro afitto wote wodanikki hagiirrunninna Maganoho noohe baxillinni woˈmino? Hatte yannara halaale woleho kulate quqquxammootto? Tini dihulullissannote. Batinynyu manni hattonni quqquxamino. Xa kabbaadannohu, hakkoye iibbino baxille baˈˈannokki gedenna lexxanni haˈranno gede assate. Tenne alame lawa dihasiissannonke. Yesuusi togo yee masaalino: “Bunshete batinynyinni kainohunni [lowo mannihu] baxillu qiidanno.” (Maatewoosi 24:12) Yihowaranna Qullaawu Maxaafi halaalira noohe baxilli qiidannota hooˈla dandaattohu hiittoonniiti?

¹³ Yihowarenna Yesuusi Kiristoosire rosakki agurtooti. (Yohaannisi 17:3) Maganu Qaalinni rosootto coye hiinci woyi heeshshi gotti assite hedi. Hiincatto wote ateneeto togo yite xaˈmi: ‘Tini assaawe Yihowa lainohunni maa rosiissannoe? Tenne assaawe giddo Yihowa woˈmu wodaniˈyanni, woˈma hedoˈyanninna lubboˈyanni baxeemmo gede assannoehu hiikku baxxino korkaati no?’ (Faarso 77:12) Konni garinni hiincattoha ikkiro, Yihowara noohe baxilli iibbino gedeenni heeˈranno.

14. Huuccatto Yihowara noonke baxilli iibbino gedee heeˈranno gede kaaˈlitannohu hiittoonniiti?

¹⁴ Yihowara noonke baxilli iibbino gedee heeˈranno gede assa dandiineemmoti wole doogo ganynyine iso huucciˈrate. (1 Teselonqe  5:17) Konni maxaafira 17⁠^ki fooliishshora, huuccatto Maganu uyinonketa muxxete kaayyo ikkitinota ronsoommo. Mittu manchi ledo barru baala giddota hasaawa jaalooma kaajjishshannonte gede, Yihowa ganynyine huucciˈneemmoha ikkiro isira noonke baxilli iibbanninna lexxanni haˈranno. Huuccattonke goowi alita ikkitannokki gede qorophpha hasiissannonke; hatto yaano giddonke hedo xawissannokkita rosantino qaalla dira dihasiissannonke yaate. Yihowa huucciˈneemmo wote, mittu qaaqqi baxillaancho annasi coyishiishanno garinni huucciˈra hasiissannonke. Yihowa ayirrinynyunni coyishiisha hasiissannonke; ikkeennano hedonke xawinse, giddonkenni huucciˈra hasiissannonke. (Faarso 62:8) Addaho, gilletenni Qullaawa Maxaafa xiinxallanna giddonkenni huuccatto assiˈra Yihowa magansiˈrate hasiissannote; qolteno Maganu baxillinni fullummokki heeˈneemmo gede kaaˈlitannonke.

15, 16. Maganu Mangisteha dancha duduwo sabbakate looso kaayyotenna jirote gede asse laˈˈa hasiissannonkehu mayiraati?

¹⁵ Gilletenni Qullaawa Maxaafa xiinxallanna huuccatto assiˈra gilletenni Magano magansiˈneemmo doogooti. Xa kayinni faajjete Magano magansiˈneemmota mitte doogo laˈno. Hattino ammannoommo coye wolu mannira kulate. Ati mito mito Qullaawu Maxaafi halaale mannaho kula jammarootto? Jammaroottoha ikkiro dancha kaayyo afiˈrootto yaate. Yihoware ronsoommo halaale mannaho kulleemmo wote, addu Kiristaani baalunkura uyinoonnita baxxitino hajajo wonshinanni heeˈnoommo; yaano Maganu Mangisteha dancha duduwo dudumbanni heeˈnoommo yaate.—Maatewoosi 24:14; 28:19, 20.

¹⁶ Hawaariya Phaawuloosi soqqanshosi muxxete coyi gede asse laˈˈanno daafira jirote yiino. (2 Qorontoosi 4:7) Maganinke Yihowarenna alaamisire mannaho kulanke duuchchunku loosinni roorino loosooti. Tini soqqansho duuchchunkura alee ikkino Mootichchira soqqammeemmote; qoleno tenne assankenni duchchunku atootinni roorino atoote afiˈneemmo. Konne looso loossanni noottoha ikkiro, wodana suwino manni iimi Anninkewa shiqanno gedenna hegere heeshsho afiˈnanni doogo aana haˈranno gede kaaˈlitanni nootto yaate! Konninni sae  hagiirsiisannohu wolu loosi mama no? Qoleno Yihowarenna Qaalisire wolu mannira farciˈra, ammanakki lexxitanno gedenna isira noohe baxilli iibbanno gede assitanno. Hakkii saeno Yihowa assatto sharro naadanno. (Ibiraawuyaani 6:10) Konne looso diinaggaambenna ganynyine loosanke, Maganu baxillinni  fullummokki heeˈneemmo gede kaaˈlitannonke.—1 Qorontoosi 15:58.

17. Kiristaanu soqqansho xaa yannara wiinamme soqqammannita ikkitinohu mayiraati?

¹⁷ Maganu Mangiste sabbakate loosi xaa yannara wiinamme loonsanniha ikkinota wodancha hasiissanno. Mayira? Maganu Qaali togo yee kulannonke: “Bayiru Yihowa barri mule no. Shiqqi yee dayino, lowo geeshshano muddamanni no.” (Sofooniyaasi 1:14) Addaho, Yihowa tenne busha alame hunanno yanna rakke dagganni no. Konnira manna qorophphe yaa hasiissanno! Mannu, Yihowa Aliidi Gashshannchonsa asse doodhanno yanna tenne ikkitinota kula hasiissanno. Goofimarchu “dikeeshshanno.”—Imbaaqoomi 2:3.

18. Addu Kiristaani ledo gamba yine Yihowa faajjete magansiˈra hasiissannonkehu mayiraati?

¹⁸ Yihowa addu Kiristaani ledo gamba yine faajjete magansiˈnammosira hasiˈranno. Qaalisi togo yaannonkehu iseraati: ‘Baxillehonna danchu loosira baqqi yine heeˈneemmo gede [kuˈu kuˈuyira assaambo]. Duuchcha yannara xaandanni ninke ninkeneewa mimmito kaajjinsho ikkinnina mitu mitu rossino gede gamba yaanke agurroonke. Roorenkanni Mootichchu barri gamba yiinota qaagginanni konne roorsitine asse.’ (Ibiraawuyaani 10:24, 25) Ammanate roduuwinke ledo Kiristaanu gambooshshiwa gamba yineemmo wote, baxillaancho Maganonke galaxxatenna magansiˈrate kaayyo afiˈneemmo. Qoleno mimmitonke kaajjinsheemmo, hattono jawaachchinsheemmo.

19. Kiristaanu songo giddo noo baxilli iibbanno gede assa dandiineemmohu hiittoonniiti?

¹⁹ Yihowa magansidhannori ledo gamba yineemmoha ikkiro, songote giddo noo baxillinna jaaloomi iibbanno gede assa dandiineemmo. Yihowa ninketa danchummanke laˈˈannonte gede, ninkeno mimmitinke danchumma laˈˈa hasiissannonke. Kiristaana roduuwakki guuta ikkitino gede assite laˈooti. Duuchchunku ayyaanaamittete lophphonni addi addi deerrira nootanna ninke baalinke soˈneemmore ikkinoommota qaagi. (Qolasiyaasi 3:13) Yihowa woˈmu wodaninsanni baxxannori ledo jaalooˈmi; hatto assittoro ayyaanaamittetenni lophpha dandaatto. Addaho, Kiristaanu roduuwikki ledo Yihowa magansiˈrakki, Maganu  baxillinni fulittokki heeˈratto gede kaaˈlitannohe. Yihowa ammanante magansidhannosirenna baxillisinni fultukki heedhannore kiisannonsahu hiittoonniiti?

20, 21. “Halaalaancho heeshsho” maati? Tini hagiirsiissanno hexxooti yineemmohu mayiraati?

²⁰ Yihowa ammanantino soqqamaanosi heeshsho oye kiisannonsa; ikkina hiittoo heeshsho aannonsa? Maahoyyena xa nootto heeshsho heeshsho labbannohe? Tennera rooru manni, xa heeshshote heeˈnoommoti dileeltanni no? yaara dandaanno. Qoleno foolleemmo, inteemmonna angeemmo daafira lubbote heeˈnoommoti dihuluullissanno. Hagiirsiisannori tuncu yaannonke wote isinni, “Heeshshote yaa tenneeti!” yinammora dandiineemmo. Qullaawu Maxaafi kayinni, xaa yannara ayee manchino gari heeshsho heeˈranni nookkita xawisanno; konnira ikkadu korkaati noosi.

²¹ Maganu Qaali, “halaalaancho heeshsho seekkine cuˈmiˈneemmo” gede amaalannonke. (1 Ximootewosi 6:19, NW) “Halaalaancho heeshsho,” konni albira afiˈrate halchineemmo coye ikkinota tini xiqise xawissanno. Addaho, konni kaˈa guuta ikkineemmo wote hunda Maganu hedino garinni heeˈneemmo daafira, halaalaancho heeshsho heeˈneemmo yaate. Konni kaˈa gannate ikkitanno uullara woˈma fayyimma, keerenna hagiirre afiˈne heeˈneemmo wote, “halaalaancho heeshsho” afiˈneemmo; hatto yaano hegerera hagiidhinanni heeˈneemmo yaate. (1 Ximootewosi 6:12) Tini hagiirsiissanno hexxo diˈˈikkitino?

22. ‘Halaalaancho heeshsho seekkite cuˈmira’ dandaattohu hiittoonniiti?

²² “Halaalaancho heeshsho seekkine cuˈmira” dandiineemmohu hiittoonniiti? Phaawuloosi tennera, Kiristaanu ‘danchare assanno’ gedenna ‘danchu loosinni dureeyye ikkanno gede’ amaalino. (1 Ximootewosi 6:18) Tini xiqise xawissannonte gede, halaalaancho heeshsho seekke cuˈmirate Qullaawu Maxaafinni ronsoommo halaale loosu aana hosiisanke lowo irko afidhino. Ikkina Phaawuloosi “halaalaancho heeshsho,” dancha looso loonsoommohura baantanninke baatooshsheeti yaasiitini? Deeˈni; korkaatuno tenne hagiirsiissanno kaayyo afiˈneemmohu  Maganu ‘eltonniiti.’ (Roomu Sokka 5:15) Ikkeennano Yihowa isira ammanante soqqantannosire kiisa baxanno. Ati “halaalaancho heeshsho” heedhanna laˈˈa hasiˈranno. Maganu baxillinni fultukki heedhannori konni kaˈa togoota hagiirrunna keeru woˈminota hegere heeshsho afidhanno.

23. Maganu baxillinni fullummokki heeˈra lowo geeshsha hasiissannohu mayiraati?

²³ Mitti mittinke ninkeneeto togo yine xaˈma hasiissannonke: ‘Magano Qullaawu Maxaafi yaanno garinni magansiˈranni noommo?’ Barru baala ninkeneeto hatto yine xaˈmineenna, dawaronke ee yitannota ikkituro, halaalu doogo aana heeˈnoommo yaate. Hatto ikkiro, Yihowa irkonke ikkinota addaxxa dandiineemmo. Qarru woˈminoti jeefote yanna tenne alame aana dagganno wote, isi ammanamino mannasi keerunni sayisanno. Qoleno Yihowa muli yanna giddo biiffinota haaro alame eessannonke. Hatti yanna dagganno wote lowo geeshsha hagiidhineemmo! Qoleno tenne goofimarchu yannara dancha wussaane wossaˈnankenni konni kaˈa lowo geeshsha tashshi yaannonke! Xaa yannara togoo wussaane wossaˈnattoha ikkiro, “halaalaancho heeshsho” afidhe hagiidhatto; hatto yaano hunda Yihowa hedino garinni hegerete hegerera heeˈratto yaate!