GUWUURSHA
Sioole Maati?
QULLAAWA MAXAAFA umo borreessinoonnihunni Ibirayisxete afiinni sioolenna Girikete afiinni heedisi yaanno qaali 70 saˈino basera no. Lamenka qaale horoonsiˈnoonnihu reyote ledo xaadinseeti. Mite Qullaawu Maxaafi tiro kuri qaalla “waamma,” woyi “bale” yite tirtino. Ikkollana batinynyu afiinni konne Ibirayisxetenna Girikete qaali tiro garunni sayisanno qaali dino. Konni daafira, Haaro Alame Tiro tenne qaalla “Sioole” nna “Heedisi” yite tirtino. Ikkina lamunku qaali tiro maati? Hanni Qullaawu Maxaafi tenne qaalla babbaxxitino xiqissara horoonsiˈrino gara laˈno.
Mekibibi 9:10, “Ati haˈrattowa Sioolete loosu woyi iqqide woyi egenno woyi hayyo dino” yitanno. Togo yaa Sioole mitte baxxitinote waammate baseeti yaateni? Deeˈni. Qullaawu Maxaafi baxxitinota madaarshu base woyi moogo xawisate sioole woyi heedisi ikkikkinni wole Ibirayisxetenna Girikete qaale horoonsiˈranno. (Kalaqo 23:7-9; Maatewoosi 28:1) Hakkii saeno, Qullaawu Maxaafi “Sioole” yaanno qaale ayiddu moogga woyi duuchcha manna madaarranni base xawisate dihoroonsiˈranno.—Kalaqo 49:30, 31.
Ikkina “Sioole” hiittoo baseetiyya? Maganu Qaali “Sioole” woyi “Heedisi” yaanno qaale duuchcha manna madaarroonni basenni roorinorira horoonsiˈranno. Lawishshaho Isaayaasi 5:14 aanna, Sioole “halaˈlitinonna afoose dannimale fantino” yaanno. Sioole kiiro afiˈrinokki manna egemmitinoha ikkirono, ayee woteno diduubbannote. (Lawishsha 30:15, 16) Sioole wossanamino manna madaarranni base gede illete leeltannotanna ‘duubbannota’ diˈˈikkino. (Lawishsha 27:20) Hatto yaano Sioole horonta diwoˈmitannote yaate. Ise danna afidhinota diˈˈikkitino. Konni daafira, Sioole woyi Heedisi wossanantino base diˈˈikkitino. Hatteentenni, reyino manni baalu, fooliishshiˈrannote lawishshu baseeti.
Qullaawu Maxaafi kaote hexxore rosiisanno rosi, “Sioole” nna “Heedisi” maatiro seekkine buuxate kaaˈlannonke. Sioolenna Heedisi kao afiˈnanni reyo ledo xaado afidhinota Maganu Qaali coyiˈranno. * (Iyyoobi 14:13; Soqqamaanote Looso 2:31; Ajuu[j]a 20:13) Hakkii saeno Maganu Qaali, Yihowara soqqantinori calla ikkikkinni isira soqqantinokkirino Sioolete woyi Heedisi giddo noota kulanno. (Kalaqo 37:35; Faarso 55:15) Konni daafira Qullaawu Maxaafi, ‘Cubbaataammunna keeraano reyotenni [kaˈanno]’ yaanno.—Soqqamaanote Looso 24:15.
^ GUFO 1 Wole ragaanni reyotenni kaˈannokkiri, Sioolete woyi Heedisi giddo ikkikkinni “Gaannaamete giddo” noota xawinsoonni. (Sidaamu Afiinni qixxaawinohu Haaru Gondoori “Gaannaame” yaanno qaale, Maatewoosi 5:30; 10:28; 23:33 aana “goolu giira” yee tirino) Siooletenna Heedisi gede Gaannaameno illete leeltanno base diˈˈikkitino.
