Seenne adhatto wote haaro fiixa kalaqiꞌratto. Annakkinna amakki ayewoteno baxattohanna ayirrisattoha ikkirono, xaate kayinni atera uullate aana galtekki rooranno manchi dino. Ate woy minaamakki ayiddi giddo mitootaho tenne ammane adha qarrissansara dandiitanno. Ikkirono, haaro maateꞌne jawaata assiꞌrate sharrantinanni wote, quwa saꞌnikkinni ayiddiꞌne ledo salaametenni heeꞌra dandiitinanni gede Qullaawu Maxaafihu xintu seeri kaaꞌlannoꞌne.

QULLAAWU MAXAAFI MAYYAANNO? “Annakkinna amakki ayirrisi.” (Efesooni 6:2) Aye geeshshano jawa ikkittoro annakkinna amakki ayirrisa hasiissannohe. Galtekkino annasenna amase ayirrisa hasiissannoseta qaagi. “Baxillu dihinaasanno”; konni daafira galtekki annisenna amase ledo noose aante laꞌe yaaddooti.—1 Qorontoosi 13:4; Galaatiya 5:26.

MAA ASSA DANDIITINANNI?

• Mimmito, “Ayiddikki ayewoteno ane woffi assanno” woy “Amakki ani asseemmare horo dinaaddanno” yaa lawinore yitinannikki gede qorophe

• Galtekki heddanno gara huwatate woꞌnaali

QULLAAWU MAXAAFI MAYYAANNO? “Manchu annasinna amasi agure, minaamasi ledo quraanyamanno; lamunku mitto maala ikkitanno.” (Kalaqo 2:24) Annuwiꞌnenna amuuwiꞌne, adhantini gedensaannino kiꞌne towaata hasiissannonsahu gede assite heddara dandiitanno; hakko daafira quwa saꞌe kiꞌne maate giddora eate woꞌnaaltara dandiitanno.

Ayiddiꞌne kiꞌne maate mereero mageeshshi geeshsha ea hasiissannonsaro hasaabbine xaadisidhe, hattono muroꞌne baxillunni kullensa. Insa hanqisannokki garinni tenne xawissine kula dandiitinanni. (Lawishsha 15:1) Shooshanqe, joongillunna cinca annuwiꞌnenna amuwiꞌne ledono ikko wolu fiixiꞌne ledo dancha aante heedhannoꞌne gedenna ‘mimmito baxillunni dandiitine’ heedhinanni gede kaaꞌlitannoꞌne.—Efesooni 4:2.

MAA ASSA DANDIITINANNI?

• Fiixiꞌne quwa sae kiꞌne heeshsho giddora eanni nooti leeltuꞌnero, lamunku wodanaaꞌmitine heedhinoonni yannara hasaabbe

• Togoo hajo ma garinni tira hasiissannoꞌnero hasaabbine xaadisidhe