Gumulo
“Ammanatenninna cincatenni Maganu uyino hexxo ragiꞌranno manni faale [hadhe].”—IBIRAAWOOTA 6:12, NW.
1, 2. Xaa yannara ammana hasiissannonkehu mayiraati? Lawishshunni kuli.
AMMANA. Kuni mitto baxisanno akata kulanno qaaleeti. Ikkollana, konne qaale macciishshineemmo woy laꞌneemmo woyite, wiinamme assa hasiissannonkeri nootano qaaga hasiissannonke. Mayira yiniro, ammana noonkekkiha ikkiro, ranke ammana afiꞌra hasiissannonke. Ammana noonkeha ikkiro kayinni, baꞌannokki gede agadhanna towaaxxa hasiissannonke. Mayira?
2 Hanni lowo barahi giddoonni higge doogo hadhanni nootto yine hendo. Wayi gooꞌro shitanni noohe. Hatte giddo shiima waa afiꞌrittoro, foorare goofannohekki gede arrishsho iillitannokki gede assiꞌratto. Qoleno hedoottowa iillatto geeshsha wayi anganni goofannohekki gede, doogo afiꞌrittowa wonshidhanni haꞌratto. Xaa yannara heeꞌnoommohu, ayyaanaamittetenni barahu gede kooaartino alameraati; hakko daafira yannankera ammana hakkuyi wayi gede ajjino; qoleno agadhanna wonshiꞌra hoongummoro, wayi foorarannohu gede ikkite baꞌara dandiitanno. Ammana lowo geeshsha hasiisanno akataati; wayi nookkiha heeꞌra dandiineemmokkinte gede, ammana nookkihano Yihowa ledo jaalooꞌmine heeꞌra didandiineemmo.—Rom. 1:17.
3. Yihowa ammananke kaajjishiꞌneemmo gede kaaꞌlate maa qixxeessinonke? Hiikkonne lame coye qaaga hasiissannonke?
3 Yihowa, ammana mageeshshi geeshsha hasiissannonkero afino; qoleno xaa yannara ammana lossiꞌranna baꞌannokki gede assiꞌra qarrissanno garano afino. Qullaawu Maxaafi giddo ammanatenni dancha lawishsha ikkanno manni xagge borreessinanninke gede assinohu iseraati. Yihowa qullaawu ayyaaninni Phaawuloosi togo yee borreessanno gede assino: “Ammanatenninna cincatenni Maganu uyino hexxo ragiꞌranno manni faale [hadhe].” (Ibi. 6:12, NW) Yihowa dirijjiteno kuri ammanamino labballinna meenti lawishsha harunsate sharrammeemmo gede amaaltannonkehu iseraati; kuri giddo mitootu xagge konni maxaafira laꞌnoommo. Ikkina xa maa assa hasiissannonke? Hanni lame coye qaango: (1) Woꞌmanka woyite ammananke kaajjishiꞌra hasiissannonke; (2) hexxonke woꞌmanka woyite xabbe leeltannonke gede assiꞌra hasiissannonke.
4. Sheexaanu ammanate diina ikkinota leellishinohu hiittoonniiti? Ikkirono hexxo mudha hasiissannonkekkihu mayiraati?
4 Woꞌmanka woyite ammanakki kaajjishiꞌri. Ammanate kaajjadu diini noose; hakkuno Sheexaaneho. Kuni tenne alame gashshaanchi, alame ammana lossiꞌrate injaannokki baraha assino. Isi wolqa ninketa roortanno. Kayi ammana lossiꞌranna kaajjishiꞌra didandiineemmo yaate? Horo hatto yaa diꞌꞌikkino! Ammana lossiꞌra hasidhannorira baalaho Yihowa addu Jaalaati. Isi ledonke heeꞌri geeshsha, Daawuloosi giwa wole agurina ninkewiinni xooqanno gede nafa assa dandiineemmota kulinonke! (Yai. 4:7) Barru barrunku yanna gaaꞌmine ammananke jawaattannonna kaajjitanno gede kaaꞌlannore assineemmoha ikkiro, Sheexaane gimbanni heeꞌnoommo. Kayi konne assa dandiineemmohu hiittoonniiti?
5. Qullaawu Maxaafi giddo kulloonnihu ammanamino labballinna meenti ammana lossiꞌrinohu hiittoonniiti? Xawisi.
5 Kageeshsha ronsummonte gede, Qullaawu Maxaafi giddo kulloonnihu ammanamino labballinna meenti ammana adhe diꞌꞌilamino. Insa xagge, ammana Yihowahu qullaawu ayyaani laalo wido ikkitinota leellishshanno. (Gal. 5:22, 23) Yihowa insara huuccattonsa macciishshe ammanansa kaajjishinonsa. Ninkeno, Yihowa ayyaanasi aansara huuccidhannoriranna huuccattonsa ledo sumuu yaannore assitannorira ayyaanasi shaqqillunni aannonsata qaange, kaaꞌlannonke gede huucciꞌno. (Luq. 11:13) Woluri assa dandiineemmori nooyya?
6. Nabbambeemmoti Qullaawu Maxaafi xagge roore kaaꞌlitannonke gede, maa assa hasiissannonke?
6 Konni maxaafira, kaajja ammana noonsa manni giddo shiimu manni xaggella ronsoommo. Koye kulloonnikkihu ammanaminohu lowo, lowo manni no! (Ibiraawoota 11:32 nabbawi.) Mittu mittunku Maganu soqqamaanchi xagge huuccatto assiꞌne seekkine xiinxalla dandiineemmo. Qullaawu Maxaafi giddo kulloonnihu ammanamino manni xagge iimi adda calla nabbambeemmoha ikkiro, ammananke dikaajjitanno. Nabbambeemmori roore kaaꞌlannonke gede, yanna gaaꞌmine qooxeessaho noo hedonna Qullaawu Maxaafi giddo kulloonni manni ledo xaadooshshe afidhinota addi addi mashalaqqe seekkine xiinxalla hasiissannonke. Kuni guuntete xeꞌne noonsa manni “ninke gedee” manna ikkinota woꞌmanka woyite qaangeemmoha ikkiro, insa faale haꞌra diqarrissannonke. (Yai. 5:17) Qoleno qarransa huwatate woꞌnaalleemmoha ikkiro, ninkera iillino qarri iillinsa woyite hiitto ikkitinoro heda dandiineemmo.
7-9. (a) Qullaawu Maxaafi giddo kulloonnihu ammanamino labballinna meenti, Yihowa xa ninke magansiꞌneemmo garinni magansiꞌra dandoommero hiitto ikkara dandaanno? (b) Assineemmorinni ammananke kaajjishiꞌra hasiissannonkehu mayiraati?
7 Hakkiinni saeno, assineemmorinni ammananke kaajjishiꞌra dandiineemmo. Qullaawu Maxaafi, “Loosu ledo nookki ammanano reyitinote” yaanno. (Yai. 2:26) Kageeshsha xaggensa ronsummo labballinna meenti, Yihowa xa ninkera uyinonke looso loosse yoommensaro mageeshshi geeshsha hagiidhitannoro hanni hedi!
8 Lawishshaho, Abirihaami halalla seekkinoonnihu kakkalote dargira ikkikkinni, isi ‘xeertote heeꞌre laino’ hexxo xawinse rosiinsanniwa baxissanno Addaraashuwaranna qoqqowu gambooshshiwa qinaawinohu Maganu manni ledo Yihowa magansiꞌri yinoommesiro hiitto ikkanno ikka? (Ibiraawoota 11:13 nabbawi.) Eeliyaasino bushunna kaadaasinchu moote gashshe noowa Yihowara soqqamate sharramanni bushuulle Baꞌꞌaali masaalaano shiishiishantenni, sheshifachishshannotanna hexxo uyitanno sokka mannaho shaqqillunni kuli yinoommesiro hiitto ikkakka? Addanko, Qullaawu Maxaafi giddo kulloonnihu ammanamino labballinna meenti, Yihowa xa ninke magansiꞌneemmo garinni magansiꞌroommero baasa hagiidhanno!
9 Konni daafira, assineemmorinni woꞌmanka woyite ammananke kaajjishiꞌno. Hatto assineemmoha ikkiro, Maganu Qaali giddo kulloonnihu ammanamino labballinna meenti lawishsha harunsinanni heeꞌnoommo. Qoleno, konni maxaafira Bitimaho kulloonninte gede, kuri ammana noonsa manni ledo albinni roore jaalooꞌmineemmo. Ikkollana, muli yannara insa ledo noonke jaaloomi roore lexxanno.
10. Gannatete hiittoo hagiirre afiꞌneemmo?
10 Hexxokki woꞌmanka woyite xabbe leeltannohe gede assiꞌri. Ammanamino labballinna meentira Maganu uyinonsa hexxo lowo jawaante ikkitinonsa. Aterana? Lawishshaho, “Maganu . . . keeraano reyotenni [kayiseenna]” ammanantino soqqamaasinesi ledo xaadatto woyite mageeshshi geeshsha hagiidhattoro hedi. (Soqqamaasinete Looso 24:15 nabbawi.) Ati insa xaꞌma hasiꞌrattoti mite xaꞌmuwa hiikkuriiti?
11, 12. Haaro alamera, (a) Aabeeli (b) Nohi (c) Abirihaami (d) Ruuti (e) Abigiya (f) Asteeri mayite xaꞌmattora dandaatto?
11 Aabeeli ledo xaadatto woyite, annisinna amasi hiittooreetiro xaꞌma hasiꞌratto? Woy togo yite xaꞌmattoha ikkara dandaanno: “Edenete waalcho agartino kirubeele coyishiishshe egennootto? Insa qolte coyishiishshuheyya?” Nohi mayite xaꞌma hasiꞌratto? “Hakkawaro Nefiliimoota laꞌꞌatto woyite waajjishaahe? Mitto diro woꞌma kageeshshi saada markaawete giddo hiitto assite towaata dandiitto?” yite xaꞌmattoha ikkara dandaanno. Abirihaaminni xaadatto woyite kayi togo yite xaꞌmattora dandaatto: “Hakkawaro Seemi ledo xaadde egennootto? Yihowa daafira ayi rosiisinohe? Uuri katama agurte fula qarrissinohe?”
12 Reyotenni kainoha ammanamino meentono mayite xaꞌmattoro heda dandaatto. “Ruuti, ati Yihowa magansiꞌra doodhatta gede assinoheri maati?” “Abigiya, Daawiti kaaꞌloottata Naabaalira kula waajjishinohe?” “Asteeri, Qullaawu Maxaafira kulloonni xagge gedensaanni atinna Merdookiyoosi hiitto ikkitini?”
13. (a) Reyotenni kaꞌannori ate mayite xaꞌmitahera dandiitanno? (b) Hundi waro heeꞌrinohu ammanamino labballinna meenti ledo xaadattota hedatto woyite mayi macciishshamannohe?
13 Hige kuri ammanamino labballinna meenti, ateno lowo xaꞌmo xaꞌmahera dandaanno. Goofimarchu barruwara ikkinorenna Yihowa qarru yannara mannasi kaaꞌlino gara insara odeessa lowo geeshsha hagiirsiissannota ikkitanno! Yihowa uyino hexxo baalanta wonshino gara macciishshitanno woyite insano baasa hagiidhitannoti dihuluullissannote. Hattee yannara, Qullaawu Maxaafi giddo kulloonniha ammanamino manna wodaninkenni hedate woꞌnaala dihasiissannonke. Mayira yiniro, insa hakkawote ledonke Gannatete heedhanno! Konni daafira, konne manna seekkite egennate xa dandiittore baala assa agurtooti. Ammanatenni insa faale haꞌrano agurtooti. Muli jaallakki ikkitinori kuri Yihowa soqqamaasine ledo hegerera hagiirrunni isira soqqantanni heeꞌratto gede halchineemmo!
