1, 2. Batinyu manni reyino manni ma ikkanno yee ammananno?

 AFIRIKAHO heeꞌranno manni giddo lowo miliyoone ikkannohu, reyo heeshshote goofimarcho ikkitinota diammananno; hatteentenni wole alamera heeꞌnanni heeshshowa saꞌnanni buusaati yee ammananno. Batinyu manni biꞌree annuwansa leeltanno alamenni leeltannokki alame, hattono mannu heeꞌranno alamenni ayyaanaame alame saꞌino yee ammananno.

² Qoleno, kuri biꞌree annuwa woyi insa ayyaanna, uullate aana noo fiixinsa keere heeꞌrannonna qawaaxxiꞌranno gede towaattanno yee ammananno. Tenne ammana garinni, biꞌree annuwa ayyaanna wolqaataamma jaalla ikkitanno, gidu laalanno gede assitanno, fayyimma agartanno, hattono gawajjotenni agartanno. Awisiꞌra hoonginsaro, woyi hanqinsinsaro qarra, xiwana, buximanna adaga abbitanno yine ammannanni.

3. Mitu manni biꞌree annuwa magansiꞌrannohu hiittoonniiti?

³ Lubbote noo manni biꞌree annuwansa ayyaanna ayirrisate woyi insa ledo danchu garinni fiixoome heeꞌrate yee addi addi coye assanno. Togoo assooti roore wote madaarshu yannara woyi madaarshu budi yannara luphi yee leellanno. Mannu biꞌree annuwansa wolu garinnino magansiꞌranno. Lawishshaho, mitu manni annaho xorshiꞌranno. Qoleno sagale qishiꞌre kairo, biꞌree annuwa dagge ittannore hooggannona yee sagale gatisanno.

4. Batinyu manni lubbo ma ikkitanno yee ammananno?

⁴ Wolu manni qole, mannu reyanno wote reyitukki gattanno lubbo no yee ammananno. Qoleno, danchu manchi reyiro, lubbosi iimira woyi gannate hadhanno, bushu manchi reyiro kayinni lubbosi giirantanno bayicho eꞌanno gede farandanni yee ammananno. Duucha wote mannu tenne assaawe budu ammaꞌno ledo xaadisanno. Tini baalanti ammana mannu reyanno wote reyitukki gattanno lubbo woyi fooli no yitanno assaawe aana xintantinote. Qullaawu Maxaafi tennera mayyaanno?

5, 6. Qullaawu Maxaafi kulanno garinni lubbo maati?

⁵ Qullaawu Maxaafi, lubbote yinanniri mannu giddo nookkita kulanno; hatteentenni, manchu umisi lubbote. Lawishshaho Maganu Addaami kalaqi wote, kalaqamino “manchi heeshsho noo lubbo ikkino.” (Kalaqo 2:7) Maganu Addaamira lubbo diworinosi; Addaami umisi gudisire lubbote.

⁶ Qullaawu Maxaafi lubbo ilantannota coyiꞌrannohu iseraati. (Kalaqo 46:18) Lubbo  ittanno woyi tsoontanno. (Zelewaawuyaani 7:20; Faarso 35:13) Lubbo wiꞌlitanno, hattono dhuka baꞌanno. (Ermiyaasi 13:17; Yoonaasi 2:7) Lubbo diirantanno, darantanno, hattono sansalatetenni usurantanno. (Marro 24:7; Faarso 7:5; 105:18) Qullaawu Maxaafi umo borreessami wote tenne xiqisubbara eino qaale, mite Qullaawu Maxaafi tiro “lubbo” yite tirtino; mite kayinni “lubbote noore,” “kalaqo” woyi “mancho” yite tirtino. Tenne baalante qaalla tiro mittete.

7. Lubbo reyitannota kultannoti Qullaawu Maxaafi xiqisubba hiikkuriiti?

⁷ Manchu lubbo ikkino daafira, isi reyanno wote lubbo reyitanno. Hiziqeeli 18:4 togo yitanno: “Cubbo loossanno lubbo ise umise reyitanno.” Qoleno Soqqamaanote Looso 3:23 (NW) togo yitanno: “Hakku Masaalaanchi yaannota macciishshitannokki lubbo [woyi, manchi] mannu mereerinni murante hoꞌlitanno.” Konni daafira mannu reyanno wote lubbo reyitanno yaate.

8. Mannu giddo noo fooli maati?

⁸ Foolunna lubbo addi addiiti. Mannu giddo noo fooli, heeshshote wolqaati, yaano mannu lubbote heeꞌranno gede assitanno wolqaati. Foolu korreentete wolqa gedeeti. Korreentete wolqa gidu baaburi gide daahanno gede assitanno; ikkollana ise umise gide didaakkanno. Hatteente gede, foolu laꞌꞌa, macciishshanna assaawa dandiineemmo gede assannonke. Ikkollana ille, macca woyi surre hoogguro, foolu umisi togoore asse diafanno. Konni daafira Qullaawu Maxaafi mannu reyanno wote ikkannore kulanni, “Foolisi fulanno, isino baatto higanno; hakkawote hedosi baꞌanno” yaanno.—Faarso 146:4.

9. Lubbonna foolu maa diꞌꞌikkanno?

⁹ Konni daafira Qullaawu Maxaafi kulanno garinni, mannu reyanno wote lubbono ikko foolu reyikki gate wolewa heeꞌrara dihaꞌranno.

10. Qullaawu Maxaafi reyitinori noo gara mayyaanno?

¹⁰ Ikkina reyino manni hiitto ikke no? Manna kalaqinohu Yihowa ikkino daafira, reyinummoro ma ikkineemmorono isi afino. Qaalisi reyitinori heeshsho nookkire ikkitinota, hattono horonta macciishsha, laꞌꞌa, coyiꞌra woyi assaawa dandiitannokkita kulanno. Qullaawu Maxaafi togo yaanno:

•   “Reyitinori kayinni mittoreno diaffanno.”—Mekibibi 9:5.

•   “Baxillinsa, [manna] giwate hedonsanna hinaasonsa baꞌunku keeshshitino.”—Mekibibi 9:6.

•   “Ati haꞌratto bayicho [waammate giddo], loosu woyi iqqide woyi egenno woyi hayyo dino.”—Mekibibi 9:10.

11. Addaami cubbo loosi gedensaanni Yihowa iso mayyii?

¹¹ Hanni Qullaawu Maxaafi hundi anninkere Addaamire coyiꞌranni yaannore huwati. Yihowa Addaami kalaqinohu “baattote aaninni bushsha haareeti.” (Kalaqo 2:7) Addaami Yihowara hajajamoommero, uullate aana hagiidhanni hegerera heeꞌrannonka. Ikkollana, Addaami Yihowa higgera dihajajamino; konni daafira reyote qixaate uyinoonnisi. Addaami reyi wote hiikka haꞌri? Maganu iso togo yiinosi: “Baattote giddonni fulootto daafira, baatto higatto. Bushsha ikkootto daafira, bushsha higatto.”—Kalaqo 3:19.

12. Addaami reyi wote ma ikkino?

¹² Addaami, Yihowa bushshunni kalaqasira albaanni hiikko no? Mittowano dino. Isi horonta lubbote dino. Konni daafira Yihowa, Addaami ‘baatto higanno’ yaasi, Addaami bushshu gede galagale heeshsho nookkiha ikkanno yaasiiti. Konni daafira Addaami wolewa haꞌre heeꞌranni dino. Qoleno isi biꞌree annuwa alame dihaꞌrino. Isi iimira woyi giirammanni bayicho dihaꞌrino. Isi heeshsho nookkiha ikkino, yaano heeꞌra agurino.

13. Mannuno saadano reyituro ma ikkitanno?

¹³ Mannu baalunku reyiro hatto ikkanno yaate? Ee hatto ikkanno. Qullaawu Maxaafi togo yaanno: “Baalunku [mannuno saadano] mitto bayicho hadhanno. Insa baalunku bushshunni kalaqantino, baalunku qolte bushsha higganno.”—Mekibibi 3:19, 20.

14. Reyitinorira mayi hexxo noonsa?

¹⁴ Qullaawu Maxaafi Maganu reyitinore  kayise gannatete heedhanno gede assanno yee hexxo aanno. (Yohaannisi 5:28, 29; Soqqamaanote Looso 24:15) Kuni ikkannohu kayinni konni kaꞌaati. Reyitinori xa reyotenni goxxe no. (Yohaannisi 11:11-14) Kaaꞌlitankera woyi gawajjitankera dandiitannokki daafira insa waajja woyi magansiꞌra dihasiissannonke.

15, 16. Sheexaanu mannu reyanno wote reyikki gatannori no yine ammannanni gede assate woꞌnaalannohu hiittoonniiti?

¹⁵ Reyineemmo wote reyikki gatannori giddonke no yitanno assaawe Sheexaanu Daawuloosi tareessanno kaphooti. Isinna agaanintesi mannu konne kapho ammananno gede assate, xiwananna wole qarra abbitannoti ekerate yine hendanni gede assate woꞌnaaltanno. Mito qarra abbitannori agaaninte umonsaati. Wolu qarri kayinni mannu wolqara aleenni ikkinorinni ikkikkinni hedeweelcho iillankera dandaanno. Ikkollana reyino manni qarru iillannonke gede assanno yaa soꞌrote.

¹⁶ Agaaninte mannu Qullaawu Maxaafi reyino mannire coyiꞌrannori digaraho yee ammananno gede assitannoti wole doogono no. Mannu reyitinore laꞌnoommo woyi insa ledo hasaamboommo yee hedanno gede assite dogganno. Agaaninte konne assitannohu haaqetenni, ajuujatenni, reyitinori ledo xaadissannori widoonni woyi wole doogonniiti. Ikkollana, mannu laꞌnummo yaannori reyino manna ikkikkinni insa labbe dogganno agaaninteeti. Yihowa agaanintete ledo xaadissannorenna reyitinore coyishiishshannore effire giwannohu iseraati.—Marro 18:10-12; Zekkaariyaasi 10:2.