DUUCHANKA DANDAANNO MAGANI kalqete alamera aliidi Mootichaati. Xa ikko konni kaꞌa heeshshote heeꞌneemmohu isinniiti. Isira maassiꞌrateno qaxxaasateno wolqa noosi. Qoleno heeshsho aateno haare hoolateno wolqa noosi. Iso hagiirsiinsummoro qinaannonke; iso hagiirsiisa hoongummoro kayinni diseyannonke. Magano isi hagiidhanno garinni magansiꞌranke lowo geeshsha hasiissannote!

Mannu batinye doogganni magansiꞌranno. Ammaꞌno doogo ikkitino gede assite hedi; ikkina baalanti ammaꞌnote doogo Magano hagiirsiissanno? Dihagiirsiissanno. Maganu Beetti Yesuusi lamu gari doogo calla noota rosiisino. Isi togo yiino: ‘Baote widira [massitanno] doogo halaꞌladote; hakkira eanno manni lowoho. Heeshshote widira eꞌnanni waalchi ruukkashshoho, doogono lowo geeshsha shaaladote; afiˈranno mannino shiimaho.’—Maatewoosi 7:13, 14.

Lamu gari ammaꞌno calla no; mitte heeshshonniwa massitannote, mitte kayinni baonniwa massitannote. Tenne biroshere qixxeessinoonnihu, hegere heeshshowa massitanno doogo badde afatto gede ate kaaꞌlateeti.